សង្គមអន្តរជាតិ
អន្តរជាតិ
ថៃចាត់វិធានបញ្ឈប់សកម្មភាពជួញដូរមនុស្សទៅប្រទេសប្រ៊ុយណេ
×
រដ្ឋាភិបាលថៃបានផ្តើមរឹតបន្តឹងច្បាប់ដោយចាត់វិធានការពារនិងទប់ស្កាត់ការជួញដូរមនុស្សដោយខុសច្បាប់ចូលទៅប្រទេសប្រ៊ុយណេ។ចំណាត់ការនេះនឹងត្រូវធ្វើឡើងដោយមានកិច្ចសហប្រតិបត្តិការរវាងថៃនិងប្រ៊ុយណេក្រោយពីមានការកើនឡើងនូវការនាំខ្លួនប្រជាជនថៃខុសច្បាប់ទៅកាន់ប្រទេសប្រ៊ុយណេ។
ក្នុងរយៈពេលថ្មីៗនេះរដ្ឋាភិបាលថៃបានចាប់ផ្តើមរឹតបន្តឹងការអនុវត្តច្បាប់ដើម្បីការពារនិងទប់ស្កាត់នូវបទល្មើសនៃការនាំប្រជាជនថៃដោយខុសច្បាប់ទៅកាន់ប្រទេសប្រ៊ុយណេ។ចំណាត់ការនេះនឹងត្រូវធ្វើឡើងដោយមានកិច្ចសហប្រតិបត្តិការ រវាង ថៃ និងប្រ៊ុយណេ ក្រោយពីមានការកើនឡើងនូវការនាំខ្លួនប្រជាជនថៃខុសច្បាប់ ទៅកាន់ប្រទេសប្រ៊ុយណេហើយមានការរំលោភបំពានសិទ្ធិធ្ងន់ធ្ងរលើជនទាំងនោះ។
នៅក្នុងកិច្ចសម្ភាសន៍រវាងសារពត៌មាន The Brunei Times ឯកអគ្គរាជទូតថៃលោកApichart Phetcharatanaបានសម្តែងពីការព្រួយបារម្ភនៃការកើនឡើងនូវចំនួនប្រជាជនថៃដែលត្រូវជួញដូរដោយខុសច្បាប់ទៅប្រ៊ុយណេជាពិសេសនៅក្នុងរយៈពេលបីឆ្នាំចុងក្រោយនេះ។ហើយដើម្បីឆ្លើយនិងការកើនឡើងនេះរដ្ឋាភិបាលថៃនិងប្រ៊ុយណេបានសហការគ្នាដោយបង្កើតនូវអនុស្សារណៈយោគយល់គ្នាលើការការជួញដូរមនុស្សដែលបានសម្រេចប្រមាណជា៨០ភាគរយហើយនោះ។
ការបង្កើតអនុស្សារណៈយោគយល់គ្នានេះគឺក្នុងគោលបំណងជំរុញអោយមានការសហការគ្នាក្នុងការផ្តល់ព័ត៌មានទាក់ទងនិងការអនុវត្តន៍ច្បាប់គ្រប់គ្រងនៃបញ្ហាជួញដូរមនុស្សរវាងប្រទេសទាំងពីរដែលការផ្សព្វផ្សាយនេះកាលណាវាមានលក្ខណៈកាន់ទូលំទូលាយនៃច្បាប់នោះប្រជាជននឹងលែងហ៊ានប្រព្រឹត្តនូវសកម្មភាពនេះ។
លោកអគ្គរាជទូតក៏បានបន្ថែមទៀតថាប្រជាជនថៃដែលត្រូវបានជួញដូរទៅក្នុងប្រទេសប្រ៊ុយណេភាគច្រើនជាស្ត្រីហើយត្រូវបានគេយកទៅជួញដូរផ្លូវភេទនិងជាកម្មករ។លើសពីនេះទៅទៀតដោយសារពួកគេជាប្រជាជនដែលត្រូវបាននាំចូលដោយខុសច្បាប់ពួកគេត្រូវបានបំពានដោយនិយោជកឬថៅកែដែលតែងតែមិនផ្តល់នូវប្រាក់ឈ្នួលតាមការការព្រមព្រៀងដែលបានធ្វើ។ក្នុងនោះបើយោងតាមទិន្នន័យរបស់បូលីសថៃមានករណីនៃការជួញមនុស្សសរុប១៨៣ករណីតែមិនទាន់មានការកាត់ទោសឬចំណាត់ការដោះស្រាយឡើយ។
គួរបញ្ជាក់ផងដែរបញ្ហានៃការជួញដូរមនុស្សគឺមិនមែនកើតឡើងតែនៅក្នុងប្រទេសថៃនិងប្រ៊ុយណេនោះទេតែបញ្ហានេះកំពុងតែមានការកើនឡើងនៅក្នុងបណ្តាប្រទេសមួយចំនួនទៀតនៅក្នុងអាស៊ីអាគ្នេយ៍ដូចជាមីយ៉ាន់ម៉ាម៉ាឡេស៊ីនិងកម្ពុជាជាដើម៕
© រក្សាសិទ្ធិដោយ thmeythmey.com