ជាតិ
នយោបាយជាតិ
អគ្គស្នងការរងនគរបាលជាតិឡើងដល់ជិត២០នាក់ហើយ
× តាមរយៈអនុក្រឹត្យដែលចុះថ្ងៃទី២៥ ខែធ្នូ ឆ្នាំ២០១៤ លោកនាយករដ្ឋមន្ត្រី ហ៊ុន សែន បានសម្រេចតែងតាំងឧត្តមសេនីយ៍បីរូប ជាអគ្គស្នងការរងនគរបាលជាតិនៃក្រសួងមហាផ្ទៃ ដែលក្នុងនោះរួមមាន លោក ម៉ក់ ជីតូ លោក ហ៊ឹម យ៉ាន និងលោក ទូច ណារ៉ុថ។
ឆ្លើយតបនឹងសំណើរបស់រដ្ឋមន្ត្រីក្រសួងមហាផ្ទៃ ប្រមុខរដ្ឋាភិបាល បានដំឡើងឋានន្តរសក្តិលោក ម៉ក់ ជីតូ ពីប្រធាននាយកដ្ឋាននគរបាលយុត្តិធម៌ ទៅជាអគ្គស្នងការរង និងលោក ហ៊ឹម យ៉ាន ពីប្រធាននាយកដ្ឋានកណ្តាលសណ្តាប់សាធារណៈទៅជាអគ្គស្នងការរងដូចគ្នា ស្របពេលដែលលោក ទូច ណារ៉ុថ ទទួលបានតំណែងដូចគ្នានេះ បន្ថែមពីលើមុខងារបច្ចុប្បន្ន (ប្រធាននាយកដ្ឋានអង្គរក្ស)។
ការតែងតាំងបន្ថែមថ្នាក់ដឹកនាំបីរូបនេះ នាំឲ្យចំនួនអគ្គស្នងការរងនគរបាលជាតិ កើនដល់ជិត២០នាក់។ កន្លងមក បើតាមសេចក្តីសម្រេចបែងចែកតួនាទីចុះថ្ងៃទី២ ខែមិថុនា ឆ្នាំ២០១៤ លោក នេត សាវឿន ដែលជាអគ្គស្នងការនគរបាលជាតិ មានអគ្គស្នងការរងចំនួន១៤នាក់។
យោងតាមសេចក្តីសម្រេច លោក នេត សាវឿន ដែលជាអគ្គស្នងការ ទទួលបន្ទុកដឹកនាំការងាររួម លោក ចាន់ អ៊ាន ជាជំនួយការដឹកនាំការងារបុគ្គលិក លោក យុន ឈុន្នី ជាជំនួយការដឹកនាំការងារសណ្តាប់ធ្នាប់ ចរាចរណ៍ ទេសចរណ៍ និងបេតិកភ័ណ្ឌ លោក ស៊ឹម សុផល ជាជំនួយការដឹកនាំការងារនគរបាលព្រំដែន ទទួលទិសភូមិភាគ ៣ ។
លោក ខេង សុមេធ ជំនួយការដឹកនាំការងារព្រំដែន ទទួលទិសភូមិភាគ ៤ និងភូមិភាគ ៥ លោក កង សុខន ជំនួយការដឹកនាំការងារនគរបាលព្រហ្មទណ្ឌ ការងារបច្ចេកទេសវិទ្យាសាស្ត្រនិងការងារប្រឆាំងគ្រឿងញៀន លោក ដាំ វុទ្ធី អគ្គស្នងការរង ជំនួយការដឹកនាំការងារនគរបាលព្រំដែន ទទួលទិសភូមិភាគ ១ និងភូមិភាគ ២ លោក ជួន សុវណ្ណ អគ្គស្នងការរង ជំនួយការដឹកនាំការងារស្នងការដ្ឋាននគរបាលរាជធានីភ្នំពេញ។
លោកស្រី យក់ សុខា ជំនួយការដឹកនាំការងារប្រឆាំងការជួញដូរមនុស្ស និងការពារអនីតិជនការងារយែនឌ័ររបស់កងកម្លាំងនគរបាលជាតិ លោក សួស អង្គារ៍ អគ្គស្នងការរង ជំនួយការដឹកនាំការងារអាវុធជាតិផ្ទុះ និងអគ្គិភ័យ លោក ជា សុមេធី ជំនួយការដឹកនាំការងារប្រឆាំងបទល្មើសសេដ្ឋកិច្ច លោក គៀត ច័ន្ទថារិទ្ធ ជំនួយការដឹកនាំការងារសេនាធិការដ្ឋាន លោក ថោង លីម ជំនួយការដឹកនាំការងារចារកម្ម និងក្រុមប្រឆាំងឧក្រិដ្ឋកម្មឆ្លងដែន លោក ឆៃ ស៊ីណារិទ្ធ ជំនួយការដឹកនាំការងារសន្តិសុខផ្ទៃក្នុង ការងារប្រឆាំងភេវរកម្មនិងការងារស៊ើបអង្កេតបច្ចេកទេស និងលោក ពេជ្រ ជីវ័ន្ត ជំនួយការដឹកនាំការងារការពារព្រះមហាក្សត្រ ការពារឥស្សរជនជាន់ខ្ពស់វេទិកាគណៈប្រតិភូជាតិ-អន្តរជាតិ៕
© រក្សាសិទ្ធិដោយ thmeythmey.com