កីឡាជាតិ
ជាតិ
អាស៊ីអឺរ៉ុប មិនបានលេងក្នុងពាន Hun Sen Cup ឆ្នាំនេះទេ លោក ប៊ុន សម្បត្តិ គ្រូបង្វឹកក្រុមអាស៊ីអឺរ៉ុប
× ក្លិបបាល់ទាត់អាស៊ីអឺរ៉ុប ដែលមានកៅអីជាស្រេចនៅវគ្គ ១៦ ក្រុមចុងក្រោយនៃពានរង្វាន់លំដាប់ទី២ នៅកម្ពុជា គឺ ពាន Hun Sen Cup ឆ្នាំ ២០១៥ បែរជាមិនអាចបង្ហាញខ្លួនបានទេនៅក្នុងព្រឹត្តិការណ៍នេះដោយហេតុផលមួយចំនួន។
លោក ប៊ុន សម្បត្តិ ថ្នាក់ដឹកនាំក្លិបបាល់ទាត់សាកលវិទ្យាល័យអាស៊ីអឺរ៉ុប បានឱ្យដឹងថាក្លិបលោកមិនអាចបង្ហាញមុខក្នុងពានរង្វាន់នេះដោយសារមូលហេតុដាក់ពាក្យមិនទាន់គេ។ ស្ដាប់ទៅហាក់ដូចជារឿងគួរឱ្យអស់សំណើចមួយព្រោះក្រុមលេងដល់ក្នុងលីកកំពូលទៅហើយបែរជាមិនបានចាប់អារម្មណ៍ថ្ងៃបិទបញ្ជីចុះឈ្មោះចូលរួមប្រកួត។
ប៉ុន្ដែលោក ប៊ុន សម្បត្តិ បានពន្យល់មូលហេតុថាក្រោយចប់ប្រកួតលីកកំពូលកម្ពុជាឆ្នាំ ២០១៤ មកកីឡាករចាស់ៗ សឹងតែទាំងអស់បានចាកចេញពីក្រុមព្រោះតែក្លិបជួបបញ្ហាហិរញ្ញវត្ថុ។ ក្រោយមកក្រុមបានពិភាក្សាជាមួយដៃគូឧបត្ថម្ភ និង ប្រមូលកីឡាករក្មេងមកពីតាមខេត្តជំនួសកន្លែងទំនេរ តែយឺតពេលទៅហើយព្រោះសហព័ន្ធកីឡាបាល់ទាត់បានបិទបញ្ជីរួចរាល់។
ថ្នាក់ដឹកនាំក្រុមរូបនេះបានបន្ថែមថាក្លិបនឹងមានដៃគូឧបត្ថម្ភថ្មី ដែលនឹងប្រជុំសម្រេចនៅត្រឹមសប្ដាហ៍នេះ ដោយក្នុងនោះត្រូវពិភាក្សាគ្នារឿងឈ្មោះក្លិប ថាប្ដូរឬយ៉ាងណាថែមទៀតផង។
ទោះជាមិនបានចូលប្រកួតក្នុងពានរង្វាន់ Hun Sen Cup ក៏ពិតមែនតែក្រុមអាស៊ីអឺរ៉ុប កំពុងតែរកវិធីសាស្រ្តថ្មីសម្រាប់បង្ហាញខ្លួនក្នុងការប្រកួតពាន Metfone Cambodian League រដូវកាល ២០១៥ ទាំងពង្រឹកកីឡាករក្នុងស្រុក និង កីឡាករបរទេស ថ្មីៗទៀត ដើម្បីប្រជែងរកតំណែងល្អមួយ៕
© រក្សាសិទ្ធិដោយ thmeythmey.com