កីឡាអន្តរជាតិ
អន្តរជាតិ
អាល្លឺម៉ង់ប៉ះអាហ្សង់ទីនដើម្បីដណ្តើមពាន រីឯប្រេស៊ីល និងហូឡង់បានត្រឹមប្រជែងយកលេខបី
× ការប្រកួតកីឡាបាល់ទាត់ដណ្តើមពានរង្វាន់ពិភពលោក(FIFA World Cup) ឆ្នាំ២០១៤នៅក្នុងប្រទេសប្រេស៊ីលត្រូវឈានដល់ដំណាក់កាលចុងក្រោយហើយដោយអាល្លឺម៉ង់ និងអាហ្សង់ទីនត្រូវប្រជែងគ្នាយកជើងឯក ខណៈម្ចាស់ផ្ទះប្រេស៊ីលនិងហូឡង់ប៉ះគ្នាដើម្បីដណ្តើមចំណាត់ថ្នាក់លេខបី។
ស្តាប់សំឡេង
ក្រុមកីឡាបាល់ទាត់ជម្រើសជាតិអាល្លឺម៉ង់និងអាហ្សង់ទីនមានឱកាសជួបគ្នាជាលើកទី៧ក្នុងព្រឹត្តិការណ៍ World Cup ហើយក៏ជាលើកទីបីផងដែរដែលក្រុមខ្លាំងនៅតំបន់អឺរ៉ុប និងអាមេរិកឡាទីន ត្រូវប៉ះគ្នានៅវគ្គផ្តាច់ព្រ័ត្រ។ មុននឹងឈានដល់ដំណាក់កាលនេះ អាល្លឺម៉ង់ បានទទួលជ័យជម្នះដ៏មិននឹកស្មានដល់លើម្ចាស់ផ្ទះប្រេស៊ីលក្នុងលទ្ធផល ៧-១ មុនពេលដែលអាហ្សង់ទីនបានយកឈ្នះហូឡង់ដោយការទាត់បាល់ប៉េណាល់ទី ក្រោយការប្រកួត១២០នាទីពេញដែលគ្មានការស៊ុតបាល់បញ្ចូលទី។
នាជំនួបវគ្គផ្តាច់ព្រ័ត្រពីរលើកកន្លងមក អាហ្សង់ទីនបានយកឈ្នះអាល្លឺម៉ង់ខាងលិចក្នុងលទ្ធផល ៣-២ ក្នុងឆ្នាំ១៩៨៦ នៅប្រទេសម៉ិកស៊ិក ហើយបួនឆ្នាំក្រោយមក អាល្លឺម៉ង់ខាងលិច ដណ្តើមបានពានវិញជាមួយនឹងជ័យជម្នះ ១-០ នៅប្រទេសអ៊ីតាលី។
សម្រាប់ព្រឹត្តិការណ៍ World Cup ក្រុមជម្រើសជាតិអាល្លឺម៉ង់ បានឈានទៅកាន់វគ្គផ្តាច់ព្រ័ត្រ៧លើករួចមកហើយ ដែលក្នុងនោះ ពួកគេបានឈ្នះពានចំនួនបីលើកគឺក្នុងឆ្នាំ១៩៥៤ ឆ្នាំ១៩៧៤ និងឆ្នាំ១៩៩០ ខណៈអាហ្សង់ទីនបានឈានមកដល់វគ្គនេះចំនួន៤លើក ជាមួយនឹងការឈ្នះពាន២លើក នាឆ្នាំ១៩៧៨ និងឆ្នាំ១៩៨៦ ។
ប្រសិនបើអាល្លឺម៉ង់ទទួលជ័យជម្នះនោះ វានឹងក្លាយជាការទទួលបានពាន World Cup ជាលើកដំបូង បើគិតចាប់តាំងពីការដួលរលំនៃជញ្ជាំងប៊ែរឡាំង ដែលនាំឲ្យមានការបង្រួបបង្រួមគ្នារវាងអាល្លឺម៉ង់ខាងលិច និងអាល្លឺម៉ង់ខាងកើត នាថ្ងៃទី៣ ខែតុលា ឆ្នាំ១៩៩០ ។
ស្របពេលដែលអាហ្សង់ទីនស្វែងរកឱកាសលើកពានជាលើកទីបីក្នុងនាមជាក្រុមដ៏ជោគជ័យទីពីរប្រចាំតំបន់អាមេរិកឡាទីន បន្ទាប់ពីប្រេស៊ីលនោះ អាល្លឺម៉ង់ចង់ក្លាយជាក្រុមអឺរ៉ុបទីមួយដែលឈ្នះពាននៅលើទឹកដីអាមេរិកឡាទីន។ អាហ្សង់ទីនមិនអាចបំភ្លេចបានឡើយនាជំនួបជាមួយអាល្លឺម៉ង់ដែលបានទម្លាក់ពួកគេចេញពីវគ្គ១/៤ផ្តាច់ព្រ័ត្រនាពីរលើកចុងក្រោយកន្លងមកនេះ ពោលគឺក្នុងឆ្នាំ២០០៦ និងឆ្នាំ២០១០ បើទោះបីជាក្រុមនៅតំបន់អាមេរិកឡាទីនមួយនេះ បានយកឈ្នះ ៣-១ ក្នុងការប្រកួតមិត្តភាពកាលពីខែសីហា ឆ្នាំ២០១២ កន្លងមកក៏ដោយ។
