ជាតិ
សង្គមជាតិ
ស្ថិតិសាសនាផ្សេងៗនៅទូទាំងប្រទេសកម្ពុជាប្រចាំឆ្នាំ២០១៤
× តាមរយៈរបាយការណ៍ស្ថិតិសាសនាទូទាំងប្រទេសកម្ពុជាប្រចាំឆ្នាំ២០១៤ របស់សៀវភៅកម្ពុជសុរិយា ដែលរៀបចំឡើងដោយក្រសួងធម្មការនិងសាសនា បានបង្ហាញថា ពលរដ្ឋកម្ពុជាកាន់ព្រះពុទ្ធសាសនាចំនួន៩៥ភាគរយ។ ក្រៅពីសាសនាព្រះពុទ្ធ ក្នុងនោះក៏មានសាសនាផ្សេងទៀតដែលប្រជាពលរដ្ឋមួយចំនួនក្នុងប្រទេសកម្ពុជាគោរពផងដែរ។
ក្នុងរបាយការណ៍ស្ថិតិបានបង្ហាញថា សាសនាឥស្លាមមានពលរដ្ឋគោរព ចំនួន ៣៤,២៩៩០នាក់ ។ ទីកន្លែងថ្វាយបង្គំមានចំនួន៩១៤កន្លែង។ សាលាឥស្លាមមានចំនួន៣០៤កន្លែង។ អង្គការសមាគមមានចំនួន៣៩កន្លែង។ សាសនាឥស្លាមមានបែងចែកជា និកាយស៊ីទី និកាយសាហ្វាអ៊ី និងនិកាយសាឡាសហ្វី។
ចំណែកសាសនាគ្រីស្ទមានពលរដ្ឋគោរពចំនួន ៩៦,០៥៩ នាក់។ កន្លែងថ្វាយបង្គំមានចំនួន១៥១៤កន្លែង។ អង្គការសមាគម៩៤កន្លែង។ ជាមួយគ្នានេះសាសនាគ្រីស្ទមានបែងចែកជានិកាយកាតូលិក ប្រូតេស្ដង់ សាក្សីព្រះយេហូរ៉ា ជាដើម។ ដោយឡែកសាសនាមហាយាន មានពលរដ្ឋគោរពចំនួន២៥,៣៧៥នាក់។ ទីកន្លែងថ្វាយបង្គំមានចំនួន១៧៤កន្លែង។ សាសនាមហាយាន ដែលពលរដ្ឋគោរពមានដូចជា ម៉ីឡឹក ខុងម៉ីង ព្រះនាងគង់ស៊ីអ៊ីម អ្នកតាចិន អ៊ីក្វាន់តាវ ជប៉ុន និងវៀតណាម។
ចំពោះសាសនាបាហៃ និងសាសនាកៅដាយ គឺប្រជាពលរដ្ឋកម្ពុជាភាគច្រើនមិនសូវបានឭ និងស្គាល់នោះទេ។ ប៉ុន្ដែសាសនានេះក៏មានពលរដ្ឋមួយចំនួនគោរពផងដែរ ដោយសាសនាបាហៃ មានចំនួន ៦,១៦៨នាក់ និងមានវិហារចំនួន២៥កន្លែង។ រីឯសាសនាកៅដាយ មានពលរដ្ឋគោរពចំនួន១,៧៧៧នាក់ និងមានកន្លែងថ្វាយបង្គំចំនួន៤កន្លែង៕
© រក្សាសិទ្ធិដោយ thmeythmey.com