អន្តរជាតិ
មនុស្ស១០០នាក់ត្រូវប្រហារជីវិតព្រោះចង់ចាកចេញពីក្រុមរដ្ឋឥស្លាម
× កងកម្លាំងសកម្មប្រយុទ្ធបរទេស ១០០នាក់ត្រូវបានកងកម្លាំងក្រុមឧទ្ទាមរដ្ឋឥស្លាមកាត់ទោសប្រហារជីវិតដោយសារតែពួកគេចង់រត់ចោលជួរ។ ការលើកឡើងពីការសម្លាប់រង្គាលនេះកងកម្លាំងចង់រត់ចោលជួរនេះ កើតឡើងស្របពេលដែលសហរដ្ឋអាមេរិកលើកឡើងពីជ័យជំនះបរស់ខ្លួនក្នុងការកម្ចាត់ក្រុមភេរវជនរដ្ឋឥស្លាមដោយសង្គ្រាមផ្លូវអាកាស។
របាយការណ៍មួយបានបញ្ជាក់ថា កងកម្លាំងសកម្មប្រយុទ្ធបរទេសប្រហែល ១០០នាក់ត្រូវបានកងកម្លាំងរដ្ឋសឥស្លាមសម្លាប់ចោលដោយសារពួកគេមានចេតនារត់ចោលជួរ និងទម្លាក់អាវុធឈប់ប្រយុទ្ធទៀត។ កងម្លាំងក្រុមភេរវជនរដ្ឋឥស្លាមបានដែលរងការសម្លាប់រង្គាលដោយសារព្យាយាមរត់ចេញពីក្រុមនោះ ភាគច្រើនមើលឃើញថា ពួកគេកំពុងប្រយុទ្ធដោយគ្មានឈប់ឈរ និងផ្សងព្រេងដើម្បីការស្លាប់តែប៉ុណ្ណោះ។ ពួកគេចង់ចាកចេញពីក្រុមនឹងត្រលប់ទៅកាន់ប្រទេសរបស់ពួកគេវិញ ប៉ុន្តែគ្មានអ្នកណាម្នាក់អាចរួចពីការប្រហារជីវិតឡើយ។
បើតាមអ្នកជំនាញបានអោយដឹងថា ក្រុមឧទ្ទាមរដ្ឋឥស្លាមបានងបង្កើតគោលនយោបាយរបស់ខ្លួនដោយបង្កើតកងកម្លាំងតម្រួតប៉ូលីសដើម្បីឃ្លាំមើល និងដាក់ទណ្ឌកម្មកងកម្លាំងណាមួយដែលគ្មានឆន្ទៈចង់ប្រយុទ្ធបន្តទៀត។ មិនមែនជារឿងចម្លែកឡើយដែលចាំបាច់ត្រូវមានការតាមដានឃ្លាំមើលតឹងរឹងបែបនេះ ព្រោះកងម្លាំងក្រុមឧទ្ទាមរដ្ឋឥស្លាមដែលមកពីប្រទេសចម្រុះបង្ហាញពីការព្រួយបារម្ភនិងខកចិត្តខ្លាំងដោយសារការផ្សងព្រេងប្រយុទ្ធមិនមានផ្លែការអ្វី ក្រៅពីលះបង់ជីវិតនោះ។
ចាប់តាំងពីមានចលនាក្រុមរដ្ឋឥស្លាមនេះផុសឡើង គេវាយតម្លៃថា ចំនួនក្រុមកងកម្លាំងបរទេសដែលបានឆ្លងដែនទៅស៊ីរី និងអ៊ីរ៉ាក់មានសរុបប្រហែល ១១ពាន់នាក់ ដែលមកពីប្រទេស៧៤លើពិភពលោក។ ក្នុងចំណោមកងកម្លាំងបរទេសជាង ១ម៉ឺននាក់ ប្រជាជនមកពីបារាំង អាល្លឺម៉ង និងអង់គ្លេសមានច្រើនជាគេបង្អស់ ហើយប្រទេសទាំងបីនេះ បានប្រើប្រាស់វិធានការតឹងរឹងជាច្រើនដើម្បីការពារបញ្ហាគ្រោះថ្នាក់ដែលបង្កឡើងដោយក្រុមសកម្មប្រយុទ្ធនៅពេលពួកគេត្រលប់មកប្រទេសពួកគេវិញ។
ដោយឡែកកាលពីថ្មីៗនេះ ក្រុងវ៉ាស៊ីនតោនបានប្រកាសថាកងកម្លាំងសម្ព័ន្ធអន្តរជាតិបានសម្រេចជោគជ័យដោយសារការទម្លាក់គ្រាប់បែកបានសម្លាប់ក្រុមសកម្មប្រយុទ្ធជាច្រើននាក់ ក្នុងនោះមានមេដឹកនាំជាន់ខ្ពស់របស់ពួកគេផង។ ការសម្លាប់បានមេដឹកនាំជាន់ខ្ពស់ក្រុមនេះ អាចធ្វើអោយក្រុមកាន់តែទន់ខ្សោយ និងខ្វះខាតរចនាសម្ព័ន្ធដឹកនាំត្រឹមត្រូវ៕
© រក្សាសិទ្ធិដោយ thmeythmey.com