កីឡាជាតិ
ជាតិ
លោកហែម ថុនធ្លាប់ជាអតីតកីឡាករហែលទឹកដែលមានសក្ដានុពលរបស់កម្ពុជា
× លោកហែម ថុនអគ្គលេខាធិការរងគណៈកម្មាធិការជាតិអូឡាំពិកកម្ពុជានិង ជាអគ្គលេខាធិការសហព័ន្ធខ្មែរកីឡាហែលទឹកបានទទួលមរណភាពកាលពីថ្ងៃទី១២ មករា ម្សិលមិញដោយរោគាពាធត្រឹមវ័យ ៧២ ឆ្នាំ។
ងាកទៅអតីតកាលវិញបុរសខ្លាំងក្នុងវិស័យកីឡាជាតិរូបនេះធ្លាប់ដណ្ដើមបានមេដាយលើឆាកអន្តរជាតិរហូតដល់ចំនួន១២ គ្រឿងក្នុងនោះមានមេដាយមាស១ គ្រឿង ប្រាក់ ៥ និង សំរឹទ្ធ៥ គ្រឿងលើផ្នែកកីឡាហែលទឹកនេះ។
១) ឆ្នាំ១៩៦៣លោកដណ្ដើមបានមេដាយសំរឹទ្ធចំនួនបីពីការប្រកួតជើងឯកកីឡាហែលទឹកក្នុងកម្មវិធី 1st Games of the New Emerging Forces (GANEFO) ដែលបានរៀបចំឡើងនៅទីក្រុងហ្សាកាតាប្រទេសឥណ្ឌូណេស៊ី។
២) នៅឆ្នាំ១៩៦៥លោកបានចេញទៅប្រកួតកីឡាស៊ីហ្គេម លើកទី៣នៅប្រទេសម៉ាឡេស៊ី ហើយជាលទ្ធផលដណ្ដើមបានមេដាយប្រាក់២និង សំរឹទ្ធ១ គ្រឿង។
៣) នៅឆ្នាំ១៩៦៦ លោកបានចូលរួមប្រកួតក្នុងព្រឹត្តិការណ៍កីឡាស៊ីស្វីមមីង( SEA SWIMMING) នៅប្រទេសសិង្ហបុរីហើយថែមទាំងទទួលបានមេដាយមាស១និង ប្រាក់២ គ្រឿងថែមទៀតផង។
៤) នៅឆ្នាំ១៩៦៦ លោកដណ្ដើមបានមេដាយប្រាក់ ១ និង សំរឹទ្ធ ២គ្រឿងក្នុង កម្មវិធីប្រកួតកីឡា 1st Asian GANEFOដែលទីក្រុងភ្នំពេញធ្វើជាម្ចាស់ផ្ទះ។
៥) នៅក្នុងកម្មវិធីកីឡាអាស៊ី (Asian Games) ឆ្នាំ១៩៧០ ដែលរៀបចំនៅទីក្រុងបាងកកប្រទេសថៃ លោក ហែម ថុនធ្លាប់ដណ្ដើមបានចំណាត់ថ្នាក់លេខបួនក្នុងចំណោមប្រទេសជាច្រើនចូលរួម។
៦) នៅឆ្នាំ១៩៧១លោកដណ្ដើមបានមេដាយប្រាក់មួយគ្រឿងពីការប្រកួតក្នុងកម្មវិធីកីឡាស៊ីហ្គេម នៅទីក្រុងកូឡាឡាំពួរប្រទេសម៉ាឡេស៊ី។
ក្រៅពីស្នាដៃសល់ពីសង្គមចាស់អតីតកីឡាករហែលទឹកទសវត្សរ៍ឆ្នាំ ១៩៦០ ដល់១៩៧០ នេះបានស្រាវជ្រាវឯកសារកីឡាពីសម័យដើមជាច្រើនទុកឱ្យក្មេងជំនាន់ក្រោយ។ ចុងក្រោយនេះលោកគឺជាផ្នែកមួយដ៏សំខាន់ក្នុងការចូលរួមកសាងអាងហែលទឹកខ្នាតអន្តរជាតិមួយនៅឯខេត្តកំពង់ចាមដែលគ្រោងនឹងដាក់សម្ពោធឱ្យប្រើប្រាស់ក្នុងខែមេសា ខាងមុខ៕
រូបថត៖សហព័ន្ធខ្មែរកីឡាហែលទឹក
© រក្សាសិទ្ធិដោយ thmeythmey.com