ជាតិ
សង្គមជាតិ
ក្រសួងកិច្ចការនារីប្រកាសយុទ្ធសាស្ត្រ៥ចំណុចទប់ស្កាត់អំពើហិង្សាលើស្ត្រី
×
ក្រសួងកិច្ចការនារី ប្រកាសដាក់ឲ្យអនុវត្តន៍នូវយុទ្ធសាស្ត្រគោលចំនួន៥ ចំណុច និងយុទ្ធសាស្ត្រតូចៗចំនួន១៦ ដើម្បីបញ្ឈប់អំពើហិង្សាលើស្ត្រី នៃផែនការសកម្មភាពជាតិលើកទី២ សម្រាប់ឆ្នាំ២០១៤-២០១៨ ។យុទ្ធសាស្ត្រចំនួន៥ចំណុចនោះមានដូចជាទី១ ការទប់ស្កាត់បឋម ទី ២ ការការពារផ្នែកច្បាប់ និងសេវាកម្មពហុវិស័យ ទី ៣ ការកសាង និងការអនុវត្តគោលនយោបាយ និងច្បាប់ ទី ៤ ការកសាងសមត្ថភាព និង ទី៥ ការតាមដាន ការត្រួតពិនិត្យ និងការវាយតម្លៃ។
រដ្ឋមន្ត្រីក្រសួងកិច្ចការនារីលោកស្រី អ៊ឹង កន្ថាផាវីបានថ្លែងថា ផែនការសកម្មភាពទាំង ៥ ចំណុចនេះ ធ្វើឡើងក្នុងគោលដៅកាត់បន្ថយអំពើហិង្សាលើស្ត្រីក្នុងគ្រួសារ និងកុមារីងាយរងគ្រោះ ពីការរំលោភសេពសន្ថវៈ។ ក្នុងពិធីប្រកាសអនុវត្តផែនការយុទ្ធសាស្ត្រ ដើម្បីទប់ស្តាត់អំពើហិង្សាលើស្ត្រីនៅថ្ងៃអង្គារនេះ លោកស្រីរដ្ឋមន្ត្រីបន្ថែមថា ផែនការនេះ ក៏ដើម្បីផ្លាស់ប្ដូរឥរិយាបថសង្គមដែលមានការរើសអើងចំពោះស្ត្រី ធ្វើឲ្យមានសមភាពរវាងបុរសនិងស្ត្រី និងការពារតាមផ្លូវច្បាប់ប្រកបដោយយុត្តិធម៌ដល់ស្ត្រី។
តំណាងអង្គការសហប្រជាជាតិប្រចាំកម្ពុជា លោកស្រី ក្លៀរ វ៉ានឌឺវេរ៉ែន មានប្រសាសន៏នៅក្នុងពិធីនោះដែរថា ផែនការនេះគឺជាសមិទ្ធផលដ៏សំខាន់មួយ ដើម្បីសម្រេចឲ្យបាននូវសិទ្ធរបស់ស្ត្រី និងក្មេងស្រី ។ ហើយរដ្ឋាភិបាលត្រូវផ្លាស់ប្ដូរសង្គម ដែលចាំបាច់ទប់ស្កាត់អំពើហិង្សាប្រកបដោយប្រសិទ្ធភាព ។ លោកស្រីបន្ថែមថា៖«ប្រទេសកម្ពុជាកំពុងនាំមុខគេ នៅលើឆាកអន្តរជាតិ ក្នុងការឆ្លើយតបចំពោះអំពើហិង្សាលើស្ត្រី និងក្មេងស្រីដើម្បីឈានទៅសម្រេចគោលដៅទប់ស្កាត់អំពើហិង្សា។ ការសម្រេចគោលដៅនេះ នាំឲ្យមានការផ្លាស់ប្ដូរក្នុងសង្គមយ៉ាងធំធេង ដែលផ្ដល់ប្រយោជន៍ដល់សង្គមជាតិទាំងមូលផងដែរ»។
ក្រសួងកិច្ចការនារី បានបង្កើតក្រុមការងារឆ្លើយតបអំពើហិង្សាទាក់ទងនឹងយេនឌ័រនេះ ដោយមានការចូលរួមពីក្រសួងស្ថាប័នពាក់ព័ន្ធចំនួន១៥ និងអង្គការក្រៅរដ្ឋាភិបាលចំនួន១៤ នៅក្នុងដំណើរការរៀបចំផែនការសកម្មភាពជាតិឆ្នាំ២០១៤-២០១៨នេះ ដើម្បីជាទុនក្នុងការឆ្លើយតបឲ្យបានសមស្របទៅតាមតម្រូវការ នៃស្ថានភាពរបស់ជនរងគ្រោះ ក្នុងការទប់ស្កាត់ និងការផ្ដល់សេវាកម្មនានា ៕
© រក្សាសិទ្ធិដោយ thmeythmey.com