កីឡាអន្តរជាតិ
អន្តរជាតិ
លោក Loew និងលោក Klinsmann នឹងជួបគ្នាក្នុងពេលអាល្លឺម៉ង់ ប៉ះសហរដ្ឋអាមេរិក
× មិត្តភាពនឹងត្រូវទុកមួយឡែកក្នុងការប្រកួត World Cup នៅរាត្រីថ្ងៃព្រហស្បតិ៍នេះ នៅពេលដែលក្រុមបាល់ទាត់ជម្រើសជាតិសហរដ្ឋអាមេរិករបស់លោក JurgenKlinsmannត្រូវជួបជាមួយនឹងក្រុមជម្រើសជាតិអាល្លឺម៉ង់របស់លោក Joachim Loew ដើម្បីដណ្តើមតំណែងលេខ១ក្នុងពូល G។
ក្រោយពីជួបគ្នាក្នុងវគ្គបណ្តុះបណ្តាលគ្រូបង្វឹក លោក Loew បានក្លាយជាគ្រូបង្វឹកជំនួយរបស់លោក Klinsmann កាលពីរយៈពេល១០ឆ្នាំកន្លងទៅ ដែលនៅពេលនោះគ្រូបង្វឹកទាំងពីរត្រូវបានផ្តល់តំណែងក្នុងក្រុមជម្រើសជាតិ ក្រោយពីការទទួលបានលទ្ធផលដ៏ខកចិត្តក្នុងព្រឹត្តិការណ៍ Euro ឆ្នាំ២០០៤ ខណៈដែលក្រុមបាល់ទាត់ជម្រើសជាតិអាល្លឺម៉ង់ បានបញ្ចប់ការប្រកួតចែកពូលដោយមិនស្គាល់ជ័យជម្នះសោះ។
ក្រោមការដឹកនាំរបស់ពួកគេ អាល្លឺម៉ង់ បានក្លាយជាក្រុមដែលមានភាពមុតស្រួចក្នុងការតំបន់ប្រយុទ្ធ ខណៈដែលកីឡាករវ័យក្មេងប្រកបដោយទេពកោសល្យដូចជា Lukas Podolskiនិង Bastian Schweinsteiger ត្រូវបានផ្តល់ឱកាសឲ្យចូលលេង។ ប៉ុន្តែ បច្ចុប្បន្ន ពួកគេនឹងត្រូវជួបគ្នាក្នុងកីឡដ្ឋាន Arena Pernambucoក្នុងទីក្រុង Recife ក្នុងនាមជាគូបដិបក្ខ ខណៈដែលក្រុមទាំងពីរមានបួនពិន្ទុដូចគ្នា។
ស្របពេលជាមួយគ្នានេះ ក្រុមបាល់ទាត់ជម្រើសជាតិព័រទុយហ្គាល់របស់ខ្សែប្រយុទ្ធ Cristiano Ronaldo នឹងប្រឈមមុខនឹងការធ្លាក់ចេញត្រឹមជុំទី១នៃយុទ្ធនាការ World Cup នៅរាត្រីនេះ បើទោះបីកីឡាករឆ្នើមប្រចាំឆ្នាំរបស់ពិភពលោករបស់ពួកគេបង្ហាញពីភាពអស្ចារ្យក្នុងការប្រកួតចុងក្រោយរបស់ពួកគេក្នុងពូល G ជាមួយនឹងក្រុមបាល់ទាត់ជម្រើសជាតិហ្គាណាក៏ដោយ។
កីឡាកររបស់ក្លិប Real Madrid រូបនេះ បានឈានជើងទៅប្រកួត World Cup រួមជាមួយនឹងខ្សែប្រយុទ្ធ Lionel Messi របស់អាហ្សង់ទីន និង Neymar របស់ប្រេស៊ីល ក្នុងនាមជាតារាឆ្នើមម្នាក់ក្នុងចំណោមតារាឆ្នើមៗផ្សេងទៀតរបស់ពិភពលោក។ ក្រុមបាល់ទាត់ជម្រើសជាតិព័រទុយហ្គាល់ ដែលមានចំណាត់ថ្នាក់លេខ៤នៅលតារាងរបស់ FIFA នោះ កំពុងតែស្ថិតនៅបាតតារាងនៃពូល G ដោយមាន១ពិន្ទុពីការប្រកួតរបស់ពួកគេជាមួយនឹងក្រុមអាមេរិក និងអាល្លឺម៉ង់។ ការបញ្ចប់ត្រឹមលទ្ធផលស្មើក្នុងការប្រកួតរវាងក្រុមអាមេរិក និងអាល្លឺម៉ង់ នឹងធ្វើឲ្យហ្គាណា និងព័រទុយហ្គាល់ ត្រូវត្រឡប់ទៅផ្ទះវិញ៕
កម្មវិធីប្រកួតនៅរាត្រីនេះ
Portugal v Ghana –11 យប់
USA v Germany –11 យប់
Algeria v Russia – 3 ទៀបភ្លឺ
South Korea v Belgium – 3 ទៀបភ្លឺ
ប្រែសម្រួលដោយ ផេង សំណាង
© រក្សាសិទ្ធិដោយ thmeythmey.com