ជាតិ
សង្គមជាតិ
សហគមន៍បូរីកីឡាស្នើឲ្យអាជ្ញាធរសង់ផ្ទះបន្ថែមទៀត
× តំណាងពលរដ្ឋសហគមន៍បូរីកីឡាជាង ៥០នាក់ បានដាក់ញត្តិស្នើដល់អាជ្ញាធររាជធានីសាលាភ្នំពេញ និងគណៈកម្មការទី ១០ នៃរដ្ឋសភា ក្នុងគោលបំណងទាមទារឲ្យរាជរដ្ឋាភិបាល សាងសង់ផ្ទះនៅក្នុងបូរីកីឡាបន្ថែមទៀត។
ប្រជាពលរដ្ឋដែលកំពុងរស់នៅក្នុងសហគមន៍បូរីកីឡា ៥០នាក់ បានដាក់ញត្តិជំរុញដល់ រដ្ឋាភិបាលជួយសង់ផ្ទះបន្ថែមទៀត នៅថ្ងៃទី២ ខែមករា ឆ្នាំ២០១៥ ។ ញត្តិរបស់ពួកគេដែល ដាក់ឲ្យអាជ្ញាធរនោះ គឺដើម្បីជំរុញឲ្យរដ្ឋាភិបាលធ្វើការសាងសង់លំនៅឋាននៅក្នុងបុរីកីឡា បន្ថែមដល់ពលរដ្ឋជាង ២០០គ្រួសារ។
តំណាងសហគមន៍បូរីកីឡា អ្នកស្រី ការ៉ូ ហាន់នី បាននិយាយថា ពលរដ្ឋដែលកំពុងរស់នៅក្នុង បូរីកីឡាបច្ចុប្បន្ននេះ មានការប្រឈមមុខនឹងបញ្ហាសុខភាព និងការស្នាក់នៅ ដោយសារតែ ពួកគេមិនមានកន្លែងស្នាក់នៅសមរម្យនៅឡើយ។
អ្នកស្រីប្រាប់ថា៖«សហគមន៍បូរីកីឡាជាង ២០០គ្រួសារកំពុងប្រឈមមុខនឹងបញ្ហាជំងឺ ដោយ សារ ពួកគេរស់នៅក្នុងផ្ទះស័ង្កសី ហើយខ្លះទៀតស្នាក់នៅក្នុងតង់ប្លាស្ទិក ជិតសំរាមស្អុយ រលួយ»។
បើតាមតំណាងរូបនេះ អាជ្ញាធររាជធានីបានសន្យាថា នឹងកោះហៅតំណាងសហគមន៍បូរី កីឡាមកប្រជុំរកដំណោះស្រាយនៅសបា្តហ៍ក្រោយផងដែរ។
ទាន់ទិននឹងបញ្ហានេះដែរ នៅក្នុងទិវាសិទ្ធិមនុស្ស កាលពីថ្ងៃ១០ ធ្នូកន្លងមក អភិបាល រាជធានីភ្នំពេញ លោក ប៉ា សុជាតិវង្ស បានថ្លែងថា អាជ្ញាធរកំពុងរកដំណោះស្រាយជូន សហគមន៍ក្រីក្រនៅក្នុងរាជធានីភ្នំពេញសរុបជាង ៣០០សហគមន៍ ក្នុងនោះ សហគមន៍បូរី កីឡាមានជាង ១០០គ្រួសារ៕
© រក្សាសិទ្ធិដោយ thmeythmey.com