អន្តរជាតិ
នយោបាយអន្តរជាតិ
រូបត្លុកជាដើមហេតុវាយប្រហារទស្សនាវដ្តីរបស់ភេរវជននៅបារាំង
×
ព្រឹត្តការណ៍វាយប្រហារនិងសម្លាប់រង្គាលនៅក្នុងការិយាល័យទស្សនាវដ្តីនៅក្នុងប្រទេសបារាំងដោយបណ្តាញក្រុមភេវកម្ម បានធ្វើអោយពិភពលោកតក់ស្លុតនិងព្រួយបារម្ភជាខ្លាំង។ មនុស្សប្រហែល១២នាក់ត្រូវបានគេបាញ់ស្លាប់ពីម្សិលមិញភាគច្រើនជាអ្នកសារព័ត៌មានដែលគូររូបត្លុកនយោបាយ។ ក្រោយការវាយប្រហារ បណ្តាមេដឹកនាំពិភពលោលបានប្រកាសថ្កោលទោស និងប្រកាន់ជំហរសហការគ្នាប្រយុទ្ធប្រឆាំងរាល់ទម្រង់សកម្មភាពភេរវកម្ម។ តាមពិតទៅទស្សនាវដ្តី Charlie Hebdo ដែលរងការវាយប្រហារនេះជាមុខសញ្ញារបស់ក្រុមភេរវជនយូរឆ្នាំមកហើយ ហើយក៏ទទួលការគំរាម និងព្រមានច្រើនដងមកហើយដែរ។ យ៉ាងណាក៏ដោយ ការវាយប្រហារម្សិលមិញកើតឡើងត្រឹមមួយម៉ោងប៉ុណ្ណោះក្រោយស្ថាប័ននេះផ្សាយរូបត្លុកមេដឹកនាំកំពូលក្រុមភេរវជនរដ្ឋឥស្លាម ប៉ុន្តែតាមការសន្និដ្ឋានការវាយប្រហារជាគម្រោងដែលរៀបចំឡើងយូរមកហើយដោយក្រុមភេរវជន ហើយរូបត្លុកជាដើមហេតុនៃការវាយប្រហាររបស់ក្រុមភេរជន។
សូមស្តាប់ការបកស្រាយរបស់លោក សៅ ផលនិស្ស័យ ឆ្លើយតបទៅនឹងការចោទសួររបស់លោក ជាវ សំណាង ទាក់ទិននឹងបញ្ហានេះ៖
១. សំណួរ៖ ក្រោយការវាយប្រហារលើការិយាល័យទស្សនាវដ្តីបារាំងកាលពីម្សិលមិញ កងកម្លាំងប្រឆាំងភេរវកម្មតាមប្រមាញ់ក្រុមជនសង្ស័យទាំងនោះ។ តើមកទល់ពេលនេះប្រតិបតិ្តការប្រមាញ់ជនសង្ស័យទាំងនោះដល់ណាហើយបាទ?
១.ចម្លើយ៖ ទាក់ទិននឹងព័ត៌មាននៃការតាមប្រមាញ់ក្រុមជនសង្ស័យទាំងបីនាក់ កាលពីព្រឹកមិញនៅក្នុងភាពចម្រូងចម្រាងនៅឡើយ ដោយមានព័ត៌មានខ្លះអះអាងថា ជនសង្ស័យពីរនាក់ត្រូវបានចាប់ខ្លួន និងម្នាក់ផ្សេងទៀតនេះនោះស្លាប់បាត់បង់ជីវិត ខ្លះអះអាងថាជនសង្ស័យម្នាក់ចុះចូលជាមួយប៉ូលីស ហើយពីរនាក់កំពុងស្ថិតក្រោមការចាប់ខ្លួន។ ប៉ុន្តែអាជ្ញាធរបារាំងមិនបានទទួលស្គាល់ពីព័ត៌មានដែលថាជនសង្ស័យត្រូវបានសម្លាប់ឡើយ។ បើតាមព័ត៌មានដែលអាចទុកចិត្តបាន ផ្តល់ដោយអ្នកនាំពាក្យរដ្ឋអាជ្ញាបារាំង ជនសង្ស័យម្នាក់វ័យក្មេងជាងគេបានចុះចូលអោយប៉ូលីសចាប់ខ្លួន ខណៈពេលជនសង្ស័យជាបងប្អូនពីរនាក់ទៀតនោះកំពុងស្ថិតក្រោមការចាប់ខ្លួននៅឡើយ។ ចំណែកនាយករដ្ឋមន្ត្រីបារាំងលោក Manuel Valls បានបញ្ជាក់ថាមកទល់ថ្ងៃនេះ ប៉ូលីសបានចាប់ខ្លួនមនុស្សយ៉ាងហោចណាស់ ៧នាក់ដែលគេសង្ស័យថាជាប់ពាក់ព័ន្ធនឹងករណីវាយប្រហារនេះផងដែរ។ គេកំពុងបន្តរងចាំមើលថា តើអ្នកជាអ្នកនៅពីក្រោយករណីវាយប្រហារដ៏ព្រៃផ្សៃនេះ។
២.សំណួរ៖ និស្ស័យ ខ្ញុំនៅមិនដឹងច្បាស់នៅឡើយពីអត្តសញ្ញាណជនសង្ស័យសំខាន់ៗទាំងបីនាក់នោះ។ សូមនិស្ស័យជួយរៀបរាប់បន្តិចបានទេបាទ?
