លោក អាត់ ធន់ ប្រធានសហភាពការងារកម្ពុជា (CLC) យល់ឃើញថា គម្រោងជីកព្រែក តភ្ជាប់ប្រព័ន្ធទឹកមួយនេះ ជាគម្រោងល្អ ហើយនឹងក្លាយជាប្រភពទឹកសំខាន់ សម្រាប់ពលរដ្ឋតាមមូលដ្ឋាន អាចធ្វើកសិកម្មបានផងដែរ។ លោកបន្តថា គម្រោងនេះ បម្រើផលប្រយោជន៍គ្រប់វិស័យ សម្រាប់ការដឹកជញ្ជូនទំនិញ។ មេសហជីពរូបនេះ គាំទ្រឱ្យមានការជីកព្រែក និង​អភិវឌ្ឍន៍គម្រោងឱ្យបានលឿន។ ប៉ុន្តែអ្វីដែលលោក ស្នើសុំរដ្ឋាភិបាលនោះ គឺកុំប្រើប្រាស់អំណាចបណ្ដេញពលរដ្ឋដែលរស់នៅទីតាំងអភិវឌ្ឍន៍ចេញ ហើយបើត្រូវឱ្យរុះរើចេញ ក៏ត្រូវផ្ដល់សំណងឱ្យបានសមរម្យ។ 

 

 

ចំណែក លោក ស៊ិន ចន្ធី ប្រធានសមាគមភស្ដុភារកម្មកម្ពុជា ក៏មើលឃើញពីផលចំណេញច្រើន នៃគម្រោងជីកព្រែកហ្វូណនដែរ។ លោកថា គម្រោងនេះនឹងបន្ថយការចំណាយលើការ​ដឹកជញ្ជូន ការកកស្ទះទំនិញ ហើយមិនបណ្ដាលឱ្យខូចខាតផ្លូវ។ ប្រធានសមាគម អះអាងទៀតថា ប្រព័ន្ធផ្លូវថ្មីនេះនឹងជួយបង្កើតឱ្យមានភាពបៃតង តាមបណ្ដោយដងព្រែកផងដែរ។ 

 

រីឯ លោក គង់ មូនីកា សមាជិកព្រឹទ្ធសភាមកពីគណបក្សឆន្ទៈខ្មែរ គាំទ្រលើគម្រោងព្រែកជីកហ្វូណន ដែលជាគម្រោងអភិវឌ្ឍប្រទេសជាតិ។ យ៉ាងណាក៏ដោយ លោកស្នើឱ្យរដ្ឋាភិបាល បង្ហាញផែនការលម្អិតនៃគម្រោងនេះ ដើម្បីភាគីពាក់ព័ន្ធបានដឹងពីផលប្រយោជន៍ និងផលប៉ះពាល់នានា ដូចជាបញ្ហាបរិស្ថាន សំណងពលរដ្ឋ និងផលចំណេញជាដើម។ អ្នកនយោបាយរូបនេះ ក៏សង្ឈឹមថារដ្ឋាភិបាលសិក្សាបានច្បាស់លាស់លើគម្រោងចំណាយ ហើយជៀសវាងកម្ពុជា ធ្លាក់ក្នុងអន្ទាក់បំណុលរបស់ចិន។ 

 

 

សូមជម្រាបថា ការតភ្ជាប់ប្រព័ន្ធទន្លេមេគង្គ និងផ្លូវសមុទ្រនេះ មានប្រវែងសរុប ១៨០ គីឡូម៉ែត្រ។ គម្រោងជីកព្រែកនេះ រដ្ឋគ្រោងចំណាយ ១ ៧០០លានដុល្លារ គឺរដ្ឋមិនមែនខ្ចីលុយបរទេសមកសាងសង់នោះទេ។ គម្រោងនេះ ស្ថិតនៅក្នុងទម្រងវិនិយោគ BOT (កិច្ចសន្យាសាងសង់-ធ្វើអាជីវកម្ម-ផ្ទេរ) ដូចគ្នានឹងគម្រោងផ្លូវល្បឿនលឿនព្រះសីហនុ និងគម្រោងព្រលានយន្តហោះអន្តរជាតិតេជោក្រុងតាខ្មៅដែរ។

 

ព្រែកហ្វូណន ឆ្លងកាត់ខេត្តចំនួន៤ ខេត្តកណ្តាល ខេត្តតាកែវ ខេត្តកំពត និងខេត្តកែប ដែលមានពលរដ្ឋសរុប ១,៦លាននាក់ រស់នៅអមសងខាងព្រែកជីក។ ​ព្រែកនេះ មានប្រវែងទទឹងខាងលើ ១០០ម៉ែត្រ, ទទឹងខាងក្រោម ៨០ម៉ែត្រ និងជម្រៅ ៥,៤ ម៉ែត្រ (ជម្រៅនាវា ៤,៧ ម៉ែត្រ)៕