អន្តរជាតិ
អាល់កៃដាយេម៉ែនទទួលខុសត្រូវការវាយប្រហារនៅបារាំងដោយចាត់ទុកជាការសងសឹក
× ក្រុមភេរវជនអាល់កៃដាយេម៉ែនបានប្រកាសទទួលខុសត្រូវចំពោះការវាយប្រហារនៅក្នុងទស្សនាវដ្តី Charlie Hebdoនៅប្រទេសបារាំង ហើយអះអាងថាវាជាការសងសឹកមួយ។ ពួកគេអះអាងថាគេចង់សងសងបារាំងដែលហ៊ានប្រមាថព្យាការីសាសនា Mohammad ដ៏ខ្ពង់ខ្ពស់របស់ពួកគេកន្លងមកនេះ។
រាយការណ៍ព័ត៌មានដោយ លោក រឿន ភារុន
ក្រោយមានករណីវាយប្រហារទស្សនាវដ្តីបារាំង Charlie Hebdo ក្រុមភេរវជនអាល់កៃដា នៅក្នុងប្រទេសយេម៉ែនបានប្រកាសទទួលខុសត្រូវចំពោះការវាយប្រហារនោះ ដោយអះអាងថា វាជាការសងសងប្រជាជនបារាំង។ នៅក្នុងអត្ថបទដែលផ្សាយដោយ ទីភ្នាក់ងារព័ត៌មាន AP គេមើលថា ក្រុមភេរវជនអាល់កៃដាយេម៉ែននោះបានប្រកាសថា ពួកគេចង់សងសឹកបារាំងដែលហ៊ានប្រមាថមាក់ងាយមេដឹកនាំសាសនា ឬព្យាការី Mohammad កន្លងមកនេះ។
នៅក្នុងខ្សែអាត់វីដេអូមួយ ដែលបង្ហោះក្រោយការវាយប្រហារនៅបារាំងរបស់មេដឹកនាំក្រុម អាល់កាដានៅឧទ្វីបអារ៉ាប់ គេឃើញមេដឹកក្រុមអាល់កៃដាSheikh Hareth al-Nadhari បានអះអាងថា សោកនាដកម្មនៅបារីសជាលទ្ធផលនៃការប្រមាថមាក់ងាយមេដឹកនាំ សាសនា ហើយមេដឹកនាំក្រុមភេរវជនខាងលើបានសាទរចំពោះភាពក្លាហាន របស់ក្រុមភេរវជននៅបារាំងដោយហៅពួកគេថាទាហាននៃព្រះផងដែរ។
យ៉ាងណាក៏ដោយ ពួកគេបានបញ្ជាក់ទៀតថា គោលដៅនៃការវាយប្រហារមិនមែនតែទៅលើទស្សនាវដ្តីឡើយ ប៉ុន្តែប្រទេសបារាំងនិងប្រជាជនបារាំងជាទូទៅ ព្រោះបារាំងនេះក៏ចូលរួមយ៉ាងសកម្ម ផងដែរក្នុងការធ្វើសង្គ្រាមប្រឆាំងឥស្លាម និងធ្វើទុក្ខបុកម្នេញលើប្រទេសនិងប្រជាជនប្រកាន់ សាសនាឥស្លាមផ្សេងទៀត។
ក្រុមភេរវជនអាល់កាល់ដាខាងលើ មិនត្រឹមតែលើកឡើងពីការវាយប្រហារសងសឹកបារាំង ដែលហ៊ានប្រមាថមេដឹកនាំសាសនារបស់ខ្លួនឡើយ ពួកគេបានព្រមានជាស្រេចចំពោះ រាល់បណ្តាប្រទេសដែលសកម្មក្នុងការធ្វើសង្គ្រាមប្រឆាំងភេរវកម្មមានដូចជាអាមេរិក អង់គ្លេសនិង បារាំងផងនោះអោយប្រុងប្រយ័ត្ននិងត្រៀមខ្លួនអោយស្រេចរង់ចាំទទួលលទ្ធផល ដែលពួកគេបានធ្វើប្រឆាំងក្រុមឥស្លាមនោះ។ មេដឹកនាំក្រុមអាល់កៃដាផ្សេងទៀតបានផ្ញើរ សារទៅកាន់បណ្តាប្រទេសលោកខាងលិចជាពិសេសសហរដ្ឋអាមេរិក ចំពោះលទ្ធផល ដែលពួកគេនឹងទទួលបានដោយសារការអនុវត្តគោលនយោបាយឈ្លានពាន និងគោលនយោបាយប្រឆាំងក្រុមភេរវជននៅក្នុងតំបន់មជ្ឈិមបូព៌ាផងដែរ។
គេឃើញមានសម្តីមួយឃ្លារបស់ក្រុមអាល់កៃដាដោយបញ្ជាក់ថា៖«ប្រសិនបើពួកអ្នកឯងមិន ត្រួតពិនិត្យសេរីភាពនៃការបញ្ចេញពាក្យស្តីរបស់អ្នកនោះទេ អ្នកគួរតែបើកបេះដូងរបស់អ្នក ទទួលយកសកម្មភាពរបស់ពួកយើង»។ ការវាយប្រហារនៅបារាំងបន្តបន្ទាប់គ្នានេះជា សារមួយទៅកាន់បណ្តាប្រទេសលោកខាងលិច ជាពិសេសសហរដ្ឋអាមេរិក ដែលមរមារញឹក ខ្លាំងក្នុងការវាយប្រហារនិងធ្វើសង្គ្រាមប្រឆាំងភេរវជន។ ពួកគេត្រូវប្រុងប្រយ័ត្ន និងត្រៀម លក្ខណៈសម្រាប់ទប់ទល់និងដោះស្រាយបញ្ហានេះ ដើម្បីបញ្ចៀសអោយបាននូវគ្រោះមហន្ត រាយនិងសោកនាដកម្មផ្សេងទៀតផងដែរ៕
© រក្សាសិទ្ធិដោយ thmeythmey.com