អន្តរជាតិ
៣នាក់ស្លាប់និងជាង១០០នាក់រងរបួសដោយភ្លើងឆេះអាគារនៅកូរ៉េខាងត្បូង
× មនុស្សយ៉ាង្ហោចណាស់៣នាក់ស្លាប់និងជាង១០០នាក់រងរបួសនៅក្នុងឧបទ្ទវហេតុភ្លើងឆេះអាគារមួយកន្លែងនៅក្នុងប្រទេសកូរ៉េខាងត្បូង។ នេះបើយោងតាមសារព័ត៌មាន Channel News Asia ។
មនុស្សបីនាក់បានស្លាប់បាត់បង់ជីវិតនិងមនុស្សច្រើនជាង ១០០នាក់ផ្សេងទៀតបានរងរបួសដោយសារករណីភ្លើងឆេះអាគារផ្ទះល្វែងនៅភាគខាងជើងទីក្រុងសេអ៊ូលប្រទេសកូរ៉េខាងត្បូងនៅថ្ងៃសៅរ៍នេះ។ ក្រោយឧបទ្ទវហេតុកើតឡើង ក្រុមពន្លត់អគ្គីសភ័យកំពុងស្វះស្វែងជួយពន្លត់ភ្លើងនិងជួយសង្រ្គោះមនុស្សដែលស្ថិតនៅលើអាគារ ចំណែកចំនួនមនុស្សស្លាប់ឬរបួសជាក់លាក់មានការកើនឡើងយ៉ាងណានោះមិនទាន់ដឹងច្បាស់នៅឡើយទេ។
បើតាមការអោយដឹងពីសំណាក់មន្ត្រីពន្លត់អគ្គីភ័យចំនួនអ្នកស្លាប់អាចនឹងកើនឡើងបន្ថែមទៀតនៅក្នុងករណីភ្លើងឆេះអាគារផ្ទះល្វែងនៅក្នុងទីក្រុង Enijeongbu ដោយសារតែចំនួនអ្នករងរបួសប្រហែល៧នាក់ផ្សេងទៀតនោះកំពុងស្ថិតក្នុងសភាពធ្ងន់ធ្ងរផងដែរ។ បើតាមចៅហ្វាយក្រុងផ្ទាល់ ចំនួនមនុស្សសរុបនៅក្នុងផ្ទះល្វែងកម្ពស់១០ជាន់នោះមានរហូតដល់ ១៧៥នាក់ឯណោះ។
ដោយឡែកទាក់ទិនមូលហេតុដែលបណ្តាលអោយភ្លើងឆេះនោះគេមិនបានដឹងច្បាស់ដូចគ្នាដែរ ប៉ុន្តែគេសន្និដ្ឋានថា ភ្លើងចាប់ផ្តើមឆេះពីជាន់ផ្ទាល់ដីដោយឆេះប្រអប់សំបុត្រមួយ ហើយវាក៏បន្តឆេះរាលរហ័សដល់ជាន់លើថែមទៀត។ យ៉ាងណាក៏ដោយគេជឿថាភ្លើងឆេះអាគារជាករណីលួចដុតដែលមានជនដែលមានចេតនាអាក្រក់ជាអ្នកប្រព្រឹត្តអំពើនេះ។ ចំណែកបញ្ហាមួយទៀតនោះគឺអាជ្ញាធរមិនអាចជួយជម្លៀសប្រជាជនរស់នៅលើអាគារបានរហ័សឡើយព្រោះតែច្រកចេញខាងមុខពេញដោយអណ្តាតភ្លើងនិងផ្សែងថែមទៀតផង។ប្រជាជនដែលភ័យស្លន់ស្លោរដោយសារអគ្គិភ័យនេះក៏មិនអាចចេញរួចតាមច្រកខាងមុខនេះដែរ។
ឥឡូវនេះ គេឃើញឡានទឹកចំនួន ២៥គ្រឿង ឧទ្ធម្ភាគចក្រប្រហែល ៤គ្រឿង និងកងកម្លាំងពន្លត់អគ្គីភ័យប្រហែល១៤៥នាក់ផងដែរ ត្រូវបានគេពង្រាយដើម្បីជួយពន្លត់អគ្គិភ័យដ៏សាហាវនេះផងដែរ។ ប៉ូលីសរំពឹងថាក្រុមពន្លត់អគ្គិភ័យជាច្រើននាក់នឹងមានលទ្ធភាពគ្រប់គ្រងករណីភ្លើងឆេះនេះមិនអោយឆេះកាន់តែខ្លាំងឡើង។ គេនឹងបន្តស៊ើបអង្កេតរកមូលហេតុជាក់លាក់ដែលបង្កអោយមានភ្លើងឆេះនេះ៕
© រក្សាសិទ្ធិដោយ thmeythmey.com