ពលរដ្ឋញាប់ដៃធ្វើត្រីប្រហុក អំឡុងវដូវត្រីកំពុងត្រូវ

ជាតិ

សង្គមជាតិ

ពលរដ្ឋញាប់ដៃធ្វើត្រីប្រហុក អំឡុងវដូវត្រីកំពុងត្រូវ

11, Jan 2015 , 8:30 pm

រូបភាព

ដោយ:

កំពង់ចាម៖ ប្រជាពលរដ្ឋជាច្រើនជាពិសេសនៅតាមទីជនបទកំពុងមមាញឹកធ្វើត្រីប្រហុក នៅក្នុងអំឡុងរដូវត្រីត្រូវ និងមានតម្លៃថោក។ អ្នកខ្លះញាប់ដៃធ្វើប្រហុក អ្នកខ្លះធ្វើផ្អក អ្នកខ្លះទៀតកំពុងញាប់ដៃធ្វើទឹកត្រី ដើម្បីត្រៀមទុកទទួលទាននៅពេលខ្សត់ម្ហូបអាហារ ឬនៅពេលម្ហូបអាហារឡើងថ្លៃខ្ពស់។

ជាក់ស្តែង នៅពេលគេឈានជើងចូលដល់ក្នុងភូមិប្រសំ ឃុំរអាង ស្រុកកំពង់សៀម ដែលមានចំងាយប្រមាណជា ៣គីឡូម៉ែត្រពីទីរួមខេត្តកំពង់ចាមភ្លាម គេសង្កេតឃើញប្រជាពលរដ្ឋជាច្រើនគ្រួសារនាំគ្នាញាប់ដៃ កាត់ព្រុយ វះពោះត្រីជាក្រុមៗ ។ ជាមួយគ្នានោះ ក្លិនប្រហុកក៏ចាប់ផ្តើមភាយចេញពីលំនៅដ្ឋានរបស់ប្រជាពលរដ្ឋមួយចំនួនផងដែរ។ បើគេសង្កេតមើលនៅតាមផ្ទះបាយមួយចំនួនវិញ គេឃើញ មានឆ្នាំងធំៗ កំពុងស្ងោររម្ងាស់ដើម្បីចំរាញ់ធ្វើទឹកត្រី។

អ្នកស្រី យ៉ា ជាអ្នករស់នៅក្នុងភូមិប្រសំនេះបានឱ្យដឹងថា អ្នកស្រីធ្វើត្រីប្រហុកចំនួនបីថ្ងៃមកហើយ បានប្រហុក ផ្អក ប្រមាណជា ៥០គីឡូក្រាម និងបានចំរាញ់ធ្វើទឹកត្រីបានជាច្រើនលីត្រផងដែរ។ អ្នកស្រីឱ្យដឹងទៀតថាអ្នកស្រីតែងតែធ្វើវាជារៀងរាល់ឆ្នាំ។ នៅឆ្នាំនេះត្រីដែលឈ្មួញយកមកលក់ដល់ភូមិតែម្តងនោះ មានតម្លៃពី១៤០០រៀល ទៅ១៥០០រៀលក្នុងមួយគីឡូក្រាម។

ងាកមកស្តាប់អ្នកស្រី ពៅ ដែលរស់នៅជាប់របងគ្នា ជាមួយអ្នកស្រី យ៉ា វិញ អ្នកស្រីបានឱ្យដឹងថា ឆ្នាំនេះអ្នកស្រីធ្វើប្រហុកបានតិចជាងឆ្នាំមុន គឺបានចំនួន៣០គីឡូក្រាមប៉ុណ្ណោះ ព្រោះឆ្នាំនេះអ្នកស្រីមិនសូវមានប្រាក់។ អ្នកស្រីឱ្យដឹងទៀតថា ត្រីដែលគេយកមកលក់ដល់ផ្ទះនេះ គឺនាំយកមកពីបណ្តាស្រុកមួយចំនួនដែលជាប់មាត់ទន្លេ ដូចជាស្រុកពាមជីកងក្នុងខេត្តកំពង់ចាមនេះជាដើម។ អ្នកស្រីបន្ថែមថា រដូវដែលត្រីចាប់ផ្តើមត្រូវភាគច្រើនគឺចាប់ពីចន្លោះខែវិច្ឆិការ ដល់ខែមករា៕