អន្តរជាតិ
អូស្ត្រាលី៖ បុរសពីរនាក់ត្រូវបានចាប់ខ្លួនក្នុងប្រតិបត្តិការប្រឆាំងភេរវជន
× បុរសពីរនាក់ត្រូវបានប៉ូលីសអូស្ត្រាលីចាប់ខ្លួន ដោយបុរសម្នាក់ត្រូវបានប៉ូលីសរកឃើញថាមានកាន់អាវុធដោយគ្មានការអនុញ្ញាត ។ ការចាប់ខ្លួនមនុស្សពីរនាក់នៅអូស្ត្រាលីនេះកើតមានឡើងនៅពេលដែលប៉ូលីសចាប់ផ្តើមបើកប្រតិបត្តិការប្រឆាំងក្រុមភេរវជននៅក្នុងប្រទេស ដ្បិដប្រជាជនអូស្ត្រាលីច្រើននាក់បានរត់ឆ្លងដែនទៅធ្វើសង្គ្រាមជាមួយក្រុមភេរវជនរដ្ឋឥស្លាមនៅក្នុងទឹកដីស៊ីរី និងអ៊ីរ៉ាក់។
ប៉ូលីសអូស្ត្រាលីបានចាប់ខ្លួនបុរសពីរនាក់ នៅក្នុងប្រតិបត្តិការតាមប្រឆាំងក្រុមភេរវជននៅភាគនារតីប្រទេស ក្នុងនោះប៉ូលីសបានចាប់បុរសម្នាក់ដែលកាន់អាវុធក្នុងដៃដែលមិនមានការអនុញ្ញាតត្រឹមត្រូវតាមច្បាប់ឡើយ។ ការឈានទៅដល់ការចាប់ខ្លួននេះដែរកើតឡើងក្រោយពេលដែលអាជ្ញាធរអូស្ត្រាលីបើកការស៊ើបអង្កេតករណីពាក់ព័ន្ធនឹងជនជាតិអូស្ត្រាលីដែលបានជាប់ពាក់ព័ន្ធនិងនៅពីក្រោយក្រុមសកម្មប្រយុទ្ធនៅប្រទេសស៊ីរីនិងអ៊ីរ៉ាក់កន្លងមកនេះ។
កាលពីថ្ងៃសុក្រមន្ត្រីប៉ូលីសបានចាប់ខ្លួនបុរសម្នាក់ ក្នុងពេលប្រតិបត្តិការឆែកឆេរផ្ទះបួនកន្លែងនៅភាគនារតីទីក្រុងស៊ីដនី ហើយប៉ូលីសបញ្ជាក់ថាការចាប់ខ្លួនជាផ្នែកមួយនៃការស៊ើបអង្កេត ប៉ុន្តែមិនមែនបញ្ជាក់ថាជននេះជាសញ្ញាច្បាស់លាស់នៃក្រុមភេរវជនឡើយ។ ចំពោះជនសង្ស័យដែលត្រូវចាប់ខ្លួននោះ មានម្នាក់មានវ័យ ២១ឆ្នាំ និងម្នាក់ទៀតមានវ័យ ៣៣ឆ្នាំ ពួកគេសុទ្ធតែប្រើប្រាស់អាវុធខុសច្បាប់ដូចគ្នា។ យ៉ាងណាក៏ដោយមិនមានសញ្ញាណាមួយបញ្ជាក់ថា ពួកគេមានជាប់ពាក់ព័ន្ធនឹងក្រុមភេរវជនឡើយ។
ដោយឡែកប៉ូលីសបានលួចបញ្ជាក់បន្ថែមថា ការស៊ើបអង្កេតនេះធ្វើឡើងអស់ពេលយូរហើយ ដែលការស៊ើបអង្កេតនេះធ្វើឡើងដោយមានការសង្ស័យថាមានការផ្តល់ជំនួយឧបត្ថម្ភគាំទ្រផ្នែកហិរញ្ញវត្ថុ ដល់ក្រុមសកម្មប្រយុទ្ធក្នុងជម្លោះនៅប្រទេសស៊ីរី និងអ៊ីរ៉ាក់។ ប៉ុន្តែមិនមានពាក់ព័ន្ធករណីចាប់ចំណាប់ខ្មាំង១៦ម៉ោង នៅក្នុងហាងកាហ្វេមួយកន្លែងកាលពីពាក់កណ្តាលខែធ្នូនោះឡើយ។
ការព្យាយាមបោសសម្អាតក្រុមដែលមានជាប់់ពាក់ព័ន្ធជាមួយភេរវជនរដ្ឋឥស្លាម ជាវិធានការមួយសំខាន់របស់រដ្ឋាភិបាលអូស្ត្រាលី ដើម្បីរក្សាសន្តិសុខ និងស្ថិរភាព បញ្ចៀសអោយបាននូវគ្រោះថ្នាក់និងការវាយប្រហារនានា។ រដ្ឋាភិបាលអូស្ត្រាលីធ្លាប់ប្រាប់អោយដឹងម្តងហើយថា ជនជាតិអូស្ត្រាលីយ៉ាងហោចណាស់៧០នាក់កំពុងតែបន្តធ្វើសង្គ្រាមជាមួយក្រុមភេរវជនរដ្ឋឥស្លាមនៅស៊ីរីនិងអ៊ីរ៉ាក់ ហើយមកទល់ពេលនេះពួកគេយ៉ាងហោចណាស់២០នាក់បានស្លាប់បាត់បង់ជីវិត។
កាលពីឆ្នាំមុននេះដែរ សភាអូស្ត្រាលីបានអនុម័តច្បាប់ថ្មីមួយដោយកំណត់យកការឆ្លងទៅចូលរួមជាមួយក្រុមភេរវជនរដ្ឋឥស្លាមជាបទឧក្រិដ្ឋ ហើយពួកគេអាចនឹងប្រឈមមុខនឹងការជាប់ពន្ធនាគារ១០ឆ្នាំបើគេរងការចោទប្រកាន់ពីបទឆ្លងដែនទៅចូលរួមជាមួយក្រុមភេរវជនមែននោះ៕
© រក្សាសិទ្ធិដោយ thmeythmey.com