ទីបំផុតទៅ លោក លី សៀនឡុង អាចផ្ទេរតំណែងនាយករដ្ឋមន្រ្តីបានហើយ បន្ទាប់ពីពន្យារពេលច្រើនឆ្នាំ។ លោក លី ប្រកាសតាមបណ្ដាញសង្គមនៅថ្ងៃទី១៥ ខែមេសា លោក នឹងចុះចេញពីតំណែងនៅថ្ងៃទី១៤ ខែឧសភា។ ឧបនាយករដ្ឋមន្ត្រី ឡរ៉ែន វង់ ដែលមានឈ្មោះជាអ្នកស្នងតំណែងរបស់បក្សកាន់អំណាចសកម្មភាពប្រជាជន (PAP) នឹងស្បថចូលកាន់តំណែងនៅថ្ងៃបន្ទាប់។

 

លោក វង់ ដែលជារដ្ឋមន្រ្តីហិរញ្ញវត្ថុផងនោះ នឹងក្លាយជានាយករដ្ឋមន្រ្តីទី៤ របស់សិង្ហបុរី។

 

លោក លី ដែលកាន់តំណែងតាំងពីខែសីហា ឆ្នាំ២០០៤ ក្នុងវ័យ៥២ឆ្នាំ និយាយថា ការផ្ទេរអំណាច ជារឿងសំខាន់របស់ប្រទេសទាំងអស់។ លោកសរសេរលើគណនីបណ្ដាញសង្គមរបស់លោកដូចៗគ្នាថា លោក វង់ និងមេដឹកនាំជំនាន់ទី៤ បានធ្វើការដើម្បីទទួលបានទំនុកចិត្តពីប្រជាជន ពិសេសអំឡុងពេលវិបត្តិជំងឺកូវីដ-១៩។ លោកស្នើឱ្យប្រជាជនទាំងអស់ ផ្ដល់ការគាំទ្រលើលោក វង់ និងក្រុមមេដឹកនាំជំនាន់ថ្មី។

 

ចំណែកលោក វង់ និយាយថា លោកនឹងប្រឹងប្រែងបំពេញការងារដើម្បីប្រទេស និងប្រជាជន។ ក្នុងវីដេអូមួយ លោក វង់ អះអាងថា លោកទទួលយកការទទួលខុសត្រូវជាមេដឹកនាំជាមួយស្មារតីកាតព្វកិច្ច៕