ជាតិ
សង្គមជាតិ
យុវជនចាប់ផ្តើមប្រើប្រាស់ប្រព័ន្ធបច្ចេកវិទ្យាដើម្បីប្រយុទ្ធប្រឆាំងអំពើពុករលួយ
× ក្រុមយុវជនមួយក្រុមកំពុងតែរៀបចំគម្រោងមួយ ដែលមានគោលដៅប្រយុទ្ធប្រឆាំងអំពើពុករលួយតាមរយៈការប្រើប្រាស់ប្រព័ន្ធបច្ចេកវិទ្យា។ យុវជនមួយក្រុមនេះត្រូវបាន ជ្រើសរើសដោយ អង្គការតម្លាភាពកម្ពុជា ដើម្បីចូលរួមវគ្គបណ្តុះបណ្តាលអ្នកដឹកនាំវ័យក្មេង។ បន្ទាប់ពីបញ្ចប់វគ្គបណ្តុះបណ្តាលកាលពីពេលថ្មីៗនេះ ក្រុមយុវជនមួយនេះ បានមានគំនិតផ្តួចផ្តើមក្នុងការៀបចំគម្រោងច្នៃប្រឌិតមួយដែលមានឈ្មោះថា អនឡាញដើម្បីសុចរិតភាព ដែលជាភាសាអង់គ្លេសហៅថា «Online for integrity» ។
គម្រោងមួយនេះត្រូវបាន ឧបត្ថម្ភដោយអង្គការតម្លាភាពកម្ពុជា និងសហការជាមួយក្រុមយុវជន៥នាក់។ ក្រុមយុវជនមួយក្រុមនេះ បានបញ្ជាក់ថា គោលបំណងសំខាន់បំផុតក្នុងគម្រោងនេះ គឺ បង្កើតនូវគេហទំព័រ ដើម្បីចងក្រងជីវប្រវត្តិខ្លីៗរបស់បណ្តាញយុវជនរបស់អង្គការតម្លាភាពកម្ពុជា ដែលមកពីគ្រប់កម្មវិធី និងខេត្តរាជធានី និងផ្តល់រាល់ព័ត៌មាន សកម្មភាពរបស់ពួកគេក្នុងការងារប្រយុទ្ធប្រឆាំងអំពើពុករលួយ។ លើសពីនេះទៅទៀតនោះ វាជាបណ្តាញមួយសម្រាប់ពួកគាត់ក្នុងការទំនាក់ទំនង និងចែករំលែកចំណេះដឹងឬព័ត៌មាននានា ទាក់ទងនឹងអំពើពុករលួយក្នុងប្រទេសរបស់ពួកគេ តាមរយៈប្រពន្ធ័បច្ចេកវិទ្យាទំនើបនេះផងដែរ។
នៅក្នុងក្របខណ្ឌនៃគម្រោងដដែលនេះ ក៏មានកម្មវិធីផ្សេងៗមួយចំនួនដូចជា ការប្រកួតប្រជែងគម្រោងខ្លី ការជជែកពិភាក្សាលើប្រធានបទអំពើពុករលួយ និងសកម្មភាពផ្សេងៗទៀតដែលជំរុញឲ្យយុវជនចាប់ផ្តើមចូលរួមប្រយុទ្ធប្រឆាំងអំពើពុករលួយដែរ។
លោក ចាន់ ភីតធ័រ ដែលជាសមាជិក គម្រោងនេះបានបញ្ជាក់ថា គម្រោងនេះនឹងចាប់ផ្តើមប្រើប្រាស់ជាផ្លូវការក្នុងខែកុម្ភៈនេះតទៅ។ លោកបានបន្តថាទោះបីជាមានឧបសគ្គមួយចំនូនខាងចំណេះដឹងក្នុងការបង្កើត និងប្រើប្រាស់គេហទំព័រនេះក៏ដោយ ប៉ុន្តែក្រុមរបស់លោកនៅតែស្វែងរកមធ្យោយបាយ និងដំណោះស្រាយនានាដើម្បីអោយគម្រោងមួយនេះដំណើរ ការប្រកបដោយភាពជោគជ័យ។ លោកសង្ឃឹមថា នឹងមានការចូលរួមពីប្រជាពលរដ្ឋទូទៅ ជាពិសេសយុវជនក្នុងសកម្មភាពទាំងឡាយរបស់គេហទំព័រនេះ ដើម្បីកាត់បន្ថយអំពើ ពុករលួយក្នុងប្រទេសកម្ពុជាតាមរយៈការលើកស្ទួយនូវការប្រើប្រាស់ប្រពន្ធ័បច្ចេកវិទ្យានេះផងដែរ។ ជាពិសេសទៅទៀតនោះ គេហទំព័រនេះនឹងជួយពង្រឹងសមត្ថភាពដល់បណ្តាញយុវជនរបស់អង្គការតម្លាភាពកម្ពុជាឲកាន់តែមានសក្តានុពលក្នុងការប្រយុទ្ធប្រឆាំងអំពើពុករលួយតាមរយៈការប្រើប្រាស់ប្រពន្ធ័បច្ចេកវិទ្យាក្នុងសង្គមរបស់ពួកគេ៕
© រក្សាសិទ្ធិដោយ thmeythmey.com