ជាតិ
សង្គមជាតិ
កម្ពុជាចែករំលែកបញ្ហាអនាម័យជនបទដល់ប្រទេសមានការអភិវឌ្ឍន៍តិចតួច
× សៀមរាប៖ កិច្ចប្រជុំថ្នាក់តំបន់ រវាងប្រទេសក្នុងទ្វីបអាស៊ីប៉ាស៊ីហ្វិក ដែលមានការអភិវឌ្ឍន៍តិចតួច មានប្រទេសចំនួន៨ ចូលរួម។ ជាសមាជិកមួយរូប ប្រទេសកម្ពុជា គ្រោងនឹងលើកបញ្ហាអនាម័យនៅតាមទីជនបទ ដែលកម្ពុជាសម្រេចបាននាពេលកន្លង ដើម្បីចែករំលែកដល់ប្រទេសចំនួន៧ទៀត ឲ្យបានដឹង និងរៀនពីបទពិសោធន៍មួយចំនួន។
ប្រទេសមានការអភិវឌ្ឍន៍តិចតួចចំនួន៨ បានមកជួបប្រជុំពិភាក្សាគ្នានៅព្រឹកថ្ងៃព្រហស្បតិ៍នេះ ដើម្បីចែករំលែកបទពិសោធន៍ជោគជ័យ និងរកទិសដៅសហសវត្សរ៍ សម្រាប់អភិវឌ្ឍន៍ប្រទេស នាពេលអនាគត។ កិច្ចប្រជុំថ្នាក់តំបន់ ស្តីពី ការសម្របសម្រួលរវាងស្ថាប័ន គោលនយោបាយឆ្លងវិស័យ ដើម្បីសម្រេចបានទិសដៅអភិវឌ្ឍសហសវត្សរ៍។
លោក លី ផុច ទេសរដ្ឋមន្ត្រី និងជាប្រធានគណៈកម្មការជាតិ Escap បាននិយាយថា កម្ពុជាបានត្រៀមរបៀបវារៈចំនួន២ សម្រាប់ចែករំលែកដល់បណ្តាប្រទេសដែលគេមើលឃើញថា មានការរីកចម្រើនយឺតជាងកម្ពុជា។ របៀបវារៈទាំងនោះ រួមមាន បញ្ហាអនាម័យនៅតាមទីជនបទ និងមួយទៀត គឺការទំនាក់ទំនងរវាងស្ថាប័នមួយទៅស្ថាប័នមួយ ដែលរដ្ឋាភិបាលកម្ពុជាបានអនុវត្តន៍នាពេលកន្លងមក។
ក្រៅពីកម្ពុជា ប្រទេសជាសមាជិកផ្សេងទៀតក៏គ្រោងនឹងចែករំលែក របៀបគ្រប់គ្រងក្នុងប្រទេសពួកគេ ដល់ប្រទេសជាសមាជិកបានដឹងផងដែរ ដូចជាប្រទេសនេបាល់ នឹងចែករំលែកពីវិស័យសុខាបាល។ គោលបំណងសំខាន់ នៃកិច្ចប្រជុំនេះ គឺដើម្បីផ្សព្វផ្សាយ នូវរបកគំហើញថ្មីៗ និងរៀបចំយុទ្ធសាស្ត្រ វិភាគ ឆ្លងវិស័យ ដើម្បីឲ្យគំលាតការអភិវឌ្ឍន៍តិចតួច មានការរួមតូច ឫថយចុះ។
គួររំលឹកថា កិច្ចប្រជុំនេះ មានរយៈពេល២ថ្ងៃ នៅខេត្តសៀមរាប ដែលរៀបចំឡើងដោយ គណៈកម្មការសេដ្ឋកិច្ច និងសង្គមកិច្ចប្រចាំតំបន់អាស៊ីប៉ាស៊ីហ្វិក ហៅកាត់ថា Escap។ តំណាងប្រទេសដែលចូលរួមមាន ប្រទេសកម្ពុជា អាហ្វហ្គានីដ្ឋាន នេបាល់ បង់ក្លាដែស ឡាវ មីយ៉ាន់ម៉ា អេសទីម៉រ និងប៊ូដ្ឋាន (Bhutan) ៕
© រក្សាសិទ្ធិដោយ thmeythmey.com