២.ចម្លើយ៖ បាទ ជនសង្ស័យទាំងបីនាក់ត្រូវបានគេកំណត់អត្តសញ្ញាណបានអស់ហើយ។ជនសង្ស័យពីរនាក់ជាបងប្អូនជាមួយគ្នាមានវ័យ ៣២ឆ្នាំ និង ៣៤ឆ្នាំ ក្នុងនោះមានម្នាក់ធ្លាប់រងការកាត់ទោសដោយសារជាប់បណ្តាញក្រុមសកម្មប្រយុទ្ធដែលបញ្ជូនកម្លាំងប្រដាប់អាវុធទៅធ្វើសង្គ្រាមជីហាតនៅអ៊ីរ៉ាក់។ ជនសង្ស័យទាំងពីរសុទ្ធតែកើតនៅក្នុងក្រុងប៉ារីស ។ ជនសង្ស័យម្នាក់ទៀតមានម្នាក់វ័យក្មេងជាងគេអាយុទើបតែ ១៨ឆ្នាំប៉ុណ្ណោះមានឈ្មោះថា Mourad Hamyd ហើយជននេះបានចុះចូលទៅប៉ុស្តិ៍ប៉ូលីស ប៉ុន្តែគេមិនបានបញ្ជាក់ច្បាស់ពីទំនាក់ទំនងរវាងជននេះនិងបងប្អូនពីរនាក់ដែលកំពុងស្ថិតក្រោមការចាប់ខ្លួនឡើយ។ គេសង្ស័យថាជនទាំងបីនាក់ជាប់ពាក់ព័ន្ធ ឬជាបណ្តាញក្រុមភេរជនអាល់កៃដា យេម៉ែនផងដែរ ប៉ុន្តែការស៊ើបអង្កេតកំពុងបន្តទៅមុខដើម្បីរកការពិត។
៣.សំណួរ៖ និស្ស័យ គេសន្និដ្ឋានថាការវាយប្រហារលើអ្នកសារព័ត៌មានបារាំងជាចលនាភេរវកម្ម ហើយមុនមានការវាយប្រហារនេះ ស្ថាប័ននោះក៏បង្ហោះរូបត្លុកដែលប្រមាថមេដឹកនាំក្រុមរដ្ឋឥស្លាមថែមទៀតផង។ តើនិស្ស័យយល់ថា ក្រុមរដ្ឋឥស្លាមជាអ្នកនៅពីក្រោយករណីនេះឬយ៉ាងណាទៅបាទ?
