ជាតិ
បទយកការណ៍ / បទសម្ភាសន៍
សង្គមជាតិ
ការបៀតបៀនផ្លូវភេទ តាមរយៈពាក្យសម្តី និងក្រសែភ្នែកអាចជាប់ទោស!
× ភ្នំពេញ៖ បុរសខ្មែរវ័យចំណាស់មួយចំនួនកំពុងរងការរិះគន់ពីសំណាក់យុវតីជំនាន់ក្រោយ ដោយសារតែបុរសចំណាស់ទាំងនោះបានប្រើឥរិយាបថមិនសមគួរមួយចំនួនទៅកាន់ពួកគេ។ បុរសចំណាស់ខ្លះ ចូលចិត្តចោលក្រសែភ្នែកសម្លក់សម្លឹងមើលដងខ្លួននារីវ័យក្មេង ស្ទើរតែមិនព្រិចភ្នែក។ អ្នកខ្លះទៀត ប្រើពាក្យសម្តីផ្អែមល្ហែមហៅនារីវ័យក្មេងថា «អូន» លួងលោមក្នុងន័យស្នេហា ទាំងខ្លួនសក់ស្កូវទៅហើយនោះ។ បុរសចំណាស់ខ្លះទៀត ប្រើប្រាស់ទ្រព្យសម្បត្តិ និងប្រាក់ដុល្លារធ្វើជានុយដើម្បីស្ទូចយកព្រហ្មចារី ឬខ្លួនប្រាណនារីវ័យក្មេង។
ថ្ងៃមួយនៅពេលដែល កញ្ញា លីនដា ទៅចូលរួមសិក្ខាសាលាមួយ នៅសណ្ឋាគារសូហ្វីតែល បុរសវ័យ ជាង៥០ឆ្នាំម្នាក់ បាននិយាយសួរនាំកញ្ញាជាច្រើនអំពីទីកន្លែងធ្វើការ អំពីស្ថានភាពការងារ និងគ្រួសារ ព្រមទាំងប្រាក់បៀវត្សប្រចាំខែផងដែរ។ បន្ទាប់មកបុរសចំណាស់រូបនោះបានបបួលនាងទៅធ្វើការ ជាមួយខ្លួន ដោយសន្យាថា៖«ប្រសិនបើលីនដា ទៅធ្វើការជាមួយខ្ញុំ ខ្ញុំនឹងអោយឡានមួយ វីឡាមួយ និងលុយច្រើនទៀតទៅលីនដា។ ហើយការងារនោះមិនលំបាក និងមិនហត់នឿយដូចការងារសព្វថ្ងៃនោះទេ»។ កញ្ញា លីនដា អាយុ២១ឆ្នាំបានរៀបរាប់បន្តថា បន្ទាប់ពីបញ្ចប់កិច្ចសន្ទនាគ្នា កញ្ញាក៏បាន បដិសេធបំណងរបស់បុរសនោះភ្លាមៗដែរ ព្រោះកញ្ញាយល់ថាអ្វីដែលបុរសចំណាស់នោះនិយាយគឺជាបំណងបោកប្រាស់។ លីនដា បន្ថែមទៀតថា នាងធ្លាប់ជួបបុរសចំណាស់ជាច្រើននាក់ហើយដែលនិយាយយ៉ាងដូច្នេះមកកាន់នាង ហើយនាងបានកត់សម្គាល់ថា៖«នៅក្នុងសង្គមបច្ចុប្បន្ននេះ មានបុរសវ័យចំណាស់ជាច្រើនកំពុងឈ្លក់វង្វេងនឹងការសប្បាយរបស់ខ្លួន មិនសូវខ្វាយខ្វល់នឹងផលប៉ះពាល់ដល់ សីលធម៌នៅក្នុងសង្គមនោះទេ»។
«បុរសចំណាស់ខ្លះ មានចរិតមិនសូវល្អទេ។ និយាយស្តីក៏មិនសមអោយក្មេងគោរពដែរ។ ហើយគ្មាន សីលធម៌ទៀត។ ចូលចិត្តយកលុយមកជះលើស្ត្រីវ័យក្មេងណាស់»។ នេះជាការរិះគន់របស់ កញ្ញា និមល។ និមល វ័យ២៣ឆ្នាំជាបុគ្គលិកផ្នែកលក់នៅក្នុងក្រុមហ៊ុនទូរសព្ទដៃក្នុងផ្សារទំនើបមួយកន្លែងក្នុងរាជធានីភ្នំពេញ បានអោយដឹងថា អតិថិជនជាបុរសវ័យចំណាស់មួយចំនួនតែងនិយាយលែបខាយ«ញ៉ែ» និងបានអួតអាងថាខ្លួនជាអ្នកមាន ហើយអាចឧបត្ថម្ភអ្វីៗអោយបានគ្រប់យ៉ាងផងដែរ។ កញ្ញា និមល រៀបរាប់ពីសម្តីបុរសជាអតិថិជនម្នាក់ដែលធ្លាប់ព្យាយាមទំនាក់ទំនងនាងថា៖«ទៅញ៉ាំបាយជាមួយបងទេ។ ចាំបងយកឡានមកយក។ ប្រសិនបើអត់លុយចាយអាចប្រាប់បងបាន។ ខ្វះខាតអីប្រាប់បងមកចាំបងជួយ កុំក្រែងចិត្ត។ អោយតែអូនទៅដើរលេងជាមួយបងអូនចង់បានអីក៏បានដែរ»។ កញ្ញា និមល បានឱ្យដឹងទៀតថា ធ្លាប់មានប្តីប្រពន្ធវ័យចំណាស់មួយគូរឈ្លោះប្រកែកគ្នាសឹងតែផ្អើលហាងរបស់ នាង ព្រោះស្ត្រីជាប្រពន្ធប្រចណ្ឌនឹងស្វាមីរបស់ខ្លួនដែលលួចមើលអ្នកលក់ជានារីវ័យក្មេង ខណៈពេល ដែលពួកគាត់ចូលមករកទិញទូរសព្ទដៃ។
ងាកមកស្តាប់ កញ្ញា មករា នៅខេត្តកំពង់ចាមវិញ។ កញ្ញាបានរិះគន់ថា៖«បុរសខ្លះ ចាស់ហើយនៅមិន គិតទៅរកធម៌អារ្យនោះទេ។ ឃើញស្រីស្អាតក្មេងៗមិនបាន ឌឺដងពាក្យសម្តីសួររកលេខទូរសព្ទ មិនតែប៉ុណ្ណោះ ហៅគេសុទ្ធតែអូន...»។ ក្នុងវ័យ២២ឆ្នាំ និងជាមន្ត្រីរាជការម្នាក់នៅក្នុងទីខេត្ត មករា បានរៀបរាប់ទៀតថា សហការីជាបុរសចំណាស់មួយចំនួននៅកន្លែងធ្វើការរបស់នាង ចូលចិត្តដើរកម្សាន្តសប្បាយតាមហាងខារ៉ាអូខេ ហើយយកមកអួតប្រាប់ និងចំអែចំអន់គ្នានៅកន្លែងធ្វើការទៀតផង។ មករា បន្តទៀតថា ពួកគាត់ធ្លាប់បង្ហាញរូបភាពស្និទ្ធស្នាលជាមួយនារីវ័យក្មេងៗនៅក្នុងហាង ខារ៉ាអូខេ ឱ្យនាងបានឃើញជាច្រើនដងផងដែរ។ យុវតីដដែលនេះបង្ហើបប្រាប់ទៀតថា៖«ចាស់ស្ទាវខ្លះ ចូលចិត្តនិយាយទូរសព្ទយូរៗរាប់ម៉ោងដូចក្មេងស្ទាវអ៊ីចឹង។ ពេលខ្លះច្រៀងអោយដៃគូរស្តាប់តាមទូរសព្ទ ទៅវិញទៅមកក៏មានដែរ»។
ដោយឆ្លងកាត់ការសង្កេតជាក់ស្តែង បុរសមួយចំនួនបានប្រើប្រាស់ពាក្យអាសអាភាសជាមួយនារីក្មេងៗដែលមានសម្រស់ស្អាត។ ពាក្យទាំងនោះជារួមមាន៖«ត្រកៀកស្អាតម្ល៉េះ? ដើមទ្រូងឡូយណាស់។ រាងអស់ទាស់តែម្តងហើយ...។ល»។
បើតាមលោកមេធាវីឯករាជ្យ សុក សំអឿន រាល់ទង្វើបោះពាក្យសម្តីលេបខាយផ្លូវស្នេហារបស់អ្នកមាន អំណាចណាម្នាក់ចំពោះមនុស្សម្នាក់ទៀត គឺជាការបៀតបៀនផ្លូវភេទ។ សម្រាប់លោក សុក សំអឿន «ទង្វើរបៀបនេះគឺខុសច្បាប់ និងអាចមានទោសជាប់គុកពីបទរំខានផ្លូវភេទ»។
យុវតីដែលបានជួបបុរសៗ និងបានផ្តល់បទសម្ភាសន៍ បានអំពាវនាវដូចៗគ្នាឱ្យបុរសវ័យចំណាស់ធ្វើជាគំរូល្អសម្រាប់ក្មេងជំនាន់ក្រោយ ដោយមិនគួរប្រព្រឹត្តិទង្វើដែលធ្វើអោយប៉ះពាល់ដល់សីលធម៌ សង្គមនោះឡើយ៕
© រក្សាសិទ្ធិដោយ thmeythmey.com