លោក Bung Mokhtar Radin សមាជិកម្នាក់នៃក្រុមប្រឹក្សាជាតិជាន់ខ្ពស់ម៉ាឡេស៊ីមកពីគណបក្ស United Malays National Organisation (UMNO) នៅថ្ងៃព្រហស្បតិ៍នេះ បានសម្តែងការសុំទោសចំពោះប្រជាជនអាល្លឺម៉ង់ ចំពោះការសរសេរទាក់ទងនឹងឈ្មោះមេដឹកនាំណាស៊ី ហ៊ីត្លែរ ក្រោយក្រុមកីឡាបាល់ទាត់ជម្រើសជាតិអាល្លឺម៉ង់បានទទួលជ័យជម្នះ ៧-១ លើប្រេស៊ីលនាការប្រកួតវគ្គពាក់កណ្តាលផ្តាច់ព្រ័ត្រ World Cup ឆ្នាំ២០១៤ ។
កាលពីព្រឹកថ្ងៃព្រហស្បតិ៍ បន្ទាប់ពីបានមើលឃើញពីជ័យជម្នះដ៏មិនស្មានដល់របស់អាល្លឺម៉ង់លើប្រេស៊ីល លោក Bun បានសរសេរនៅលើគណនី Twitter របស់ខ្លួនថា៖ «WELL DONE..BRAVO…LONG LIVE HITLER…»។ ការសរសេរបែបនេះ ទទួលរងនូវការរិះគន់យ៉ាងខ្លាំងពីមហាជនដែលក្នុងនោះ រួមបញ្ចូលទាំងលោកនាយករដ្ឋមន្ត្រី Najib Razak ផងដែរ។
លោក Najib បានសរសេរនៅលើ Twitter របស់ខ្លួនដែរថា៖ «ការសរសេររបស់ Datuk Bung Moktar គឺមិនអាចទទួលយកបាន និងខុស។ គាត់នឹងដកវាចេញ»។ ជាមួយគ្នាផងដែរ ស្ថានទូតអាល្លឺម៉ង់ប្រចាំប្រទេសម៉ាឡេស៊ី បានចេញសេចក្តីថ្លែងការណ៍មួយដោយបានសរសេរថា៖ «ខណៈដែលរីករាយចំពោះការកោតសរសើរដល់ក្រុមកីឡាបាល់ទាត់ជម្រើសជាតិអាល្លឺម៉ង់ យើងសូមច្រានចោលទាំងស្រុងចំពោះការលើកដែលមិនអាចទទួលយកបាន តាមរយៈការភ្ជាប់ទៅនឹងរបបហ្វាស៊ីល Adolf Hitler»។
ក្រោយការរិៈគន់ និងការជេរនានា លោក Bung បានសរសេរនៅលើ Twitter ដដែលដើម្បីសម្តែងការសុំទោសចំពោះពលរដ្ឋអាល្លឺម៉ង់ ដោយលោកអះអាងជាកំហុសអចេតនា។ លោកបានសរសេរយ៉ាងដូច្នេះថា៖ « When Germany whacked Brazil, I unintentionally said something that hurt d feeling of d ppl in Germany.MY SINCEREST APPOLOGY.LONG LIVE BUNG..»៕