ជាតិ
អាជ្ញាធរខេត្តព្រះសីហនុ ហាមមិនឲ្យក្រុមហ៊ុន Kazantipប្រគំតន្ត្រីអាសអាភាស
× អាជ្ញាធរខេត្តព្រះសីហនុ បង្គាប់ឲ្យនាយកក្រុមហ៊ុន Kazantip Asia Co,Ltd. ផ្អាកនូវសកម្មភាព រៀបចំដំណើរកម្សាន្ត ការប្រគំតន្ត្រី និងល្បែងកម្សាន្ត អាសអាភាស ដែលគ្រោងនឹងរៀបចំចាប់ពីថ្ងៃទី១៨ ដល់ថ្ងៃទី ២៨ខែកុម្ភៈខាងមុខ នៅលើកោះពស់ សង្កាត់លេខ៣ ក្រុងព្រះសីហនុ។
យោងតាមសេចក្តីជូនដំណឹងរបស់សាលាខេតុ្តព្រះសីហនុ កាលពីថ្ងៃទី២ ខែកុម្ភៈ បានឲ្យដឹងថា អាជ្ញាធរខេត្តព្រះសីហនុ នឹងចាត់វិធានការផ្លូវច្បាប់ បើសិនជាក្រុមហ៊ុន Kazantip Asia រឹងរូស មិនអនុវត្តតាមសេចក្ដីជូនដំណឹងនេះ។
ជាមួយគ្នានេះសាលាខេតុ្តព្រះសីហនុ បន្ថែមថា តាមរយៈគេហទំព័រ របស់ក្រុមហ៊ុនKazantip Asia សកម្មភាពប្រគំតន្ត្រីខាងលើ មានលក្ខណៈប្រាសចាក ពីប្រពៃណី វប្បធម៌ និងកិត្តិយសជាតិខ្មែរ ពិសេសផ្ទុយពីកម្មវត្ថុ នៃការស្នើសុំកន្លងមកដូចនេះរដ្ឋបាលខេត្តព្រះសីហនុ សម្រេចផ្អាកជាបន្ទាន់ នូវសកម្មភាពរៀបចំគម្រោង នៃការប្រគំតន្ត្រី និងល្បែងកម្សាន្តអាសអាភាសនេះ។
ការប្រគំតន្ត្រី Kazantipបានចាប់ផ្តើមឡើង តាំងពីឆ្នាំ ១៩៩២ ដល់ឆ្នាំ២០១៣ នៅប្រទេសអ៊ុយក្រែន ក្នុងតំបន់គ្រីមៀ ។ ការប្រគំតន្ត្រីនេះភាគច្រើន គេតម្រូវស្លៀកពាក់ពណ៌ទឹកក្រូច និងខោអាវពណ៌លឿង។ពិធីប្រគំតន្ត្រីនេះលាយឡំដោយការដើរស្រាត និងខ្លះទៀត រួមភេទគ្នាផងដែរ៕
© រក្សាសិទ្ធិដោយ thmeythmey.com