ជាតិ
នយោបាយជាតិ
ខុមហ្វ្រែលរៀបចំវេទិកាដាក់ពិន្ទុការងាររដ្ឋាភិបាលឆ្នាំទី១ នៃអាណត្តិទី៥
× នៅថ្ងៃទី៣០ធ្នូនេះ អង្គការសង្កេតការណ៍បោះឆ្នោតឈ្មោះខុមហ្វ្រែល នឹងរៀបចំវេទិកាម្ចាស់ឆ្នោតមួយដើម្បី ប្រមូលការវាយតម្លៃពីម្ចាស់ឆ្នោត និងអង្គការជាតិ អន្តរជាតិ ទៅលើការអនុវត្តរបស់រដ្ឋាភិបាលក្នុងឆ្នាំដំបូងនៃអាណត្តិទី៥នេះ។ ក្រោយការប្រមូលការវាយតម្លៃនេះ របាយការណ៍ស្តីពីការវាយតម្លៃផ្លូវការចុងក្រោយលើការងាររដ្ឋាភិបាល នឹងត្រូវចែកផ្សាយនៅចុងខែមករា ឬដើមខែកុម្ភៈ។
កញ្ញា ខន ចំប៉ា លម្អិតព័ត៌មាននេះ
ម្ចាស់ឆ្នោត អង្គការជាតិ និងអន្តរជាតិជាច្រើន នឹងត្រូវអញ្ជើញអោយចូលរួមក្នុងវេទិកាម្ចាស់ឆ្នោត ដើម្បីដាក់ពិន្ទុលើការងារអនុវត្តគោលនយោបាយឆ្នាំទីមួយនៃរដ្ឋាភិបាលអាណត្តិទី៥ ដែលដឹកនាំដោយលោកនាយករដ្ឋមន្ត្រី ហ៊ុន សែន នៃគណបក្សប្រជាជនកម្ពុជា។ វេទិកានេះដែលនឹងត្រូវប្រារព្ធនៅថ្ងៃទី៣០ខែធ្នូនៅសាកលវិទ្យាល័យខេមរៈ ត្រូវរៀបចំឡើងដោយអង្គការសង្កេតការណ៍បោះឆ្នោត ខុមហ្វ្រែល។
លោកគល់បញ្ញានាយកប្រតិបត្តិនៃអង្គការខុមហ្វ្រែលបានពន្យល់ប្រាប់សារព័ត៌មានថ្មីៗ នៅថ្ងៃទី២៨ធ្នូនេះថា វេទិកាម្ចាស់ឆ្នោតនេះមានគោលដៅ៣ចំនុច គឺទី១ គឺដើម្បីឲ្យម្ចាស់ឆ្នោតយល់ដឹងកាន់តែច្បាស់ថាអ្វីខ្លះជាការសន្យារបស់គណបក្សនយោបាយពេលឃោសនាបោះឆ្នោត។ ទី២. ពិភាក្សាលើលទ្ធផលនៃការអនុវត្តគោលនយោបាយរបស់រាជរដ្ឋាភិបាល ថាតើរាជរដ្ឋាភិបាលបានអនុវត្តដូចអ្វីដែលខ្លួនបានសន្យាដែរឬអត់?និងទី៣ផ្តល់ឱកាសឲ្យអ្នកចូលរួមវាយតម្លៃតាមរយៈការផ្តល់ពិន្ទុលើការពេញចិត្ត ចំពោះការអនុវត្តគោលនយោបាយរបស់រដ្ឋាភិបាលនីតិកាលទី៥ឆ្នាំទី១។
បើតាមការបញ្ជាក់របស់លោក គល់ បញ្ញា ដដែល ក្រោយពីដាក់ពិន្ទុរបស់ម្ចាស់ឆ្នោតហើយនោះ ខុមហ្វ្រែលនឹងចេញផ្សាយរបាយការណ៍បញ្ចប់ស្តីពីការវាយតម្លៃលើការងាររបស់រដ្ឋាភិបាលនេះ នៅចុងខែមករា ឬខែកុម្ភៈខាងមុខ។
នាយកប្រតិបត្តិរបស់ខុមហ្វ្រែលអត្ថាធិប្បាយបន្ថែមយ៉ាងដូច្នេះថា៖«របាយការណ៍នេះត្រូវមានការវាយតម្លៃពីប្រជាពលដែលជាម្ចាស់ឆ្នោតអង្គការសង្គមស៊ីវិលជាតិនិងអន្តរជាតិដែលធ្វើការពាក់ព័ន្ធនឹងការបោះឆ្នោត។បន្ទាប់ពីរបាយការណ៍វាយតម្លៃបញ្ចប់ខុមហ្វ្រែលនឹងធ្វើការផ្សព្វផ្សាយឲ្យបានទូលំទូលាយទៅដល់ប្រជាពលរដ្ឋម្ចាស់ឆ្នោតនិងអ្នកពាក់ព័ន្ធជាពិសេសដាក់របាយការណ៍នេះទៅកាន់រដ្ឋសភាដើម្បីឲ្យសភាបានដឹងពីការផ្តល់ពិន្ទុរបស់ម្ចាស់ឆ្នោតចំពោះការអនុវត្តគោលនយោបាយរបស់ខ្លួនរយៈពេល១ឆ្នាំមកនេះ»៕
© រក្សាសិទ្ធិដោយ thmeythmey.com