ជាតិ
សេដ្ឋកិច្ច
ចំណូលពីការលក់ប័ណ្ណទស្សនាអង្គរនៅឆ្នាំ២០១៤មានជិត៦០លានដុល្លារ
× សៀមរាប៖ របាយការណ៍បានសរសេរថា កាលពីឆ្នាំ២០១៣ ចំណូលពីការលក់ប័ណ្ណទស្សនាប្រាសាទអង្គរវត្ត ដែលគ្រប់គ្រងដោយក្រុមហ៊ុន សុខាអូតែល មានចំនួនជាង៥៧លានដុល្លារសហរដ្ឋអាមេរិក ហើយនៅឆ្នាំ២០១៤ ចំណូលដូចគ្នានេះ រកបានជិត៦០លានដុល្លារ សហរដ្ឋអាមេរិក។
របាយការណ៍ថ្មីរបស់អាជ្ញាធរអប្សរា ដែលចេញផ្សាយនៅថ្ងៃទី២០ ខែមករា បានបង្ហាញថា មានភ្ញៀវទេសចរសរុបជាង៥លាននាក់ ដែលបានមកទស្សនាខេត្តសៀមរាប នៅក្នុងឆ្នាំ២០១៤ ។ ក្នុងចំណោមភ្ញៀវជាង៥លាននាក់នោះ មានភ្ញៀវអន្តរជាតិចំនូន ២,៣៥០,៩៣៧ នាក់។ ដោយឡែកភ្ញៀវអន្តរជាតិដែលចូលទិញសំបុត្រទស្សនាប្រាសាទអង្គរវត្តវិញ មានចំនួន ២,០៥៩,៧០២នាក់ ដែលធ្វើឲ្យរកចំណូលបានសរុបចំនួន ៥៩,៣៤២,០០០ ដុល្លារសហរដ្ឋអាមេរិក។
ចំនួននេះ បើប្រៀបធៀបទៅនឹងការប្រកាសរបស់តំណាងរាស្ត្របក្សប្រឆាំង គឺមានការខុសគ្នាជាង២ដង។ លោក សុន ឆ័យ ធ្លាប់បាននិយាយថា តាមរបាយការណ៍ដែលលោកទទួលបាន ចំណូលពីការលក់ប័ណ្ណចូលទស្សនាប្រាសាទអង្គរវត្ត មានចំនួនប្រមាណ១៦០លានដុល្លារក្នុងមួយឆ្នាំៗ ។ ចំនួននេះ ដោយសារលោក សុន ឆ័យ អះអាងថា មានភ្ញៀវមកទស្សនាអង្គរវត្តក្នុងរង្វង់៤លាននាក់ក្នុងមួយឆ្នាំ។ អាជ្ញាធរអប្សរា ធ្លាប់ធ្វើការបដិសេធ និងបំភ្លឺជាច្រើនលើកច្រើនសារ និងបាននិយាយថា ការលើកឡើងរបស់លោក សុន ឆ័យ ជារឿងមិនពិត មានបំណងភូតកុហកមហាជនទូទៅ ព្រោះសំដីលោក សុន ឆ័យ មិនមានឯកសារត្រឹមត្រូវមកបញ្ជាក់៕
© រក្សាសិទ្ធិដោយ thmeythmey.com