ជាតិ
នយោបាយជាតិ
លោក ឈឹម ផលវរុណ និងមន្ត្រី២រូបទៀត ក្លាយជាអ្នកនាំពាក្យរបស់បក្សប្រជាជនកម្ពុជា
លោក សុខ ឥសាន នៅខាងឆ្វេង លោក ឈឹម ផលវរុណ នៅកណ្តាល លោក សួស យ៉ារ៉ា នៅខាងស្តាំ
×![]()
លោក ឈឹម ផលវរុណ លោក សួស យ៉ារ៉ា និងលោក សុខ ឥសាន ត្រូវបានគណបក្សប្រជាជនកម្ពុជាតែងតាំងជាអ្នកនាំពាក្យរបស់គណបក្ស។ នេះបើតាមប្រសាសន៍របស់លោកបណ្ឌិត ឈឹម ផលវរុណ ។ ការតែងតាំងនេះ គឺសម្រេចដោយគណៈអចិន្ត្រៃយ៍នៃគណៈកម្មាធិការកណ្តាលរបស់បក្ស កាលពីថ្ងៃទី ៤ ខែកុម្ភៈ កន្លងទៅ។ មុននេះ លោក ខៀវ កាញារីទ្ធ ដែលជារដ្ឋមន្ត្រីក្រសួងព័ត៌មាន ត្រូវបានគេដឹងថា គឺជាអ្នកនាំពាក្យរបស់គណបក្សប្រជាជនកម្ពុជា។ លោករដ្ឋមន្ត្រីក៏ជាអ្នកនាំពាក្យរបស់រដ្ឋាភិបាលផងដែរ។
«ប្រហែលជាគណបក្សប្រជាជនកម្ពុជា ទទួលស្គាល់ពីភាពស្មោះត្រង់ និងសមត្ថភាពរបស់ខ្ញុំហើយ បានជាតែងតាំងខ្ញុំជាអ្នកនាំពាក្យរបស់គណបក្ស» ។ នេះជាការពន្យល់របស់លោក ឈឹម ផលវរុណ ដែលទើបតែត្រូវគណបក្សប្រជាជនកម្ពុជាតែងតាំងជាអ្នកនាំពាក្យ។
ថ្លែងប្រាប់សារព័ត៌មានថ្មីៗនៅព្រឹកថ្ងៃសុក្រនេះ លោក ឈឹម ផលវរុណ បានបញ្ជាក់ថា ក្នុងចំណោមអ្នកនាំពាក្យទាំង៣នាក់ ដែលគណបក្សប្រជាជនកម្ពុជាតែងតាំងនោះ គឺឈ្មោះរបស់លោក ស្ថិតក្នុងលំដាប់លេខរៀងទី១ ។ « អ្នកនាំពាក្យទាំង ៣នោះ មានរូបខ្ញុំ មានលោក សួស យ៉ារ៉ា លោក សុខ ឥសាន។ ដូចមិនមានបែងចែកពីឋានៈរបស់ពួកខ្ញុំទាំង ៣ ថា នរណាខ្ពស់ជាងអ្នកណាទេ ដោយគ្រាន់តែឈ្មោះខ្ញុំនៅលេខរៀងទី១» ។ នេះជាការបញ្ជាក់របស់លោកអ្នកវិភាគគាំទ្របក្សកាន់អំណាច។
លោក សួស យ៉ារ៉ា គឺជាអ្នកតំណាងរាស្ត្រមណ្ឌលខេត្តព្រះវិហារ រីឯលោក សុខ ឥសាន គឺជាតំណាងរាស្ត្រមណ្ឌលខេត្តព្រៃវែង។
លោក ឈឹម ផលវរុណ ដែលទើបទទួលបានដំណែងជាសមាជិកកណ្តាលគណបក្សថ្មីផងនោះ បានប្តេជ្ញាចិត្តយ៉ាងនេះថា៖ « ខ្ញុំរីករាយនឹងទទួលតំណែងនេះ ព្រោះខ្ញុំគាំទ្របក្សប្រជាជនកម្ពុជាតាំងពីឆ្នាំ ១៩៧៩ កន្លងមក។ ខ្ញុំនឹងខំប្រឹងធ្វើការបម្រើគណបក្សប្រជាជន បម្រើជាតិ ដើម្បីផលប្រយោជន៍ប្រទេស និងប្រជាពលរដ្ឋ។ ខ្ញុំនឹងពន្យល់ឲ្យមហាជនយល់ពីសមិទ្ធផលរបស់គណបក្សប្រជាជនកម្ពុជា ក្នុងរយៈពេល ៣០ ឆ្នាំកន្លងមកនេះ ខណៈដែលក្រុមខ្លះកំពុងព្យាយាមលុបចោលសមិទ្ធផលទាំងនោះ។
អ្នកនាំពាក្យរូបនេះ បានអះអាងថា ក្នុងនាមខ្លួនជាអ្នកនាំពាក្យគណបក្សប្រជាជនកម្ពុជា រូបលោកនឹងផ្តល់ព័ត៌មានឈរលើគោលការណ៍សន្តិភាព សេរីភាព ដើម្បីប្រជាជាតិ។ លោក ឈឹម ផលវរុណ បញ្ជាក់យ៉ាងនេះថា៖ «យើងមិនមែនសត្រូវគ្នាទេ តែយើងគ្រាន់តែមានទស្សនៈខុសគ្នាតែប៉ុណ្ណោះ»៕
© រក្សាសិទ្ធិដោយ thmeythmey.com
«មជ្ឈការ»មានន័យខុសពី«វិមជ្ឈការ»ដូចម្តេច?
1 សប្តាហ៍
