ជាតិ
សង្គមជាតិ
ផាប់ស្ទ្រីតចាប់ផ្តើមស្ទះខណៈបុណ្យឆ្លងឆ្នាំចាប់ផ្តើមនៅយប់នេះ រូបភាព៖ អាចារ្យធំ
× សៀមរាប៖ បុណ្យឆ្លងឆ្នាំសកល ឆ្នាំ២០១៥ នឹងប្រារព្ធធ្វើនៅយប់ថ្ងៃទី៣១ ខែធ្នូនេះហើយ។ នៅតំបន់ផាប់ស្ទ្រីត (Pub Street) ដ៏ពេញនិយមនៅខេត្តសៀមរាបនេះវិញ ផ្លូវចាប់ផ្តើមស្ទះចាប់ពីយប់មិញ ដែលណែនណាន់ដោយមនុស្សម្នា។ ផ្លូវផាប់ស្ទ្រីត ជាគោលដៅសំខាន់ សម្រាប់ភ្ញៀវទេសចរបរទេស ក្នុងការដើរកម្សាន្ត នៅយប់រាប់ថយក្រោយ(Count-down) ដ៏ពេញនិយម។
ចរាចរចាប់ផ្តើមកកស្ទះយ៉ាងខ្លាំង នៅផ្លូវផាប់ស្ទ្រីត ចាប់ពីវិមានកាណាឌីយ៉ា ផ្លូវស៊ីវុត្ថា រហូតដល់ផ្លូវផ្សារចាស់មាត់ស្ទឹង។ គេសង្កេតឃើញមានភ្ញៀវទេសចរភាគច្រើនជាបរទេស បានដើរចេញពីគោលដៅផ្សេងគ្នា មកប្រមូលផ្តុំកន្លែងតែមួយ គឺផាប់ស្ទ្រីត និងតំបន់ក្បែរៗនោះ មានផ្សាររាត្រីជាដើម។
ក្នុងតំបន់ផ្សារចាស់ទាំងមូល កាលពីរាត្រីថ្ងៃទី៣០ ខែធ្នូយប់មិញ បានសភាពអ៊ូអរ ដោយវង់ភ្លេង ដែលប្រគំចេញពីចំណុចផ្សេងៗ ដើម្បីកំដរ និងឲ្យភ្ញៀវរាំលេងកម្សាន្ត តាមបែបបទផ្សេងៗពីគ្នា។ មានកន្លែងខ្លះ បានបើកសំឡេងភ្លេងខ្លាំងៗ ក៏បានកើតជាការរំខានដល់ប្រជាពលរដ្ឋ នៅទីនោះផង។ មានកំលាំងសមត្ថកិច្ចជាច្រើន បានចុះត្រួតពិនិត្យ ទីតាំងមួយចំនួន បានបង្កជាការរំខានដោយសំឡេង នៅយប់ជ្រៅផង។
យោងតាមរបាយការណ៍ពីមន្ទីរទេសចរណ៍ខេត្តសៀមរាប បានឲ្យដឹងថា នៅក្នុងបុណ្យឆ្លងឆ្នាំ និងចូលឆ្នាំសកលឆ្នាំ២០១៤កន្លងទៅ មានភ្ញៀវទេសចរជាង៨ម៉ឺននាក់ ដែលបានមកកម្សាន្តក្នុងខេត្តមួយនេះ។ ក្នុងចំណោមភ្ញៀវទេសចរចំនួន ៨៧,១៥០នាក់ មានភ្ញៀវទេសចរបរទេសចំនួន ២៥,១៥០នាក់។
គួររំលឹកថា អាជ្ញាធរខេត្តសៀមរាប បានរៀបចំវេទិកាប្រគំតន្ត្រីចំនួន២កន្លែងផ្សេងគ្នា នៅយប់ឆ្លងឆ្នាំសកលនេះ ទី១នៅតំបន់ផាប់ស្ទ្រីត និងទី២ នៅសួនច្បារមុខសណ្ឋាគារ Raffle Grand Hotel ។ ក្រៅពីនេះ នៅតាមសណ្ឋាគារមួយចំនួន ក៏មានរៀបចំពិធីរាប់ថយក្រោយ ឆ្លងឆ្នាំសកល ដាច់ដោយឡែកពីអាជ្ញាធរផងដែរ៕
© រក្សាសិទ្ធិដោយ thmeythmey.com