ជាតិ
សង្គមជាតិ
រដ្ឋាភិបាលផ្តល់ប័ណ្ណកម្មសិទ្ធិដីធ្លីចំនួន៣លាន៨សែន ដល់ដៃប្រជាពលរដ្ឋ លោក អ៊ឹម ឈុនលឹម រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់
× គិតត្រឹមថ្ងៃទី៣០ខែវិច្ឆិកាឆ្នាំ២០១៤ ក្រសួងរៀបចំដែនដីនគរូបនីយកម្ម និងសំណង់ បានចេញប័ណ្ណកម្មសិទ្ធិដីធ្លី ជូនដល់ដៃប្រជាពលរដ្ឋបានចំនួន៣លាន៨សែនប័ណ្ណ។ នេះបើយោងតាមសេចក្តីជូនដំណឹង របស់ក្រសួងរៀបចំដែនដីនគរូបនីយកម្ម និងសំណង់។
តាមសេចក្តីជូនដំណឹង ប័ណ្ណកម្មសិទ្ធិដីធ្លីដែលបានផ្តល់ដល់ដៃប្រជាពលរដ្ឋ រួមមានការអនុវត្តបទបញ្ជាលេខ០១បបនយោបាយចាស់សកម្មភាពលើវិស័យដីធ្លី ក្នុងការវាស់វែងដីធ្លី និងចេញប័ណ្ណកម្មសិទ្ធិជូនប្រជាពលរដ្ឋ បានចំនួន៦១ម៉ឺនប័ណ្ណ ក្នុងនោះប្រកាសតំបន់វិនិច្ឆ័យចំនួន៣៥៧ឃុំ បំពេញសាលាកបត្របានជាង៧១ម៉ឺនក្បាលដី និងបិទផ្សាយបានចំនួន៧១ម៉ឺនក្បាលដី។
ប្រភពដដែលបន្តថា ការចុះបញ្ចីដីធ្លីលក្ខណៈជាប្រព័ន្ធតាមរយៈកម្មវិធីអនុវិស័យរដ្ឋបាលដីធ្លី(LASSP) ទាំង២៥រាជធានី-ខេត្ត កំពុងអនុវត្តន៍នៅក្នុងស្រុកចំនួន១០០ ឃុំចំនួន៤៣៧ និង៣,៨៨៦ភូមិ បញ្ជូលទិន្នន័យបានជាង៣,១លានក្បាលដី បិទផ្សាយបានចំនួន២,៩លានក្បាលដី និងចែកប័ណ្ណកម្មសិទ្ធិជូនដល់ដៃប្រជាពលរដ្ឋបានចំនួន២,៦លានប័ណ្ណ។ ដោយឡែករដ្ឋាភិបាលបានសម្រេចការចុះបញ្ចីដីធ្លីមានលក្ខណៈដាច់ដោយដុំ និងចែកកម្មសិទ្ធិជូនប្រជាពលរដ្ឋបានចំនួន៦សែនប័ណ្ណ៕
© រក្សាសិទ្ធិដោយ thmeythmey.com