ជាតិ
សង្គមជាតិ
ពិធីក្រុងពាលីអង្គរសង្គ្រាន្តឆ្នាំ២០១៥នឹងប្រារព្ធធ្វើនៅថ្ងៃស្អែក
× សៀមរាប៖ ពិធីក្រុងពាលី សុំម្ចាស់ទឹកម្ចាស់ដី ដើម្បីរៀបចំព្រឹត្តិការណ៍ជាតិ អង្គរសង្គ្រាន្តឆ្នាំ ២០១៥ នឹងប្រព្រឹត្តិទៅថ្ងៃទី២៩ ខែមករា ឆ្នាំ២០១៥ ស្អែកនេះ។ ការធ្វើពិធីក្រុងពាលីនេះ ក៏ដើម្បីបើកការដ្ឋានសាងសង់ និងរៀបចំទីតាំងរៀបចំអង្គរសង្គ្រាន្ត២០១៥នេះផងដែរ។
ពិធីក្រុងពាលី តាមទំនៀមទំលាប់ប្រពៃណីខ្មែរ នឹងចាប់ផ្តើមនៅម៉ោង៧ព្រឹក ថ្ងៃទី២៩ ខែមករា ស្អែកនេះ នៅបរិវេណទីលានជល់ដំរី។ យោងតាមសេចក្តីជូនដំណឹងរបស់សហភាពសហព័ន្ធយុវជនកម្ពុជា បានឲ្យដឹង ថ្នាក់ដឹកនាំសហភាពសហព័ន្ធយុវជនកម្ពុជា នឹងរៀបចំពិធីក្រុងពាលី ដើម្បីបួងសួងសុំសេចក្តីសុខ សម្រាប់បើកការដ្ឋានសាងសង់ និងរៀបចំជាផ្លូវការ នៃព្រឹត្តិការណ៍អង្គរសង្គ្រាន្តលើកទី៣ ឆ្នាំ២០១៥ ដើម្បីអបអរសាទរពិធីបុណ្យចូលឆ្នាំប្រពៃណីខ្មែរ ដែលនឹងប្រារព្ធធ្វើនៅខែមេសាខាងមុខនេះ។
ពិធីក្រុងពាលី ដែលមានការចូលរួមពីប្រធានសហព័ន្ធ លោក ហ៊ុន ម៉ានី និងតំណាងស្ថាប័នពាក់ព័ន្ធប្រមាណ៣០០នាក់ តាមការគ្រោងទុកនោះ រំពឹងថា ពិធីនេះក៏ដើម្បីជាការសុំពរជ័យ ថែរក្សាគ្រប់ថ្នាក់ដឹកនាំ និងយុវជន ដែលជាអ្នករៀបចំព្រឹត្តិការណ៍អង្គរសង្គ្រាន្ត២០១៥ ឲ្យមានសេចក្តីគ្រប់ៗគ្នា និងទទួលបានជោគជ័យ តាមការគ្រោងទុក។
គួររំលឹកថា ព្រឹត្តិការណ៍អង្គរសង្គ្រាន្ត បានរៀបចំធ្វើរយៈពេល៣ឆ្នាំមកហើយ បើគិតត្រឹមឆ្នាំ២០១៥នេះ។ ក្រោយពីទទួលបានការគាំទ្រ នៅក្នុងឆ្នាំ២០១៣ ដែលជាឆ្នាំដំបូង សហភាពសហព័ន្ធយុវជនកម្ពុជា ដែលជាអ្នករៀបចំ បានបន្តធ្វើនៅឆ្នាំ២០១៤ ដែលគេដឹងថា មានទ្រង់ទ្រាយធំជាងឆ្នាំចាស់ ហើយក៏មានការវេចនំអន្សមយក្ស ដាក់តាំងបង្ហាញក្នុងព្រឹត្តិការណ៍នោះ ហើយមានការចាប់អារម្មណ៍ច្រើនពីភ្ញៀវទេសចរ។ នៅឆ្នាំនេះ គម្រោងរៀបចំនំអន្សមយក្សនេះ អាចនឹងមានទំហំធំជាងឆ្នាំទៅ ដែលមានទម្ងន់២តោន ទទឹង១ម៉ែត្រ និងបណ្តោយ៥ម៉ែត្រនោះ៕
© រក្សាសិទ្ធិដោយ thmeythmey.com