ក្រុមហ៊ុន Sunwah Group​ កំពុងសម្លឹងការវិនិយោគបន្ថែមទៀតនៅកម្ពុជា លើការអភិវឌ្ឍន៍តំបន់សេដ្ឋកិច្ចពិសេសបៃតង (Green SEZ), ការកសាងអគារពាណិជ្ជកម្ម និងលំនៅឋានខុនដូ និងវិនិយោគលើវិស័យទេសចរណ៍។​ ក្រុមហ៊ុនចិនមួយនេះ ក៏មានបំណងវិនិយោគលើការដំឡើងស្ថានីយសាកថាមពលយានយន្តអគ្គិសនី (EV Charging Station) និងការកសាងស្ថានីយបណ្តាញទូរគមនាគមន៍ 5Gផងដែរ។ 

 

គោលបំណងនៃដាក់ទុនវិនិយោគបន្ថែមលើវិស័យខាងលើ ត្រូវបានលើកឡើងដោយលោក Jonathan K.S. Choi ប្រធានក្រុមហ៊ុន Sunwah Group នៅចំពោះមុខប្រមុខរដ្ឋាភិបាល សម្តេច ហ៊ុន ម៉ាណែត នៅវិមានសន្តិភាព នាថ្ងៃទី៨មេសា។​  ជុំវិញនៃបំណងនេះ សម្តេច ហ៊ុន ម៉ាណែត បាន​ស្វាគមន៍ និងបញ្ជាក់ទៅកាន់ប្រធានក្រុមហ៊ុ​ន Sunwah ថា​ រដ្ឋាភិបាលគឺមានចក្ខុវិស័យច្បាស់លាស់ ក្នុងការជំរុញកំណើនសេដ្ឋកិច្ច ដើម្បីលើកកម្ពស់ជីវភាពរស់នៅរបស់ប្រជាពលរដ្ឋ។ ការប្តេជ្ញាចិត្តកន្លងមកនេះ ធ្វើឱ្យសេដ្ឋកិច្ចកម្ពុជារីកចម្រើន និងរក្សាបាននូភាពធន់ ដោយសម្រេចបានកំណើន៥​,៦ភាគរយក្នុងឆ្នាំ២០២៣ ។ បើតាមការព្យាករកំណើននេះ សេដ្ឋកិច្ចកម្ពុជា នឹងដល់៦,៦ភាគរយ ក្នុងឆ្នាំ២០២៤។​

 

« ជាមួយគ្នានេះ ដើម្បីធានាបាននូវបរិយាកាសនៃការប្រកួតប្រជែង និងការធ្វើធុរកិច្ច រដ្ឋាភិបាលកម បន្តយកចិត្តទុកដាក់លើការធានានូវសុខសន្តិភាព ស្ថិរភាពនយោបាយ និងសណ្តាប់ធ្នាប់សង្គម ក្នុងការផ្តល់ជំនឿទុកចិត្តដល់វិនិយោគិន»។ នេះជាការរៀបរាប់របស់សម្តេចនាយករដ្ឋមន្ត្រី ហ៊ុន ម៉ាណែត  ដែលបានខិតខំជំរុញកសាងហេដ្ឋារចនាសម្ព័ន្ធតភ្ជាប់ផ្លូវលឿន និងកំពង់ផែទឹកជ្រៅ ព្រមទាំងដាក់ចេញនូវគំនិតផ្តួចផ្តើមថ្មីៗជាច្រើនទៀត ដើម្បីគាំទ្រដល់ការវិនិយោគនៅកម្ពុជា ដូចជាគំរូថ្មីនៃតំបន់សេដ្ឋកិច្ចពិសេស តាមប្រភេទឧស្សាហកម្ម និងតម្រូវការរបស់ប្រទេសនីមួយៗ និងយុទ្ធសាស្រ្តប្រទេសបូក ( Plus-One Strategy)។ 

 

ពាក់ព័ន្ធនឹងគម្រោងវិនិយោគអភិវឌ្ឍតំបន់សេដ្ឋកិច្ចពិសេសបៃតង និងគម្រោងវិនិយោគលើយានយន្តអគ្គិសនី EV, សម្តេច ហ៊ុន ម៉ាណែត បានណែនាំឱ្យក្រុមហ៊ុនពិភាក្សាបន្ថែមជាមួយក្រសួង-ស្ថាប័នពាក់ព័ន្ធ ដូចជាក្រុមប្រឹក្សាអភិវឌ្ឍន៍កម្ពុជា(CDC) ក្រសួងសាធារណការ និងដឹកជញ្ជូន និងក្រសួងរ៉ែ និងថាមពល ជាដើម។ សម្តេចធិបតី បានអះអាងថា រដ្ឋាភិបាលយកចិត្តទុកដាក់ក្នុងការប្រើប្រាស់ថាមពលស្អាត ។ បច្ចុប្បន្ន កម្ពុជាកំពុងប្រើប្រាស់ថាមពលស្អាតជាង៦០ភាគរយ ហើយកំពុងជំរុញការប្រើប្រាស់ថាមពលស្អាតនេះ ឱ្យឈានទៅដល់៧០ភាគរយ ត្រឹមឆ្នាំ២០៣០។

 

ចំពោះបំណងរបស់ក្រុមហ៊ុន Sunwah លើការវិនិយោគក្នុងវិស័យទេសចរណ៍, សម្តេច បានលើកឡើងថា រដ្ឋាភិបាល បាន​ដាក់ចេញគោលនយោបាយគាំទ្រវិស័យទេសចរណ៍ និងការពង្រីកជើងហោះហើរត្រង់ ពីបណ្តាប្រទេសនានា ក្នុងតំបន់-ពិភពលោក ដោយបានបង្កើតក្រុមប្រឹក្សាភិបាលសិក្សាទីផ្សារ និងផ្សព្វផ្សាយទេសចរណ៍កម្ពុជា ដើម្បីផ្តល់សេវាកម្មទេសចរណ៍ឱ្យកាន់តែមានប្រសិទ្ធភាពបន្ថែមទៀត។ 

 

គួរជម្រាបថា ក្រុមហ៊ុន Sunwah Group ត្រូវបានបង្កើតឡើងក្នុងឆ្នាំ ១៩៥៧ គ្របដណ្តប់លើផ្នែកអាហារសមុទ្រ និងគ្រឿងឧបភោគបរិភោគ អចលនទ្រព្យ សេវាកម្មហិរញ្ញវត្ថុ បច្ចេកវិទ្យា ប្រព័ន្ធផ្សព្វផ្សាយ ហេដ្ឋារចនាសម្ព័ន្ធ ការអប់រំ និងការបណ្តុះបណ្តាល និង Green Tech និងការថែទាំសុខភាព។ ក្រុមហ៊ុននេះដំណើរការនៅចិនដីគោក ជប៉ុន ម៉ាកាវ វៀតណាម មីយ៉ាន់ម៉ា សិង្ហបុរី កាណាដា អឺរ៉ុប អាមេរិក អូស្ត្រាលី និងនៅកម្ពុជា៕