ជាតិ
សង្គមជាតិ
×![]()
មជ្ឈមណ្ឌលអប់រំច្បាប់សម្រាប់សហគមន៍ កំពុងបង្កើតក្រុមអ្នកកាសែតសហគមន៍នៅគ្រប់ខេត្តរាជធានី ដើម្បីរួមចំណែកក្នុងការចែក និងផ្សព្វផ្សាយព័ត៌មានពីក្នុងសហគមន៍របស់ពួកគេ។ សកម្មភាពនេះ ក៏មានគោលដៅលើកកម្ពស់សិទ្ធិមនុស្ស លទ្ធិប្រជាធិបតេយ្យ និងយុត្តិធម៌សង្គមផងដែរ។
តាំងពីឆ្នាំ២០១២មក មជ្ឈមណ្ឌលអប់រំច្បាប់សម្រាប់សហគមន៍ (CLEC) បានបង្កើតគម្រោងបណ្តុះបណ្តាលអ្នកកាសែតសហគមន៍។ យុវជន យុវជននារី ព្រមទាំងព្រះសង្ឃផងប្រមាណ២០០នាក់ហើយ បានទទួលការបណ្តុះបណ្តាលផ្នែកសរសេរព័ត៌មាន រាយការណ៍ព័ត៌មាន ថតវីដេអូ និងប្រើប្រាស់បណ្តាញសង្គម ដើម្បីផ្សព្វផ្សាយព័ត៌មានរបស់ពួកគេ។
លោក ង៉ែត ម៉ូសេ ជាអ្នកសម្របសម្រួលគម្រោងបច្ចកវិទ្យាព័ត៌មាន និងសារគមនាគមន៍ (ICT) នៃមជ្ឈមណ្ឌលអប់រំច្បាប់សម្រាប់សហគមន៍ បានពន្យល់ថា គម្រោងបណ្តុះបណ្តាលក្រុមអ្នកកាសែតសហគមន៍ មានគោលដៅលើកដំកើងការគោរពសិទ្ធិមនុស្ស និងលទ្ធិប្រជាធិបតេយ្យនៅក្នុងប្រទេសកម្ពុជា តាមរយៈសេចក្តីរាយការណ៍។
តើហេតុអ្វីបានជាមជ្ឈមណ្ឌលអប់រំច្បាប់សម្រាប់សហគមន៍ បង្កើតគម្រោងនេះ? លោក ង៉ែត ម៉ូសេ បានពន្យល់យ៉ាងដូច្នេះថា៖«ក្រៅពីចង់លើកស្ទួយវិស័យសិទិ្ធមនុស្ស និងយុត្តិធម៌សង្គម យើងបានទទួលការស្នើសុំពីប្រជាសហគមន៍ ឲ្យយើងនិយាយ ផ្សព្វផ្សាយអំពីបញ្ហានៅក្នុងសហគមន៍របស់ពួកគេ។ លើសពីនេះទៀត យើងបានសង្កេតឃើញថា សារព័ត៌មានភាគច្រើនមិនបានផ្តោតអារម្មណ៍ ឬសរសេរអំពីបញ្ហាតូចតាចនៅតាមសហគមន៍ឡើយ។ ដូច្នេះគម្រោងបណ្តុះបណ្តាលអ្នកកាសែតសហគមន៍ នឹងមានសារសំខាន់បំផុត»។
បើតាមអ្នកទទួលបន្ទុកគម្រោងដដែលនេះ ក្នុងពេលកកន្លងមក ជនជាតិដើមភាគតិច សកម្មជនដីធ្លី សកម្មជនសិទ្ធិមនុស្ស សហគមន៍បឹងកក់ បណ្តាញយុវជន និងបណ្តាញផ្សេងទៀត បានចូលរួមក្នុងវគ្គបណ្តុះបណ្តាលឲ្យក្លាយជាអ្នកកាសែតសហគមន៍នេះ។លោក ម៉ូសេ បន្តអោយដឹងថា៖«គឺព្រះសង្ឃ និងប្រជាពលរដ្ឋ ដែលជាអ្នកកាសែតសហគមន៍ទាំងនោះ មានចំណេះដឹងប្រសើរជាងមុន ទាក់ទងនឹងការសរសេរព័ត៌មាន បង្កើតព័ត៌មានជាវីដេអូ និងចំណេះដឹងដែលទាក់ទិននឹងការប្រើប្រាស់«Facebook, line និង Page Facebook» ជាដើម។ ព័ត៌មានដែលអ្នកកាសែតសហគមន៍ទាំងនោះចុះផ្សាយរួមមាន៖ បញ្ហាការំលោភដីធ្លី សិទ្ធិមនុស្ស អំពើហិង្សាក្នុងគ្រួសារ ក្មេងទំនើង និងផលលំបាកក្នុងការរស់នៅរបស់ប្រជាពលរដ្ឋក្នុងសហគមន៍ទាំងនោះ»។
ក្រៅពីផ្សព្វផ្សាយនៅលើបណ្តាញសង្គម «Facebook, line, Page Facebook និងគេហទំព័ររបស់ពួកគេ» និងព័ត៌មានទាំងអស់ គឺត្រូវបានប្រមូលដាក់ក្នុងគេហទំព័ររបស់មជ្ឈមណ្ឌលអប់រំច្បាប់សម្រាប់សហគមន៍ ដែលមានឈ្មោះថា គេហទំព័រ«សំឡេងប្រជាពលរដ្ឋ»។
យុវជន សែម ហាក់ ជានិស្សិតដែលបានបញ្ចប់ថ្នាក់បរិញ្ញាបត្រផ្នែកច្បាប់ កំពុងបន្តការងារស្ម័គ្រចិត្តជាអ្នកកាសែតសហគមន៍នេះអស់រយៈពេលកន្លះឆ្នាំមកហើយ ក្រោយពីបានចូលរួមក្នុងវគ្គបណ្តុះបណ្តាលនៅមជ្ឈមណ្ឌលអប់រំច្បាប់សម្រាប់សហគមន៍។ អតីតនិស្សិតសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ចរូបនេះ មិនត្រឹមតែទទួលបានចំណេះដឹង និងយល់ពីសារៈសំខាន់នៃអ្នកសារព័ត៌មានប៉ុណ្ណោះទេ យុវជនដដែលនោះ ក៏បានផលិតព័ត៌មានជាអត្ថបទ និងបង្កើតជាវីដេអូខ្លីៗ ដែលទាក់ទិននឹងបញ្ហាគ្រោះថ្នាក់ចរាចរណ៍ សិទ្ធិដីធ្លី សិទិ្ធមនុស្ស ភាពអត់ការងារធ្វើ និងការចូលរូមធ្វើការងារស្ម័គ្រចិត្តរបស់យុវជន ដើម្បីបង្ហោះនៅលើហ្វេសប៊ុកផ្ទាស់ខ្លួន និងបង្ហោះនៅក្នុង«YouTube»។ក្រៅពីសមិទ្ធផលដែលបានអនុវត្តន៍កន្លងមក យុវជន មាឌធំ សម្បុរស្រអែមរូបនេះ បានលើកពីបញ្ហាប្រឈមដែរថា៖«ខ្ញុំបារម្ភពីសុវត្ថភាពពេលចុះយកព័ត៌មាននៅកន្លែងដែលមានប្រជាពលរដ្ឋកំពុងតវ៉ា ឬធ្វើបាតុកម្មទាមទារអ្វីមួយ។ ក្រៅពីបារម្ភពីសុវត្ថភាពផ្ទាស់ខ្លួន ខ្ញុំក៏ពុំទាន់ចេះបច្ចេកទេសច្រើនក្នុងការផលិតវិដេអូខ្លីៗ និងសរសេរព័ត៌មានជាអត្ថបទនោះទេ ព្រោះខ្ញុំមិនមែនជាអ្នកកាសែតអាជីពដូចគេទេ»។
