ក្នុងពិធីផ្សព្វផ្សាយពីបទវិន័យនគរបាលជាតិ នៅទីស្ដីការក្រសួងមហាផ្ទៃ កាលពីថ្ងៃទី២ មេសា លោក ស សុខា ស្នើឱ្យស្នងការរាជធានី-ខេត្ត ពង្រឹងគោលការណ៍ភូមិឃុំសុវត្ថិភាពឡើងវិញ។ ពាក់ព័ន្ធនឹងគោលការណ៍នេះ រដ្ឋមន្ត្រីមហាផ្ទៃ បានសង្កត់ធ្ងន់លើបញ្ហាក្មេងទំនើង គ្រឿងញៀន និងល្បែងស៊ីសង។ 

 

ករណីក្មេងទំនើង លោក ស សុខា ពន្យល់បន្ថែមឱ្យមន្ត្រីថ្នាក់រាជធានី-ខេត្ត រឹតបន្តឹងលើល្បឿនបើកបរ អំឡុងពេលពិធីបុណ្យចូលឆ្នាំថ្មីផងដែរ។ រីឯ បញ្ហាគ្រឿងញៀនលោកសង្កត់ធ្ងន់បែបនេះ៖ «ខ្ញុំសូមស្នើឱ្យឯកឧត្តមស្នងការរាជធានី- ខេត្តទាំងអស់ កុំចាំតែមន្ទីរគ្រឿងញៀនចុះធ្វើ ហើយបានយើងមានការសម្របសម្រួលចុះអមជាមួយ។ ខ្ញុំសូមទទូចឱ្យមានឆន្ទៈខ្ពស់ ក្នុងការខិតខំប្រឹងប្រែងលើបញ្ហានេះ»។ 

 

យ៉ាងណាក៏ដោយ រដ្ឋមន្ត្រី ក៏ពិនិត្យឃើញមានស្នងការរាជធានី-ខេត្ត មួយចំនួន បានប្រឹងប្រែងលើករណីនេះហើយ ប៉ុន្តែខ្លះទៀតពុំទាន់ប្រឹងប្រែងឱ្យដល់កម្រិត  ខណៈតំបន់ខ្លះ កំពុងកើនឡើងករណីគ្រឿងញៀន។ ហេតុនេះ ទើបលោក ស សុខា ដាស់តឿនទៅស្នងការរាជធានី-ខេត្តនីមួយៗ បន្ថែមថា៖ «សូមទទូច ឱ្យពិនិត្យលើបញ្ហានេះ ហើយកុំចាំថ្នាក់លើ ឬថ្នាក់ក្រសួង ទៅធ្វើ ឬធ្វើជំនួសច្រើនពេកអត់ល្អទេ!»។ 

 

ជាមួយគ្នាដែរ លោក ស សុខា ក៏ស្នើទៅស្នងការរាជធានីខេត្តឱ្យបន្តចាត់វិធានការលើល្បែងផ្សងសំណាង ដែលគ្មានអាជ្ញាប័ណ្ណ កុំឱ្យងើបឡើងវិញ៕