បើតាមការផ្សាយរបស់កាសែត The Sun ឧបករណ៍ BETSiE បានទស្សន៍ទាយតារាងចំណាត់ថ្នាក់ចុងក្រោយនៃលីគកំពូលអង់គ្លេស រដូវកាល ២០២៣-២៤នេះ រួមទាំងការប្រជែងតំណែងកំពូលទាំងបួន Top 4 និងក្រុមដែលត្រូវកាត់ចោលទៅលីគទី២ Championship រដូវកាលក្រោយ។
 

BETSiE ជាព្យូទ័រទំនើបមួយ ដែលអាចទស្សន៍ទាយបាន ដោយផ្អែកលើការងារគណិតវិទ្យា និងដំណើរការទិន្នន័យជាលេខ។ ដោយនៅ​សល់​ការ​ប្រកួត​ចំនួន​៧​លើករៀងខ្លួន ឧបករណ៍ BETSiE ទាយថា ការ​ប្រជែង​ដណ្តើម​ជើងឯកមានតែ Liverpool, Arsenal និងម្ចាស់ការពារតំណែងជើងឯក Man City ប៉ុណ្ណោះ ដោយក្រុមទាំងបីមានពិន្ទុប្រដេញគ្នា ៧០ ៦៨ និង៦៧ពិន្ទុ។
 

កុំព្យូទ័រទំនើបនេះ បានគណនាថា Liverpool នឹងក្លាយជាជើងឯកលីគកំពូលអង់គ្លេស ដោយរកបាន ៨៧ពិន្ទុ នៅចុងបញ្ចប់រដូវកាល ដោយរកបាន ១៧ពិន្ទុបន្ថែម ពីការប្រកួត៨លើក។

Arsenal ត្រូវ​បាន​ព្យាករ​ថា​នឹង​បញ្ចប់​ក្នុង​ចំណាត់​ថ្នាក់​លេខ២ មាន៨៦ពិន្ទុ និង Man City លេខ ៣ មាន៨៤ពិន្ទុ។
 

BETSiE ​គិត​ថា​ Aston Villa នឹងបញ្ចប់ក្នុងចំណាត់​ថ្នាក់​ទី​៤ ដោយទទួលបានកៅអី Champions League ​​មាន៦៨ពិន្ទុ តាម​ពី​ក្រោយ​ដោយ Tottenham Hotspurs។ Man Utd បានត្រឹម​លេខ​៦​ ជាមួយពិន្ទុសរុប ៥៨​ពិន្ទុ​ប៉ុណ្ណោះ។ 
 

ទន្ទឹមនឹងនេះ Sheffield United, Burnley និង Luton Town ត្រូវបានព្យាករណ៍ថានឹងត្រូវកាត់ចេញពីលីគកំពូល។ ការប្រកួតចុងក្រោយ Premier League ២០២៣-២៤ នឹងធ្វើឡើងនៅថ្ងៃទី១៩ ខែឧសភា៕