ក្នុងចំណោមកីឡាករដែលមានវត្តមាននៅប្រទេសប្រេស៊ីលនាឆ្នាំ២០១៤នេះ កីឡាករមួយចំនួននៃក្រុមទាំងពីរធ្លាប់បានបង្ហាញខ្លួនរួចទៅហើយនាជំនួបពីរលើកកន្លងមក គឺនៅឆ្នាំ២០០៦ និង២០១០ ។ ខ្សែប្រយុទ្ធអាល្លឺម៉ង់ Moroslav Klose ដែលទើបបានបំបែកកំណត់ត្រាថ្មីក្នុងនាមជាស៊ុតបាល់បញ្ចូលទីច្រើនជាងគេនៅ World Cup ដែលមានរហូតដល់ទៅ១៦គ្រាប់នោះ ធ្លាប់បានទម្លាយសំណាញ់ទីរបស់អាហ្សង់ទីន១គ្រាប់ក្នុងឆ្នាំ២០០៦ និង២គ្រាប់ទៀតនៅឆ្នាំ២០១០ ។
លោកស្រីប្រធានាធិបតីប្រេស៊ីល Dilma Rouseff បានអញ្ជើញថ្នាក់ដឹកនាំនៃក្រុមប្រទេសដែលកំពុងមានឧស្សាហកម្មរីកលូតលាស់ថ្មី ហៅថាកាត់ថា BRICS ក្នុងនោះមានប្រេស៊ីល រុស្ស៊ី ឥណ្ឌា ចិននិងអាហ្វ្រិកខាងត្បូងឲ្យចូលរួមទស្សនាការប្រកួតវគ្គផ្តាច់ព្រ័ត្រ។ តារាបង្ហាញម៉ូតប្រេស៊ីល Gisele Bundchen និងកីឡាករអេស្ប៉ាញ Carles Puyol នឹងយកពានទៅដាក់បង្ហាញនៅមុនការប្រកួត ខណៈលោកស្រី Rouseff នឹងទទួលភារជាអ្នកប្រគល់ពានដល់ក្រុមដែលទទួលបានតំណែងជើងឯក។
នៅមុនជំនួបវគ្គផ្តាច់ព្រ័ត្រ ក្រុមម្ចាស់ផ្ទះប្រេស៊ីលដែលធ្លាប់ឈ្នះជើងឯក៥សម័យកាលនោះ ត្រូវតទល់ជាមួយហូឡង់ដើម្បីដណ្តើមយកចំណាត់ថ្នាក់លេខបីនៅក្នុងទីក្រុង Brasilia នាវេលាម៉ោង៣យប់ថ្ងៃសៅរ៍ ឈានចូលថ្ងៃអាទិត្យ (ម៉ោងនៅក្នុងប្រទេសកម្ពុជា) ខណៈជំនួបផ្តាច់ព្រ័ត្រនឹងប្រព្រឹត្តិទៅនៅកីឡដ្ឋាន Maracana ក្នុងទីក្រុង Rio de Janeiro នាវេលាម៉ោង២យប់ ថ្ងៃអាទិត្យ ឈានចូលថ្ងៃចន្ទ។
ដោយឡែកនៅក្នុងប្រទេសកម្ពុជា សហភាពសហព័ន្ធយុវជនកម្ពុជា ក្រោមកិច្ចសហការជាមួយសាលារាជធានីភ្នំពេញនឹងរៀបចំកម្មវិធីមួយដែលមានឈ្មោះថា «កម្មវិធីគ្រួសារបាល់ទាត់ពិភពលោក» ដោយកម្មវិធីនេះធ្វើឡើងដើម្បីអបអរជំនួបវគ្គផ្តាច់ព្រ័ត្ររវាងអាល្លឺម៉ង់ និងអាហ្សង់ទីន ផងដែរ។ កម្មវិធីដែលមានការប្រគំតន្ត្រី និងការលេងល្បែងកំសាន្តនោះត្រូវចាប់ផ្តើមពីវេលាម៉ោង៩យប់ រហូតដល់ម៉ោង៥ទៀបភ្លឺដោយអ្នករៀបចំកម្មវិធីអំពាវនាវឲ្យមានការចូលរួមដោយសេរីនៅសួនច្បារ តេជោមាស តេជោយ៉ត មុខវត្តឧណ្ណាលោម៕
© រក្សាសិទ្ធិដោយ thmeythmey.com