អន្តរជាតិ
មេដឹកនាំចិនព្រមានហុងកុង និងម៉ាកាវជុំវិញការតវ៉ាទាមទារប្រជាធិបតេយ្យ
× មេដឹកកំពូលក្រុងប៉េកាំងលោក Xi jinping បានព្រមានដល់បណ្តាដែនដីពាក់កណ្តាលស្វយ័តរបស់ខ្លួន ហុងកុង និងម៉ាកាវ ដោយលើកឡើងថាទឹកដីទាំងអស់នេះស្ថិតការគ្រប់គ្រងរបស់ចិន។ មេដឹកនាំខាងលើបានថ្លែងដូច្នេះស្របពេលដែលលោកអញ្ជើញចូលរួមក្នុងកម្មវិធីឡើងកាន់តំណែងរបស់ប្រមុខនីតិប្រតិបត្តិតំបន់ម៉ាកាវ។
ប្រធានាធិបតីចិនលោក ស៊ី ជីនពីង បានព្រមានដល់បណ្តាតំបន់រដ្ឋបាលពិសេសចិនទាំងពីរ ហុងកុង និងម៉ាកាវ ដែលទាមទារចង់បានលទ្ធិប្រជាធិបតេយ្យពេញលេញ ដោយលោកបានលើកឡើងថា ត្រូវចាំថាទឹកដីទាំងអស់ខាងលើស្ថិតក្រោមការគ្រប់គ្រងរបស់ចិនតែមួយ។ លោក ស៊ី ជិនពីង បានថ្លែងដូច្នេះនៅក្នុងពេលដែលោកអញ្ជើញចូលរួមក្នុងអបអរសាទរការឡើងកាន់តំណែងរបស់ប្រមុខនីតិប្រតិបត្តិតំបន់រដ្ឋបាលពិសេសម៉ាកាវ។ប្រមុខអង្គការនីតិប្រតិបត្តិតំបន់ម៉ាកាវលោក Fernando Chui បានជាប់ឆ្នោតសម្រាប់អាណត្តិទីពីរ ដោយសារមេដឹកនាំម្នាក់នេះជាមនុស្សស្និទ្ធ និងគាំទ្ររដ្ឋាភិបាលកុម្មុយនីស្តក្រុងប៉េកាំង។
ចំណែកទាក់ទងនឹងពាក្យសម្តីមេដឹកនាំចិន ការលើកឡើងនេះ ជាការព្រមានដល់បណ្តាក្រុមអ្នកគាំទ្រប្រជាធិបតេយ្យដែលនៅស្ថិតនៅតំបន់ហុងកុង និងម៉ាកាវ ដែលកំពុងស្រែកដង្ហើយរកការបោះឆ្នោតតាមបែបប្រជាធិបតេយ្យពេញលេញនោះ។ កាលពីថ្ងៃសៅរ៍ម្សិលមិញគេក៏ឃើញមានប្រជាជនម៉ាកាវជាច្រើននាក់ប្រមូលផ្តុំគ្នាធ្វើបាតុកម្មតវ៉ានៅកណ្តាលទីក្រុង ស្របពេលដែលលោក ស៊ី ជិនពីង ធ្វើទស្សនកិច្ចពីរថ្ងៃទៅកាន់តំបន់ខាងលើ ហើយចលនាបាតុកម្មនេះកើតឡើងតែប៉ុន្មានថ្ងៃប៉ុណ្ណោះក្រោយប៉ូលីសនៅហុងកុងបោសសម្អាតទីតាំងបាតុកម្មនៅតំបន់ហុងកុង។
ក្មេងប្រុសម្នាក់ជាសិស្សវិទ្យាល័យមានវ័យ១៥ឆ្នាំបានលើកឡើងថា គេមិនអាចដឹងច្បាស់ពីអនាគតតំបន់ម៉ាកាវឡើយ ដូច្នេះគេចាំបាច់ត្រូវចេញមុខដើម្បីតវ៉ា ដើម្បីប្រជាធិបតេយ្យនិងដើម្បីអនាគតទាំងអស់គ្នា។ ក្មេងម្នាក់នេះមានកាន់ឆ័ត្រក្នុងដៃ ដែលជាសញ្ញាបដិវត្តឆ័ត្រគាំទ្រចលនាប្រជាធិបតេយ្យដែលត្រូវបានរៀបចំឡើងនៅក្នុងតំបន់ហុងកុងកន្លងមក។ កាលពីថ្ងៃសុក្រនៅពេលប្រធានាធិបតីចិន អញ្ចើញទៅដល់ សន្តិសុខនៅក្នុងតំបន់ម៉ាកាវត្រូវបានរឹតបន្តឹងយ៉ាងខ្លាំង ហើយអាជ្ញាធរបាន ហាមឃាត់មិនអោយប្រជាជនកាន់ឆ័ត្រឡើយ៕
© រក្សាសិទ្ធិដោយ thmeythmey.com