ជាតិ
សង្គមជាតិ
កូនលោក ចាន់ សុវ៉េតអាចប្រឈមនឹងបោះបង់ការសិក្សាបើគ្មានជំនួយ
×
ខណៈដែលសាកសពលោក ចាន់ សុវ៉េត កំពុងតម្កល់ទុកធ្វើបុណ្យនៅក្នុងវត្តនិគ្រោធវន្ត ខណ្ឌមានជ័យ ភរិយារបស់លោក ចាន់ សុវ៉េត បានបង្ហាញពីក្តីកង្វល់ស្ថានភាពគ្រួសារខ្លួននៅពេលដែលមិនមានមេគ្រួសារ។ លោកស្រី ប៊ី សុភាព អាយុ ៤៥ ភរិយាលោក ចាន់ សុវ៉េត បានត្អូញត្អែរថា កូន ៣ នាក់របស់គាត់ អាចប្រឈមនឹងបោះបង់ការសិក្សា ប្រសិនបើគ្មានជំនួយពីសប្បុរជននោះទេ ពីព្រោះថា កន្លងមកគ្រួសាររបស់លោកស្រី ពឹងផ្អែកតែទៅលើចំណូលរបស់ប្តីខ្លួនតែប៉ុណ្ណោះ។
សូមស្តាប់លោក ជា ធីរិទ្ធ!
ស្រពពេលដែលចិត្តមួយចំណែក កំពុងសោកសង្រេងប៉ុនភ្នំនៅពេលដែលប្តីរបស់ខ្លួនលាចាកលោកចោលនោះ លោកស្រី ប៊ី សុភាព ភរិយារបស់លោក ចាន់ សុវ៉េត ក៏កំពុងរួតរឹតដោយក្តីកង្វល់បន្ថែមទៀតចំពោះអនាគតកូនៗទាំង ៣ របស់ខ្លួនដែរ ។ កូនទាំង ៣ របស់សកម្មជនសិទ្ធិមនុស្សដែលបានមរណកាលទៅនោះ កំពុងតែស្ថិតនៅក្នុងវ័យសិក្សានៅឡើយ។ លោកស្រី សុភាព ត្អួញត្អែរថា កូនរបស់ខ្លួនអាចប្រឈមនឹងបោះការសិក្សា ប្រសិនបើគ្មានអ្នកឧបត្ថម្ភ នៅពេលដែលអត់ពីប្តីរបស់ខ្លួនទៅ។
ស្ត្រីអាយុ ៤៥ ឆ្នាំរូបនេះ បានរៀបរាប់ថា នាពេលកន្លងមករាល់ការចំណាយក្នុងគ្រួសារទាំងអស់ គឺពឹងផ្អែកទៅលើប្រាក់ខែរបស់ប្តីខ្លួនទាំងស្រុង ហើយលោកស្រី គ្មានការងារធ្វើ ក្រៅពីនៅផ្ទះមើលថែកូនតែប៉ុណ្ណោះ។ ភរិយារបស់លោក ចាន់ សុវ៉េត រូបនេះ បានអំពាវនាវឲ្យសប្បុរសជន និងអង្គការក្រៅរដ្ឋាភិបាលជួយឧបត្ថម្ភដល់គ្រួសារខ្លួន ជាពិសេសគឺជួយឲ្យកូនៗទាំង ៣ របស់លោកស្រី បានបន្តការសិក្សាទៅមុខទៀត ដើម្បីឲ្យសាកសមនឹងការលះបង់របស់ប្តីខ្លួន ក្នុងបុព្វហេតុសិទ្ធិមនុស្ស និងជាតិមាតុភូមិ។
ទាក់ទងនឹងបញ្ហានេះ នៅក្នុងពិធីបុណ្យសពលោក ចាន់ សុវ៉េត នោះដែរ លោក ធន់ សារ៉ាយ ប្រធានសមាគមការពារសិទ្ធិមនុស្ស អាដហុក បានអះអាងថា អង្គការរបស់លោក នឹងជួយជ្រោមជ្រែងក្រុមគ្រួសារ ជាពិសេសកូនទាំង ៣ របស់លោក ចាន់ សុវ៉េត ឲ្យអស់ពីលទ្ធភាព។ លោកថា សម្រាប់ពិធីបុណ្យសពលោក ចាន់ សុវ៉េត នៅពេលនេះ គឺសមាគមលោក ជាអ្នករៀបចំ មិនឲ្យក្រុមគ្រួសារសពលោក ចាន់ សុវ៉េត លំបាកនោះឡើយ។
សម្រាប់លោក ធន់ សារ៉ាយ ការបាត់បង់លោក ចាន់ សុវ៉េត គឺជាការសោកស្តាយគ្មានអ្វីអាចប្រៀបបានចំពោះប្រទេសជាតិ ជាពិសេសសម្រាប់សមាគមការពារសិទ្ធិមនុស្ស អាដហុក ។ លោកថា សមាគមរបស់លោក ពិបាកនឹងរកមនុស្សឲ្យមានសមត្ថភាពប្រហាក់ប្រហែលលោក ចាន់ សុវ៉េត មកធ្វើការជំនួសតួនាទីជាអនុប្រធានស៊ើបអង្កេតផ្នែកសិទ្ធិមនុស្សរបស់សកម្មជនដ៏ល្បីល្បាញរូបនេះណាស់។
សូមបញ្ជាក់ថា នៅក្នុងពិធីបុណ្យសពលោក ចាន់ សុវ៉េត ដែលប្រារព្ធធ្វើនៅវត្តនិគ្រោធវន្ត ហៅគល់ទទឹង ស្ថិតនៅក្នុងសង្កាត់ព្រែកថ្មី ខណ្ឌមានជ័យនៅថ្ងៃនេះ មានការចូលរួមពីមន្ត្រីអង្គការក្រៅរដ្ឋាភិបាល អ្នកកាសែត ស្ទើរគ្រប់ស្ថាប័ន ។ ប្រធាន អនុប្រធាន គណបក្សសង្គ្រោះជាតិ គឺលោក សម រង្ស៊ី និងលោក កឹម សុខា ក៏ចូលរួមគោរពវិញ្ញាណខន្ធលោក ចាន់ សុវ៉េត នៅថ្ងៃព្រហស្បតិ៍នេះផងដែរ។ ទាំងលោក សម រង្ស៊ី និងលោក កឹម សុខា សុទ្ធតែចាត់ទុកលោក ចាន់ សុវ៉េត គឺជាវីរៈជនការពារសិទ្ធិមនុស្ស ដែលគួររៀនសូត្រតាម៕
© រក្សាសិទ្ធិដោយ thmeythmey.com