អន្តរជាតិ
វៀតណាមទទួលនាវាមុជទឹកទីបីពីរុស្ស៊ីក្នុងខែនេះ
× កាលពីប៉ុន្មានខែមុននេះវៀតណាមបានទទួលនាវាមុជទឹក២គ្រឿងរូចទៅហើយពីរដ្ឋាភិបាលក្រុងម៉ូស្គូ ហើយកាលពីសប្តាហ៍មុននេះមន្ត្រីរដ្ឋាភិបាលក្រុងហាណូយបានបង្ហើបថា នាវាមុជទឹកទីបីទើបតែចេញដំណើរពីរុស្ស៊ីឆ្ពោះមកកំពង់ផែវៀតណាមកាលពីសប្តាហ៍មុន។ នៅថ្ងៃសៅរ៍ម្សិលមិញនាវាមុជទឹកមួយគ្រឿងរបស់វៀតណាមបានទៅដល់កំពង់ផែយោធាត្រៀមរៀបចំពិធីខួបលើកទី៧០នៃកងទ័ពប្រជាជនវៀតណាមនៅថ្ងៃស្អែកនេះ។
វៀតណាមបានទទួលនាវាមុជទឹកមួយគ្រឿងថ្មីទៀតពីសហព័ន្ធរុស្ស៊ី ក្រោមកិច្ចព្រមព្រៀងមានតម្លៃប្រមាណ២ពាន់លានដុល្លារអាមេរិកដែលភាគីទាំងពីរបានចុះតាំងពីឆ្នាំ២០០៩ ។ មន្ត្រីរដ្ឋាភិបាលវៀតណាមបានអោយដឹងថា នាវាមុជទឹកទីបីត្រូវបានបញ្ជូនចេញពីរុស្ស៊ីកាលពីសប្តាហ៍មុន ក្រោយពេលដែលភាគីទាំងពីរបានចុះហត្ថលេខាលើលិខិតស្នាមបន្ទាប់បន្សំមួយចំនួនទាក់ទងការមើលថែទាំ និងជួសជុលនាវានៅទីក្រុង St. Petersburg។
យ៉ាងណាក៏នៅថ្ងៃសៅរ៍ម្សិលមិញគេឃើញវត្តមាននាវាមុជទឹកមួយគ្រឿងនៅក្នុងកំពង់ផែយោធា ដោយនាវាថ្មីនេះត្រៀមខ្លួនសម្រាប់ចូលរួមពិធីខួបលើកទី៧០នៃការបង្កើតកងកម្លាំងប្រជាជនវៀតណាមនៅថ្ងៃស្អែក។ បើតាមការអោយដឹងពីមន្ត្រីយោធាវៀតណាម នាវាមុជទឹកថ្មីមានឈ្មោះថា HQ183 Hai Phong បានចាកចេញពីរុស្ស៊ីនៅថ្ងៃ ១០ ធ្នូ ហើយឆ្ពោះទៅកាន់កំពង់ផែយោធា Cam Ranh នៅវៀតណាមកណ្តាល ដែលជាទីកន្លែងដែលនាវាមុជទឹកពីទៀត HQ182 Hanoi និង HQ183 Ho Chi Minh City កំពុងសំចតនៅ។ នាវាចម្បាំងថ្មីទីបីនេះត្រូវបានគេចាប់ផ្តើមសាងសង់នៅក្នុងឆ្នាំ ២០១២ ហើយគេចំណាយពេល១៧ខែសម្រាប់ការសាងសង់នេះ ប៉ុន្តែនៅខែមិនានាវានេះស្ថិតក្នុងការសាកល្បងជាចុងក្រោយ។
ចំណែកនាវាមុជទឹកទីបួន ទើបតែដាក់សាកល្បអោយប្រតិបត្តិការតាមសមុទ្រកាលពីខែពាក់កណ្តាលខែមិថុនា ហើយនាវាទីប្រាំនឹងចាប់ផ្តើមបញ្ចេញអោយសាកល្បងនៅខែមិនាឆ្នាំក្រោយ និងទី៦ គេនឹងចាប់ផ្តើមសាងសង់នៅខែឧសភាឆ្នាំក្រោយនេះ។ វៀតណាមបានចំណាយលុយយ៉ាងច្រើនសន្ធឹកសន្ធាប់ដើម្បីធ្វើទំនើបកម្មយោធា ហើយក្រុងហាណូយនេះបានទិញសព្វាវុធជាច្រើនរួមទាំងយន្តហោះចម្បាំង និងនាវាមុជទឹកជាច្រើនគ្រឿងពីរដ្ឋាភិបាលក្រុងម៉ូស្គូប៉ុន្មានឆ្នាំចុងក្រោយនេះ។ ការធ្វើទំនើបកម្មយោធា ដោយពង្រីកថវិកាយោធា និងទិញសព្វាវុធទំនើបៗច្រើនសន្ធឹកសន្ធាប់នេះ ត្រូវបានគេមើលឃើញថាជាការត្រៀមលក្ខណៈទប់ទល់ជាមួយមហាយក្សចិនដែលកំពុងកោងកាចក្នុងជម្លោះសមុទ្រចិនខាងត្បូងជាមួយខ្លួន។
បើទោះជាវៀតណាមមាននាវាចម្បាំង ឬនាវាមុជទឹកតិចណាស់បើប្រៀបនឹងចិន វាក៏អាចមានលទ្ធភាពធ្វើអោយចិនញរញើត និងមិនអាចបន្តធ្វើអ្វីតាមអំពើចិត្តដូចមុនឡើយ។ គួរបញ្ជាក់ថា នាវាមុជទឹកដែលវៀតណាមទិញពីរុស្ស៊ីនេះមានទម្ងន់ ២៣០០តោន ដឹកមនុស្សបានជិត៦០នាក់ មុជទឹកបានជម្រៅ ៣០០ម៉ែត្រ ព្រមទាំងធ្វើដំណើរបានចម្ងាយ ៦ពាន់ទៅ ៧៥០០ម៉ាល៍ ក្នុងរយៈពេល៤៥ថ្ងៃឥតឈប់។ ក្រៅពីនេះនាវានេះមានបំពាក់សព្វាវុធទំនើបៗជាច្រើនមានទាំងកាំជ្រួចមីស៊ីលបាញ់យន្តហោះរយៈម្ងាយឆ្ងាយ កាំជ្រួចការពារអាកាស និងបាញ់យន្តហោះជាដើម៕
© រក្សាសិទ្ធិដោយ thmeythmey.com