សង្គមអន្តរជាតិ
អន្តរជាតិ
តុលាការក្រុងញូវយ៉ក កាត់ទោសប្រហារជីវិតឆ្កែកំណាចមួយក្បាល
× ក្រសួងសុខាភិបាលអាមេរិក បាននាំយករឿងក្ដីមួយពាក់ព័ន្ធនឹងករណីឆ្កែកាចមួយក្បាល បានខាំមនុស្សពីរនាក់រហូតដល់មានរបួសធ្ងន់ ទៅកាន់ការិយាល័យតុលាការរដ្ឋបាល និងសវនាការ ក្នុងទីក្រុងញូវយ៉កដើម្បីកាត់ក្ដី។ ក្រោយពីការស៊ើបអង្កេតតុលាការបានសម្រេចកាត់ទោសប្រហារជីវិតឆ្កែកំណាចនោះ។ នេះបើយោងតាមកាសែត New York Post ។
ប្រភពដដែលបានផ្សាយថា ឆ្កែឈ្មោលមួយក្បាលឈ្មោះ Bullmastiff mix Disel របស់លោក Kaseam Stanley បានខាំមនុស្សពីរនាក់ធ្វើឲ្យមានរបួសធ្ងន់។ កាលពីថ្ងៃទី ៣១ ខែកក្កដា ឆ្នាំ២០១៤ Disel បានខាំជើងស្ត្រីអាយុ ២០ ឆ្នាំម្នាក់ឈ្មោះ Humphrey ដែលកំពុងឈរនៅខាងមុខហាងមួយ ធ្វើឲ្យអ្នកស្រីមានរបួសជើងយ៉ាងជ្រៅ។ ករណីមួយទៀតគឺ Disel បានខាំជើងកម្មករម្នាក់ កាលពីថ្ងៃទី ៤ ខែសីហា ក្នុងពេលដែលកម្មករនោះកំពុងប្រលែងលេងជាមួយវា ដោយបានធ្វើឲ្យកម្មករនោះត្រូវបញ្ជូនទៅជួយសង្គ្រោះដោយវះកាត់ជាបន្ទាន់នៅមន្ទីពេទ្យ ។
ចៅក្រមតុលាការរដ្ឋបាល លោក Tynia D. Richard បានឲ្យដឹងថា នេះគឺជាករណីដ៏កម្រមួយក្នុងរយៈពេល ៥ ឆ្នាំកន្លងមកនេះ ដែលតុលាការត្រូវកាត់ទោសប្រហារជីវិតឆ្កែកាចមួយក្បាលនេះ។ បើយោងតាមក្រសួងសុខាភិបាលអាមេរិក ក្នុងមួយឆ្នាំៗ យ៉ាងហចណាស់ក៏មានករណី ឆ្កែកាច ត្រូវបានគេកាត់ទោសនៅក្នុងតុលាការរដ្ឋបាល និងសវនាការ ៕
© រក្សាសិទ្ធិដោយ thmeythmey.com