កិច្ចប្រជុំកំពូលធុរកិច្ចអាស៊ាន-កម្ពុជា ឆ្នាំ២០២៤ មានគោលដៅជំរុញសក្តានុពលអាស៊ាន ពិសេសកំណើនសេដ្ឋកិច្ច ថាមពល និងបច្ចេកវិទ្យា ដែលកម្ពុជាគឺជាចំណុចស្នូល។ 

 

តំណភ្ជាប់ខ្សែបញ្ជូនថាមពលអាស៊ាន ចីរភាព និងថាមពលកកើតឡើងវិញរបស់អាស៊ាន (ASEAN energy grid connectivity and ASEAN renewable energy and sustainability), កម្ពុជាគឺជាច្រកទ្វារទៅកាន់អាស៊ាន (Cambodia - Gateway to ASEAN) និងការប្រើប្រាស់បច្ចេកវិទ្យាដើម្បីកំណើនប្រកបដោយបរិយាប័ន្ន (Leveraging Technology for Inclusive Growth) គឺជាប្រធានបទសំខាន់ ដែលត្រូវយកមកពិភាក្សាក្នុងកិច្ចប្រជុំនេះ។

 

កិច្ចប្រជុំនេះ រៀបចំឡើងដោយសភាពាណិជ្ជកម្មកម្ពុជា និងក្រុមប្រឹក្សាពិគ្រោះយោបល់ធុរកិច្ចអាស៊ាន-កម្ពុជា ក្រោមកិច្ចសហការជាមួយសភាពាណិជ្ជកម្មអន្តរជាតិ និងសមាគមពាណិជ្ជកម្មកម្ពុជា-អាស៊ាន ដែលមានការចូលរួមពីឯកអគ្គរដ្ឋទូតតំណាងស្ថាប័នពាក់ព័ន្ធនានា ក្រុមហ៊ុនអន្តរជាតិធំៗនៅកម្ពុជា និងអាស៊ាន រួមទាំងអ្នកជំនាញពីគ្រប់វិស័យផងដែរ។ សម្ដេច ហ៊ុន ម៉ាណែត នាយករដ្ឋមន្រ្តីកម្ពុជា ចូលរួមជាអធិបតីបើកកិច្ចប្រជុំកំពូលធុរកិច្ចនេះ៕