សង្ក្រាន្ដខេត្តស្វាយរៀង ឆ្នាំ២០២៤ រដ្ឋបាលខេត្ត បានអញ្ជើញសហព័ន្ធកីឡាហោះហើរកម្ពុជា ឲ្យចូលរួមបង្ហាញពីការហោះហើរ។ សហព័ន្ធ បានបញ្ជូនគ្រូបង្វឹក-កីឡាករ ៦រូប ក្នុងនោះមាន៖ លោក តេង ប៉េងស៊ាង គ្រូបង្វឹក, កីឡាករ លី សុខី, Mr. Claudel Drainville, សារៀម រក្សា, ទិត្យ វណ្ណា និង Mr. Luke Russell Rozycki-Marshall។ 
 

លោក សារៀម រក្សា បានប្រាប់សារព័ត៌មានថ្មីៗតាមតេលេក្រាមថា កីឡានេះ មិនសូវជាមានអ្នកស្គាល់ ហើយក៏មិនដឹងថានៅក្នុងកម្ពុជា​ មានប្រភេទកីឡានេះដែរ។ ក្រៅអំពីការផ្សព្វផ្សាយកីឡានេះ អគ្គលេខាធិការរូបនេះ ការបង្ហាញការហោះហើរ គឺជាទស្សនីយភាពមួយប្លែក និងញ៉ាំងបរិយាកាសឲ្យកាន់តែចាប់អារម្មណ៍។
 

«ខ្ញុំគិតថា នេះជាការផ្សព្វផ្សាយឲ្យប្រជាជននៅខេត្តស្វាយរៀង បានស្គាល់នូវកីឡាមួយនេះ។ កីឡានេះ មិនទាន់មានអ្នកស្គាល់ច្រើនទេ។ ហើយខ្ញុំ គិតថា ពេលឃើញការហោះហើរពួកគាត់អ្នកទៅលេងសង្ក្រាន្តនោះ មានក្ដីរំភើបរីករាយ។ យើង ចង់បង្ហាញការហោះហើរ មិនត្រឹមតែខេត្តស្វាយរៀងទេ ប៉ុន្ដែគឺគ្រប់ខេត្ត ដើម្បីឲ្យពួកគាត់បានស្គាល់ពីកីឡានេះ។»។ លោក សារៀម រក្សា បាននិយាយដូច្នេះ។
 

គួរបញ្ជាក់ផងដែរថា កីឡាហោះហើរ មានវត្តមាននៅកម្ពុជា តាំងពីចន្លោះឆ្នាំ២០០០-២០០៤ ហើយមានភ្ញៀវទេសចរ លេងកីឡានេះច្រើន គឺនៅចន្លោះឆ្នាំ២០០៥-២០១០។ ដោយឡែក សហព័ន្ធកីឡាហោះហើរ ត្រូវបានបង្កើតនៅឆ្នាំ២០១៣ បន្ទាប់ពីមានការជំរុញ និងជួយជ្រោមជ្រែងពី គណៈកម្មាធិការជាតិអូឡាំពិកកម្ពុជា (NOCC) ដោយមានលោក តេង ប៉េងស៊ាង ជាប្រធានសហព័ន្ធ រហូតមកទល់បច្ចុប្បន្ន៕