សង្គមអន្តរជាតិ
អន្តរជាតិ
លោក Bill Gates ផឹកទឹកដែលច្នៃចេញពីទឹកលូដោយម៉ាស៊ីនតម្លៃ ១,៥ លានដុល្លារ
×
ក្នុងខ្សែវីឌេអូមួយ លោក Bill Gates ក្នុងនាមជាមហាសេដ្ឋី និងជាអ្នកធ្វើការមនុស្សធម៌ផងនោះ បានបង្ហាញនូវសមិទ្ធផលថ្មីមួយ ពីការច្នៃប្រឌិតដោយបច្ចេកវិទ្យាខ្ពស់ គឺម៉ាស៊ីនចម្រោះ និងកែច្នៃ កាកសំណល់ក្នុងលូទឹកស្អុយ ឲ្យក្លាយជាទឹកស្អាតសម្រាប់ផឹកវិញបាន។
តាមរយៈខ្សែវីឌេអូនោះ លោក Bill Gates បានយកទឹកមួយកែដែលចេញពីម៉ាស៊ីនចម្រោះដ៏ទំនើបនេះ មកពិសាររួចហើយក៏ញញឹម ហើយបាននិយាយថា «ទឹកនេះមានគុណភាពល្អ» ប៉ុន្តែទឹកដែលលោកបានផឹកនេះ គឺពេលមុនេះជាទឹកនៅក្នុងលូទឹកស្អុយនោះទេ។
ម៉ាស៊ីនកែច្នៃOmniProcessorដ៏ទំនើបនេះ គឺផលិតឡើងដោយសហគ្រាស Janicki Bioenergy មានមូលដ្ឋាននៅសហរដ្ឋអាមេរិក ដោយវាមានសមត្ថភាពកែច្នៃកាកសំណល់ពីលូទឹកស្អុយបាន ១៤ តោន ដែលបានប្រើប្រាស់ដោយមនុស្សជាង ១០ ម៉ឺននាក់ក្នុងមួយថ្ងៃៗ និង។ ក្រៅពីផលិតបានជាទឹកស្អាតម៉ាស៊ីននេះ វាអាចដំណើរការខ្លួនវាបានដោយប្រើប្រាស់ម៉ាស៊ីនដើរដោយចំហាយទឹក និងមិនបំភាយក្លិនស្អុយនោះទេ ហើយវាអាចផលិតទឹកស្អាតបាន ៨៦ ០០០ លីត្រ និងថាមពលអគ្គិសនី ២៥០ គីឡូវ៉ាត់ផងដែរ។
បើតាមលោក Gates មនុស្ស ២,៥ពាន់លាននាក់ឬ៤០ភាគរយនៃប្រជាជនទូទាំងពិភពលោកមិនបានទទួលអនាម័យដែលមានសុវត្ថិភាពនោះទេហើយមនុស្សជាច្រើនបានប្រើកន្លែងដែលមិនមានសុវត្ថិភាព សម្រាប់បោះចោលកាកសំណល់របស់មនុស្ស។លោកបញ្ជាក់ថា វាជាតម្លៃខ្ពស់ខ្លាំងណាស់ដើម្បីព្យាយាមនិងបង្កើតហេដ្ឋារចនាសម្ព័ន្ធ គ្រប់គ្រងទឹកស្អុយនៅទីក្រុងនិងទីប្រជុំជនដូច្នេះលោកបានស្នើឲ្យរដ្ឋាភិបាលក្នុងប្រទេសនីមួយ គួរទិញម៉ាស៊ីនដែលតម្លៃទាបនេះ ដើម្បីសុវត្ថិភាពរបស់ប្រជាជន។
សូមបញ្ជាក់ថា ម៉ាស៊ីន OmniProcessor នេះ នឹងត្រូវចាប់ផ្ដើមប្រើសាកល្បងនៅក្នុងទីក្រុង ដាកា ប្រទេសសេណេហ្គាល់នៅចុងឆ្នាំ ២០១៥ នេះ៕
© រក្សាសិទ្ធិដោយ thmeythmey.com