ជាតិ
នយោបាយជាតិ
លោក ហ៊ុន សែន នឹងជិះម៉ូតូជប៉ុនសម្ពោធស្ពាន «ស៊ូបាសា» ហៅស្ពានអ្នកលឿង
× លោកនាយករដ្ឋមន្ត្រី ហ៊ុន សែន មានប្រសាសន៍នៅក្នុងពិធីចាក់បេតុងតភ្ជាប់ស្ពានអ្នកលឿង កាលពីថ្ងៃពុធម្សិលមិញថា នៅពេលបើកសម្ពោធស្ពានអ្នកលឿងដែលមានឈ្មោះផ្លូវការហៅថា ស្ពានស៊ូបាសា ដាក់ឲ្យប្រើប្រាស់ជាផ្លូវការ លោកនឹងជិះម៉ូតូដែលជាផលិតផលរបស់ជប៉ុន នៅលើស្ពានអ្នកលឿងនេះ។ ជាមួយគ្នានោះលោកនាយករដ្ឋមន្ត្រី ហ៊ុន សែន បញ្ជាក់ទៀតថា ស្ពានអ្នកលឿងនេះ គឺត្រូវដាក់សម្ពោធឲ្យប្រជាពលរដ្ឋប្រើប្រាស់ជាផ្លូវការ មុនអំឡុងពេលពិធីបុណ្យចូលឆ្នាំខ្មែរ។
ប្រមុខរដ្ឋាភិបាលកម្ពុជាបន្ថែមថា៖«នៅពេលសម្ពោធ ខ្ញុំសូមអញ្ជើញថ្នាក់ដឹកនាំជប៉ុនចូលរួមសម្ពោធ។ ហើយយល់ល្អខ្ញុំសូមផ្ដួចផ្ដើមគំនិតមួយពេលកាត់ខ្សែបូហើយ ជិះម៉ូតូជប៉ុន មានម៉ាក ស៊ូស៊ូគី (Suzuki) យ៉ាម៉ាហា (Yamaha) ហុងដា (Honda)»។
សូមបញ្ជាក់ថា ស្ពានអ្នកលឿងនេះ ចំណាយទឹកប្រាក់សាងសង់សរុបចំនួន ៩៥ លានដុល្លារ ជាជំនួយឥតសំណងរបស់រដ្ឋាភិបាលជប៉ុន ហើយស្ពាននេះ មានប្រវែងចំនួន ២២១៥ ម៉ែត្រ និងទទឹង ១៣,៥ ម៉ែត្រ៕
© រក្សាសិទ្ធិដោយ thmeythmey.com