ជាតិ
នយោបាយជាតិ
ឈានចូលឆ្នាំថ្មីរដ្ឋាភិបាលនៅតែប្រកាន់ពាក្យស្លោក«ឆ្លុះកញ្ចក់ងូតទឹក ដុសក្អែលនិងព្យាបាល»
× លោកហ៊ុនសែននាយករដ្ឋមន្ត្រីនៃប្រទេសកម្ពុជាបានចេញសារលិខិតមួយដើម្បីអបអរបុណ្យចូលឆ្នាំសកលឆ្នាំ២០១៥ខាងមុខនេះ។នៅក្នុងឱកាសឆ្នាំ២០១៥រាជរដ្ឋាភិបាលកម្ពុជានឹងបន្តការអនុត្តន៍ឱ្យកាន់តែស៊ីជម្រៅថែមទៀតនូវកំណែទម្រង់សំខាន់ៗដោយប្រកាន់ខ្ជាប់នូវទិសស្លោក «ឆ្លុះកញ្ចក់ងូតទឹក ដុសក្អែលនិងព្យាបាល»។
នៅក្នុងសារលិខិតជូនពរលោកហ៊ុនសែនបានលើកឡើងបន្តថា រាជរដ្ឋាភិបាលកម្ពុជាកំពុងអនុវត្តយ៉ាងសកម្មនូវយុទ្ធសាស្ត្រចតុកោណដំណាក់កាលទី៣ ប្រកបដោយស្មារតីទទួលខុសត្រូវ ដើម្បីកំណើនការងារសមធម៌ និងប្រសិទ្ធិភាពនៅក្នុងប្រទេសកម្ពុជា ដែលជារបៀបវាៈនៃគោលនយោបាយសង្គម សេដ្ឋកិច្ចរបស់រាជរដ្ឋាភិបាល សំដៅបន្តជំរុញអនុត្តន៍ឱ្យកាន់តែស៊ីជម្រៅថែមទៀតនូវកំណែទម្រង់សំខាន់ៗជាអាទិ៍ ការប្រយុទ្ធប្រឆាំងអំពើពុករលួយ ការកែទម្រង់ច្បាប់និងប្រព័ន្ធយុត្តិធម៌ ការកែទម្រង់ហិរញ្ញវត្ថុសាធារណៈ ការកែទម្រង់រដ្ឋបាលសាធារណៈ ការកែទម្រង់កងកម្លាំងប្រដាប់អាវុធ កិច្ចការពារបរិស្ថាន ការបង្កើនប្រសិទ្ធិភាពនៃសេវាសាធារណៈជូនប្រជាពលរដ្ឋ និងការកែទម្រង់ផ្សេងៗទៀតដោយប្រកាន់ខ្ជាប់នូវទិសស្លោក «ឆ្លុះកញ្ចក់ងូតទឹក ដុសក្អែលនិងព្យាបាល»។
ក្រៅពីការកែទម្រង់លើវិស័យនានាលោកហ៊ុនសែនក៏បានបន្តដែរថា រាជរដ្ឋាភិបាលកម្ពុជានឹងបន្តខិតខំការពារសន្តិភាពស្ថិរភាព សន្តិសុខនិងសណ្តាប់ធ្នាប់សង្គមឱ្យកាន់តែរឹងមាំដើម្បីធានាដល់ការអភិវឌ្ឍប្រកបដោយនិវន្តរភាព និងការទទួលខុសត្រូវជាមួយនឹងការកាត់បន្ថយភាពក្រីក្រ ធ្វើយ៉ាងណាឱ្យប្រជាពលរដ្ឋទទួលបានផលប្រយោជន៍ប្រកបដោយសមធម៌ផ្តើមចេញពីការអភិវឌ្ឍសង្គមជាតិ។រាជរដ្ឋាភិបាលនឹងបន្តការយកចិត្តទុកដាក់លើមូលដ្ឋាលគ្រិះនៃកំណើនដែលជាសសរទ្រូងដ៏សំខាន់នៃសេដ្ឋកិច្ចកម្ពុជារួមមានវិស័យកសិកម្មឧស្សាហកម្មកាត់ដេរទេសចរណ៍ និងវិស័យសំណង់។ក្នុងន័យនេះយើងនឹងផ្តោតលើការងារជាអាទិភាពដូចជាការអភិវឌ្ឍធនធានមនុស្ស ជាពិសេសការបណ្តុះបណ្តាលបច្ចេកវិជ្ជាជីវៈដល់យុវជន ការបន្តអភិវឌ្ឍន៍ហេដ្ឋារចនាសម្ព័ន្ធរូបវ័ន្តការសម្រួលពាណិជ្ជកម្មការពង្រឹងអភិបាលកិច្ច និងសមត្ថភាពស្ថាប័នរដ្ឋ និងការពង្រីកប្រព័ន្ធធានាសាស្ត្រតូច ធំជាដើម។
លោកហ៊ុនសែនក៏បានគូសបញ្ជាក់ដែរថាក្នុងឆ្នាំ២០១៤រាជរដ្ឋាភិបាលមានមោទនភាពដោយបានអនុវត្តនិងសម្រេចបានប្រកបដោយជោគជ័យនូវសមិទ្ធិផលជាច្រើនជូនជាតិនិងប្រជាជន ដោយរក្សាបាននូវសុខសន្តិភាព សណ្តាប់ធ្នាប់សង្គម ស្ថិរភាពនយោបាយហិរញ្ញវត្ថុនិងលំនឹងម៉ាក្រូសេដ្ឋកិច្ចល្អប្រសើរ។ កម្ពុជាត្រូវបានវាយតម្លៃថាជាប្រទេសទី១១លើពិភពលោកដែលសម្រេចបានកំណើនសេដ្ឋកិច្ចខ្ពស់ក្នុងរយៈពេល១០ឆ្នាំចុងក្រោយ និងជាប្រទេសទី៥ក្នុងចំណោមប្រទេសកំពុងអភិវឌ្ឍន៍ ដែលអាចសម្រចបាននូវគោលដៅអភិវឌ្ឍន៍សហស្សវត្សន៍ ព្រមទាំងស្ថិតក្នុងចំណាត់ថ្នាក់ទី១នៅអាស៊ី-ប៉ាស៊ីហ្វិកដែលសម្រេចបាននូវវឌ្ឍនភាពល្អប្រសើរក្នុងការកែលំអសូចនាករផ្នែកសង្គមកិច្ច ពិសេសការកាត់បន្ថយភាពក្រីក្រក្នុងអត្រាជាង១ភាគរយក្នុងមួយឆ្នាំ។
ពីឆ្នាំ២០១០ដល់២០១៣សេដ្ឋកិច្ចកម្ពុជាមានកំណើនមធ្យមប្រចាំឆ្នាំ៧ភាគរយ ហើយនៅឆ្នាំ២០១៤នេះតាមការប៉ានស្មានកំណើនសេដ្ឋកិច្ចអាចសម្រេចបានក្នុងរង្វង់៧ភាគរយក្នុងនោះវិស័យឧស្សាហកម្មមានកំណើន៩,៦ភាគរយ សេវាកម្ម៧,៥ភាគរយ និងវិស័យកសិកម្ម២,៦ភាគរយ។ដោយឡែកនៅឆ្នាំ២០១៥ខាងមុខតាមការព្យាករណ៍កម្ពុជានៅតែអាចសម្រេចបានកំណើនសេដ្ឋកិច្ចក្នុងរង្វង់៧ភាគរយបន្តទៀត៕
© រក្សាសិទ្ធិដោយ thmeythmey.com