ចម្លើយ៖ បើនិយាយជារួមគេអាចនិយាយបានថាជាចលនារបស់ក្រុមភេរវជនប្រាកដណាស់ ប៉ុន្តែបើនិយាយថាជាទង្វើរបស់ក្រុមណាមួយវាជារឿងពិបាកសន្និដ្ឋាន។វាពិតជាមានរឿងដូច្នេះមែន ទស្សនាវដ្តី Charlie Hebdoបានគូរនិងបោះពុម្ភផ្សាយរូបត្លុកទាក់ទិននឹងរឿងចម្រូសចម្រាសច្រើនជាច្រើនផ្នែកសាសនា នយោបាយ និងសង្គមជាច្រើន ជាពិសេសទាក់ទងនឹងមេដឹកនាំនយោបាផងដែរ។ មុនមានករណីវាយប្រហារ ស្ថាប័នទស្សនាវដ្តីរូបត្លុកនេះបានបោះពុម្ភរូបត្លុកជាច្រើនទាក់ទងនឹងការរិះគន់ក្រុមភេរវជនរដ្ឋឥស្លាម ហើយមួយម៉ោងមុនការវាយប្រហារគេឃើញមានរូបត្លុកចម្អកអោយមេដឹកនាំក្រុមរដ្ឋឥស្លាម Abu Bakr al-Badaghdi ថែមទៀតផង។ ប៉ុន្តែយ៉ាងណាក៏ដោយក្រុមភេរវជនបានរៀបចំគម្រោងយូរហើយមុនវាយប្រហារ ហើយស្ថាប័នទស្សនាវដ្តីនេះក៏ជាមុខសញ្ញានៃក្រុមភេរវជនយូរមកហើយដែរ។ គួរបញ្ជាក់បន្តិចថា កាលពីឆ្នាំ ២០១១ ស្ថាប័ននេះធ្លាប់រងការវាយប្រហារដោយគ្រាប់បែកក្រោយពេលដែល ក្រោយទស្សនាវដ្តីនេះបោះពុម្ភផ្សាយរូបថ្លុកចម្អកអោយមេដឹកនាំសាសឥស្លាម Muhammad។ បើទោះជាមានការគំរាមកំហែងច្រើនដងក៏ដោយ ក៏ស្ថាប័ននេះមិនបានបញ្ឈប់សកម្មភាពរបស់ខ្លួនដែរ រហូតដល់មានការវាយប្រហារដូច្នេះ។
៤.សំណួរ៖ ជាសំណួរចុងក្រោយរបស់ខ្ញុំ និស្ស័យ ក្រោយករណីវាយប្រហារ មេដឹកនាំពិភពលោកជាច្រើន បានបង្ហាញការតក់ស្លុត និងថ្កោលទោសក្រុមភេរវជនទាំងនោះផងដែរ។ តើមេដឹកនាំទាំងនោះមានលើកឡើងពីវិធានការទប់ស្កាត់ចលនាភេរវកម្មនិងសោកនាដកម្មនេះដែរឬយ៉ាងណា ?
៤.ចម្លើយ៖ កាលម្សិលមិញនេះគេឃើញមានមេដឹកនាំពិភពលោកជាច្រើននាក់ដែលចេញមុខថ្កោលទោសក្រុមភេរវជនដែលនៅពីក្រោយការវាយប្រហារ ប៉ុន្តែគេមិនទាន់មានការលើកឡើងពីការទប់ស្កាត់និងប្រឆាំងក្រុមភេរជនឡើយ។ ម្សិលមិញប្រធានាធិបតីអាមេរិកលោក បារ៉ាក់ អូបាម៉ា រដ្ឋមន្ត្រីការបរទេសអាមេរិក ចន ឃឺរី នាយករដ្ឋមន្ត្រីអង់គ្លេស ដេវីដ ខេមេរ៉ូន និងលោកស្រីអធិការបតីអាឡឺម៉ង់ អេនជេឡាមឺហ្កែល បានសម្តែងការសោកស្តាយនិងរំលែកទុក្ខដល់ក្រុមគ្រួសារជនរងគ្រោះ និងរដ្ឋាភិបាលបារាំងរបស់លោក ហ្វ្រង់ស្វ័រ ហូឡង់។ ក្រៅពីចូលរួមរំលែកទុក្ខពួកគេបានប្រកាសផ្តល់ជំនួយដល់សម្ព័ន្ធមិត្តខ្លួនបារាំងបើចាំបាច់ ហើយអធិការបតីអាឡឺម៉ង់បានស្នើអោយមានការសហការគ្នារវាងប្រទេសនៅអឺរ៉ុប និងបណ្តាមិត្តផ្សេងទៀតដោះស្រាយនិងប្រយុទ្ធប្រឆាំងក្រុមភេរវជន។ ដោយឡែកបណ្តាមេដឹកនាំប្រទេសឥស្លាមក៏ចេញមុខថ្កោលទោសករណីវាយប្រហារនេះផងដែរ។ ពួកគេប្រកាសចូលរួមគ្នាដើម្បីប្រឆាំងក្រុមឥស្លាមជ្រុលនិយមផងដែរ។
© រក្សាសិទ្ធិដោយ thmeythmey.com