ជាតិ
សង្គមជាតិ
×![]()
ភ្នំពេញ៖ លោក ហង្ស ចក្រា ចាងហ្វាងកាសែតខ្មែរម្ចាស់ស្រុកដែលមាននិន្នាការគាំទ្រអ្នកប្រជាធិបតេយ្យ ឬបក្សប្រឆាំងគ្មានគម្រោងធ្វើការអោយទូរទស្សន៍សង្គ្រោះជាតិទេ។ អ្នកកាសែតដែលធ្លាប់ជាប់ជាប់ពន្ធនាគារជិតមួយឆ្នាំដោយសារសំណេររបស់ខ្លួនកាលពីឆ្នាំ២០០៩បាននិយាយថា គាត់តស៊ូធ្វើយ៉ាងណាអោយកាសែតខ្មែរម្ចាស់ស្រុកដំណើរការទៅមុខបន្តទៀត។
បើទោះបីជាកាសែតខ្មែរម្ចាស់ស្រុកប្រឈមនឹងបញ្ហាហិរញ្ញវត្ថុយ៉ាងណាក៏ដោយក្តី ក៏លោក ហង្ស ចក្រា ចាងហ្វាងកាសែតមួយនេះនៅតែគ្មានគម្រោងបោះបង់សំណេររបស់ខ្លួនសម្រាប់កាសែតខ្មែរម្ចាស់ស្រុក ហើយទៅចូលរួមធ្វើការអោយទូរទស្សន៍ និងវិទ្យុគណបក្សសង្គ្រោះជាតិ។
លោក ហង្ស ចក្រា គឺជាចាងហ្វាងការផ្សាយនៃកាសែតខ្មែរម្ចាស់ស្រុកដែលមាននិន្នាការគាំទ្រគណបក្សប្រឆាំង និងអ្នកប្រជាធិបតេយ្យ។ ការអត្ថាធិប្បាយរបស់លោកបានធ្វើឡើងស្របពេលដែលរដ្ឋាភិបាលបានសម្រេចផ្តល់អាជ្ញាប័ណ្ណទូរទស្សន៍ និងវិទ្យុអោយគណបក្សសង្គ្រោះជាតិ។
លោក ហង្ស ចក្រា បាននិយាយថា៖«ខ្ញុំគ្មានគម្រោងចូលរួមជាមួយបណ្តាញព័ត៌មានរបស់គណបក្សប្រឆាំងទេ។ ហើយក៏គ្មាននរណាម្នាក់ក្នុងគណបក្សសង្គ្រោះជាតិទាក់ទងខ្ញុំដើម្បីកិច្ចការទូរទស្សន៍ និងវិទ្យុនោះដែរ។ បើគេទាក់ទង ក៏ខ្ញុំមិនធ្វើដែរ»។
លោកបានបញ្ជាក់ថា លោកព្យាយាមស្វែងរកជំនួយដើម្បីបន្តដំណើរការកាសែតខ្មែរម្ចាស់ស្រុកតទៅទៀត។ «យើងខ្វះថវិកាដើម្បីដំណើរការ។ បច្ចុប្បន្ននេះ យើងរស់បានដោយសារប្រាក់ផ្ទាល់ខ្លួន និងប្រាក់ពីការលក់កាសែត»។ នេះគឺជាការបញ្ជាក់របស់លោក ចក្រា ដែលធ្លាប់ជាប់ពន្ធនាគារជិត១ឆ្នាំដោយសារសំណេររិះគន់មន្ត្រីរដ្ឋាភិបាលកាលពីឆ្នាំ២០០៩កន្លងមក។ កាសែតខ្មែរម្ចាស់ស្រុក បើយោងតាមលោក ហង្ស ចក្រា ក៏ធ្លាប់ទទួលបានថវិកាខ្លះពីតំណាងរាស្ត្របក្សប្រឆាំងដែរកាលពីអតីតកាល តែឥឡូវនេះ លោកមិនទទួលបានទៀតឡើយ៕
© រក្សាសិទ្ធិដោយ thmeythmey.com
