ពីនេះ ពីនោះ
ធ្វើការងារក្រុមដោយរបៀបណាទើប «មិនឈ្លោះប្រកែកគ្នា»?
× ការធ្វើការងារជាក្រុមពិតជាទទួលបានលិទ្ធផលល្អ និងប្រសិទ្ធភាពខ្ពស់ ប្រសិនបើជាការធ្វើការងារក្រុមនោះមានក្បួនខ្នាត និងមានរបៀបច្បាស់លាស់។ ប៉ុន្តែជាក់ស្តែងមិនថា មនុស្សមកពីប្រទេសមានធនធានមនុស្សខ្លាំង ឬខ្សោយនោះទេ ប្រសិនជាធ្វើការងារក្រុមដោយមិនមានរបៀប និងក្បូនខ្នាតទេនោះ នោះនៅតែមិនមានប្រសិទ្ធភាពដដែល។ ហេតុអ្វីបានជាការធើ្វការងារក្រុមលំបាក និងតែងតែមានជម្លោះជាមួយគ្នាដដែល? ខាងក្រោមនេះជាគន្លឹះធើ្វការងារក្រុមដ៏មានប្រសិទ្ធភាព៖
១. អ្នកសម្របសម្រួល៖ នៅក្នុងក្រុមការងារត្រូវមានតំណាងសមាជិកម្នាក់ដើរតួជាអ្នកសម្របសម្រួលសមាជិកក្រុមឲ្យធ្វើការចុះសម្រុងគ្នា ដោយជួយបែងចែក និងត្រួតពិនិត្យការងារ។ ជាពិសេសដើរតួជាអ្នកប្រមូលគំនិតយោបល់របស់សមាជិកម្នាក់ៗមកបញ្ចូលគ្នា។
២. បែងចែកការងារ និងសហការគ្នា៖ សមាជិកក្រុមម្នាក់ៗត្រូវបំពេញការងារតាមមុខជំនាញនិងត្រូវបែងចែកការងារឲ្យបានច្បាស់សម្រាប់សមាជិកម្នាក់។ ជាពិសេសត្រូវសហការគ្នាពីផ្នែកមួយទៅផ្នែកមួយទៀតនៅក្នុងក្រុម។
៣. ស្មារតីទទួលខុសត្រូវ៖ សមាជិកម្នាក់ៗត្រូវមានទំនួលខុសត្រូវ ចំពោះការងារជាមុខនាទីផ្ទាស់ខ្លួនដែលមិនអាចបោះបង់ចោលបានឡើយ និងត្រូវមានទំនួលខុសត្រូវចំពោះលិទ្ធផលរបស់ក្រុមទាំងមូល។
៤. ដោះស្រាយបញ្ហារូមគ្នា៖ សមាជិកក្រុមទាំងអស់ត្រូវលើកយកបញ្ហាដែលកើតមានក្នុងក្រុមទាំងបញ្ហារបស់សមាជិកម្នាក់ៗ ទាំងបញ្ហាពេលធ្វើការមិនចុះសម្រុងគ្នា និងទាំងបញ្ហាផលលំបាកពេលបំពេញការងារម្តង។
៥. ចែករំលែកបទពិសោធន៍ជីវិត៖ សមាជិកម្នាក់ៗមានជីវប្រវត្តិ មានជំនាញ ទេពកោសល្យ អត្តចរិត និងចំណង់ចំណូលចិត្តផ្សេងៗគ្នា។ ដូច្នេះសមាជិកក្រុមទាំងអស់ត្រូវចែករំលែកបទពិសោធន៍ជីវិតឲ្យគ្នាទៅវិញទៅមក ដោយមិនមានការលាក់លៀមអ្វីឡើយ។ ការធ្វើបែបនេះ អាចធ្វើឲ្យសមាជិកក្រុមទាំងអស់ស្គាល់គ្នាកាន់តែច្បាស់ អាចមានមនោសញ្ចេតនា និងមានភាពសិ្នទ្ធស្នាលស្រឡាញ់គ្នាដូចបងប្អូនបង្កើតរបស់ពួកគេជាក់ជាពុំខាន៕
© រក្សាសិទ្ធិដោយ thmeythmey.com