ខ្សែប្រយុទ្ធ Sadio Mane, Abdulmajeed Al Sulaiheem, Abdulrahman Ghareeb ស៊ុតម្នាក់មួយគ្រាប់ក្នុងការប្រកួត និងកីឡាករ Abdulaziz Saud Al Aliwa ស៊ុតចូល ២គ្រាប់ ព្រមទាំងរួមចំណែកធំបន្ថែមពីកីឡាករវ័យ ៣៩ឆ្នាំ ស៊ុត ៣គ្រាប់ ដែលរកបាននៅត្រឹមតែវគ្គទីមួយនោះ ធ្វើឱ្យ Al Nassr យកឈ្នះដោយងាយស្រួលលើគូប្រកួត។ Al Abha ជាក្រុមចំណាត់ថ្នាក់បាតតារាងនៃក្របខណ្ឌលីគកំពូលអារ៉ាប៊ីសាអូឌីត។
 

២គ្រាប់កើតចេញពី Ronaldo ធ្វើបានដោយការស៊ុតបាល់ពិន័យ Free Kick ដោយគ្រាប់ទី១ គេរកបាននៅត្រឹមតែនាទី១១ នៃការប្រកួតក្នុងវគ្គទីមួយ មុនពេលគ្រាប់បាល់ទី២ កើតឡើងដដែលគ្នានេះនៅនាទី២១។ គ្រាប់ទី៣ ជាការស៊ុតបាល់យ៉ាងល្អពីម្ចាស់ពាន Ballon d’Or ៥សម័យ នៅនាទី៤២។
 

រកបាន ៣គ្រាប់បន្ថែម Ronaldo បន្តក្លាយជាកីឡាករនាំមុខគេលើការស៊ុតគ្រាប់បាល់ក្នុងរដូវកាលប្រចាំលីគ Saudi Pro League រកបាន ២៩គ្រាប់​ នាំមុខគេកំពូលតារាងប្រជែងស្បែកជើងមាស។
 

បន្ទាប់ពីការឈ្នះរួច បុរសប្រធានក្រុមជម្រើសជាតិព័រទុយហ្កាល់ បានបង្ហោះសារនៅលើបណ្តាញសង្គម Instagram ដោយអះអាងថាក្រុមនឹងមិនរាថយឡើយចំពោះការប្រកួតប្រជែងពានក្នុងរដូវកាលនេះ។ ដ្បិតឈ្នះដោយងាយ តែ ​Al Nassr មានគម្លាតចំនួន ១២ពិន្ទុ ពីក្រុម Al Hilal។
 

«យើងនឹងមិនបន្ធូរបន្ថយឡើយ» តារាបាល់ទាត់វ័យ ៣៩ឆ្នាំ បានបង្ហោះនៅលើបណ្តាញសង្គម Instagram ភ្ជាប់ជាមួយនឹងរូបភាពអបអរជ័យជម្នះបែបនេះ។
 

សរុបទាំងការស៊ុតបាល់ និងការបញ្ជូនបាល់ក្នុងការប្រកួត Ronaldo មកដល់បច្ចុប្បន្នរកបានគ្រាប់បាល់ចំនួន ៣៦គ្រាប់ និងបញ្ជូនបាល់ ១២គ្រាប់ ពីការបង្ហាញខ្លួន ៣៥លើក នៅរាល់ការប្រកួតក្នុងរដូវកាលនេះ៕