ជាតិ
សង្គមជាតិ
CCJ និង TI បណ្តុះបណ្តាលស្មេរព័ត៌មានចំនួន២០នាក់ស្តីពីការប្រឆាំងអំពើពុករលួយ
× ភ្នំពេញ៖ ក្លឹបអ្នកកាសែតកម្ពុជា(CCJ)ដោយមានការសហការពីអង្គការតម្លាភាពកម្ពុជា(TI Cambodia) គ្រោងនឹងបើកវគ្គបណ្តុះបណ្តាលអ្នកកាសែតអាជីពចំនួន១0នាក់ និងអ្នកមិនមែនអាជីពចំនួន១០នាក់(អ្នកសរសេរតាមបណ្តាញសង្គម ដូចជា Blogger) ស្តីពីតួនាទីអ្នកកាសែតក្នុងការរួមចំណែកលើកស្ទួយអភិបាលកិច្ចល្អ និងប្រឆាំងអំពើពុករលួយ។
វគ្គសិក្សាមានរយៈពេល៥ថ្ងៃដោយចាប់ផ្តើមពីថ្ងៃចន្ទទី២៦ខែមករារហូតដល់ថ្ងៃទី៣០ខែមករាឆ្នាំ២០១៥ ។ វគ្គសិក្សានេះនឹងអនុញ្ញាតអោយអ្នកកាសែតអាជីពអាចអភិវឌ្ឍន៍ចំណេះដឹងបន្ថែមទៀត។ ហើយអ្នកមិនមែនអាជីពអាចទទួលបានចំណេះដឹងសារព័ត៌មានច្រើន។ មេរៀន ព័ត៌មានទាន់ហេតុការណ៍ ព័ត៌មានបទយកការណ៍ ព័ត៌មានជីវព័ត៌មាន ព័ត៌មានទស្សនៈ ព័ត៌មានវិភាគ។ល។ នឹងត្រូវបង្រៀននៅក្នុងវគ្គសិក្សានេះ។ លើសពីនេះទៅទៀត មេរៀនស៊ើបអង្កេត(Investigative story) ក៏នឹងត្រូវបង្រៀននៅក្នុងវគ្គពិសេសនេះដែរ។
សាស្ត្រាចារ្យឧទ្ទេសនាមផ្នែកសារព័ត៌មានក្នុងវគ្គសិក្សានេះ សុទ្ធសឹងជាសាស្ត្រាចារ្យផ្នែកសារព័ត៌មានដែលមានបទពិសោធន៍ខ្ពស់ ក្នុងនោះមាន៖ លោក ឆាយ សុផល សមាជិកគណៈកម្មាធិការនាយកនៃក្លឹបអ្នកកាសែតកម្ពុជា លោក ប៉ែន បូណា និពន្ធនាយកវិទ្យុបារាំងអន្តរជាតិ លោក ពុយ គា អ្នកឆ្លើយឆ្លងព័ត៌មានទីភ្នាក់ងារជប៉ុន Kyodo លោក ខៀវ កូឡា អ្នកសារព័ត៌មានជើងចាស់ប្រចាំទូរទស្សន៍ C N C លោក គី សុខលីម អគ្គនាយកសារព័ត៌មានអេឡិចត្រូនិកថ្មីៗនិងសាស្ត្រាចារ្យដទៃៗទៀត។ វគ្គសិក្សាខាងលើ គឺជាវគ្គសិក្សាមិនយកកម្រៃ។
ក្រៅពីចំណេះដឹងសារព័ត៌មាន សិក្ខាកាមទាំងអស់នឹងទទួលបានចំណេះជាច្រើនផ្សេងទៀតទាក់ទងនឹងអំពើរពុករលួយ ដូចជា ប្រវត្តិនៃអំពើពុករលួយ ប្រភេទនៃអំពើពុករលួយ ប្រទេសណាពុករលួយច្រើនជាងគេ ច្បាប់ប្រឆាំងអំពើពុករលួយនៃប្រទេសកម្ពុជា។ល។
លោក គី សុខលីម សមាជិកគណៈកម្មាធិការនាយកនៃក្លិបអ្នកកសែតកម្ពុជានិងជាអ្នកសម្របសម្រួលគម្រោងបណ្តុះបណ្តាលស្មេរព័ត៌មានចំនួន២០នាក់ បានមានប្រសាសន៍ថា ៖«វគ្គបណ្តុះបណ្តាលនេះនឹងជំរុញអោយអ្នកកាសែតអាជីព និងអ្នកសរសេរតាមបណ្តាញហ្វេសប៊ុកមានគំនិតកាន់តែច្រើនដើម្បីចូលរួមសរសេរអត្ថបទទាក់ទងទៅនឹងអំពើពុករលួយនៅក្នុងសង្គមខ្មែរ»។
ស្មេរព័ត៌មានមានតួនាទីសំខាន់ណាស់ ទាំងនៅក្នុងអតីតកាល បច្ចុប្បន្នកាល និងអនាគតកាលខាងមុខ ក្នុងការចូលរួមធ្វើយ៉ាងដូចម្តេចដើម្បីអោយសង្គមធ្វើដំណើរទៅមុខដោយតម្លាភាព សុចរិតភាព និងគ្មានអំពើពុករលួយ។ តាមរយៈការចូលរួមសរសេរពីអំពើពុករលួយកាន់ច្រើនពីអ្នកស្មេរទាំងឡាយ ពេលនោះ អំពើពុករលួយនៅនឹងត្រូវកាន់បន្ថយនៅក្នុងសង្គមខ្មែរ។ «អ្នកកាសែតមានតួនាទីសំខាន់ណាស់ក្នុងការប្រយុទ្ធប្រឆាំងនឹងអំពើពុករលួយ»។
សូមបញ្ជាក់ថា ក្រោយពីបញ្ចប់វគ្គសិក្សានេះ សិក្ខាកាមទាំងអស់អាចសរសេរអត្ថបទព័ត៌មានចូលរួមប្រឡងជ្រើសរើសអ្នកកាសែតឆ្នើមប្រចាំឆ្នាំ២០១៥ ។ អ្នកកាសែតនៅក្នុងប្រទេសកម្ពុជាទាំងអស់ក៏អាចចូលរួមសរសេរអត្ថបទប្រឡងប្រកួតប្រជែងយករង្វាន់ខាងលើនេះបានដែរ។ ប្រាក់រង្វាន់អ្នកកាសែតឆ្នើម២០១៥ នឹងមានរហូតដល់ជាង១ពាន់ដុល្លារសម្រាប់អ្នកជាប់លេខ១ និងបន្តបន្ទាប់មកទៀត សម្រាប់អ្នកលេខ២ លេខ៣ និងលេខ៤ ៕
© រក្សាសិទ្ធិដោយ thmeythmey.com