ស្រដៀងគ្នានឹងយុវជនខាងលើ អ្នកកាសែតសហគមន៍ ស៊ីម សុធា ជានិស្សិតឆ្នាំទី៤ ផ្នែកច្បាប់ ក្រោយពីបានចូលរៀនក្នុងវគ្គបណ្តុះបណ្តាលរយៈពេល ១សប្តាហ៍ ជាមួយនឹងមជ្ឈមណ្ឌលអប់រំច្បាប់សម្រាប់សហគមន៍ កាលពីដើមខែតុលាកន្លងមក យុវជន មាឌល្អិត រាងស្តើងរូបនេះ បានចុះយកព័ត៌មានដែលទាក់ទងនឹងបញ្ហាបរិស្ថាន គ្រោះថ្នាក់ចរាចរណ៍ ការគោរពសិទ្ធិមនុស្ស និងបញ្ហាសង្គមផ្សេងទៀតនៅក្នុងសង្កាត់ភ្នំពេញថ្មី ដែលជាកន្លែង សុធា រស់នៅ និងកន្លែងផ្សេងទៀតនៅក្នុងរាជធានីភ្នំពេញ។ យុវជនដែលធ្លាប់ចុះយកព័ត៌មានតាមបណ្តាខេត្តនានានោះបានពន្យល់ថា៖«អ្នកកាសែតសហគមន៍នេះជាការងារស្ម័គ្រចិត្តរបស់ខ្ញុំ ដែលអាចផ្តល់ព័ត៌មានដល់ប្រជាពលរដ្ឋ និងថ្នាក់ដឹកនាំពីបញ្ហារបស់សង្គម។ ហើយព័ត៌មានរបស់ខ្ញុំទាំងអស់ទាល់តែខ្ញុំបានឃើញនឹងភ្នែកទើបខ្ញុំហ៊ានសេរសេរបង្ហោះនៅលើហ្វេសប៊ុករបស់ខ្ញុំ និងហ្វេសប៊ុករបស់ក្នុងការងារដែលមានឈ្មោះថា អ្នកកាសែតសហគមន៍ (Media Operator)»។ បើទោះជាមជ្ឈមណ្ឌលអប់រំច្បាប់សម្រាប់សហគមន៍ លែងមានការគាំទ្រជាបច្ចេកទេស ឬប្រាក់ឧបត្ថម្ភពេលចុះយកព័ត៌មានម្តងៗក៏ដោយ ក៏អ្នកកាសែតសហគមន៍រូបនេះនៅតែបន្តការងារស្ម័គ្រចិត្តនេះដដែល។
ទន្ទឹមនឹងទទួលបានសមិទ្ធផលទាំងនេះ លោក ង៉ែត ម៉ូសេ ជាអ្នកសម្របសម្រួលគម្រោងបច្ចកវិទ្យាព័ត៌មាន និងសារគមនាគមន៍ (ICT) នៃមជ្ឈមណ្ឌលអប់រំច្បាប់សម្រាប់សហគមន៍ បានរៀបរាប់ពីបញ្ហាប្រឈមរបស់អ្នកកាសែតសហគមន៍ទាំងនោះថា៖«បណ្តាញអ្នកកាសែតសហគមន៍ គឺមិនទាន់មានការទទួលស្គាល់ថាពួកគេជាអ្នកកាសែតសហគមន៍នោះទេ។ ពេលពួកគេសុំសម្ភាសន៍នរណាម្នាក់ គឺគេមិនផ្តល់បទសម្ភាសន៍ឡើយ ដោយគេសួរពីប្រភពមកពីណា និងមិនទុកចិត្តក្រុមអ្នកកាសែតទាំងនោះ។ ក្រៅពីបញ្ហានេះ គឺពួកគេមិនមានពេលវេលាគ្រប់គ្រាន់ដើម្បីចុះយកព័ត៌មាន ចំណេះដឹងទាក់ទិននឹងសារព័ត៌មាននៅមានកម្រិត និងនៅមានការភ័យខ្លាចគេប្តឹងជាដើម»៕
© រក្សាសិទ្ធិដោយ thmeythmey.com
