ជាតិ
នយោបាយជាតិ
ក្រសួងយុត្តិធម៌បង្កើតច្បាប់៣ ដើម្បីផ្លាស់ប្ដូរប្រព័ន្ធយុត្តិធម៌
×
ក្រសួងយុត្តិធម៌បង្កើតច្បាប់ចំនួន៣ ដើម្បីឲ្យមានការផ្លាស់ប្ដូរប្រព័ន្ធយុត្តិធម៌នៅកម្ពុជា។ នេះបើតាមលោក ជិន ម៉ាលីន អ្នកនាំពាក្យក្រសួងយុត្តិធម៌ ។ លោក ជិន ម៉ាលីន អះអាងថា ការបង្កើតច្បាប់នេះឡើង គឺក្រសួងយុត្តិធម៌ មិនមែនបង្កើតឡើងដើម្បីលូកដៃចូលប្រព័ន្ធតុលាការនោះទេ។
ឆ្លើយតបនឹងគណៈកម្មការទី ៦ នៃរដ្ឋសភា ដឹកនាំដោយលោក ប៉ែន បញ្ញា ដែលបានសាកសួរលោករដ្ឋមន្ត្រីក្រសួងយុត្តិធម៌លោក អង្គ វង្សវឌ្ឍនា នៅព្រឹកថ្ងៃព្រហស្បតិ៍នេះនៅក្រសួងយុត្តិធម៌ ស្តីពីដំណើរការនៃការអនុវត្តប្រព័ន្ធយុត្តិធម៌នៅកម្ពុជាកន្លងមក និងផែនការរបស់ក្រសួងសម្រាប់ប្រព័ន្ធយុត្តិធម៌ទៅថ្ងៃខាងមុខ។ ក្រសួងយុត្តិធម៌បានបង្កើតច្បាប់ចំនួន៣ ដើម្បីធ្វើការផ្លាស់ប្ដូរប្រព័ន្ធយុត្តិធម៌ជាលក្ខណៈទ្រង់ទ្រាយធំនៅកម្ពុជា ជាពិសេសប្រព័ន្ធតុលាការ។ នេះបើតាមលោក ជិន ម៉ាលីន អ្នកនាំពាក្យក្រសួងយុត្តិធម៌ ។
តាមរយៈសន្នីសីទកាសែត លោក ជិន ម៉ាលីន បានបញ្ជាក់ថា ច្បាប់ទាំង៣នេះគឺក្រសួងយុត្តិធម៌ បង្កើតឡើងដើម្បីសម្រួលកិច្ចការងារនៅក្នុងប្រព័ន្ធតុលាការតែប៉ុណ្ណោះ ។ ហើយក្រសួងក៏មិនមានបំណងលូកដៃចូលក្នុងប្រព័ន្ធតុលាការ ដូចជាមតិមួយចំនួនដែលបានលើកឡើងនោះទេ។ អ្នកនាំពាក្យរូបនេះពន្យល់យ៉ាងដូច្នេះថា៖«ក្រសួងយុត្តិធម៌យើងបានបង្កើតច្បាប់ចំនួន ដើម្បីជួយដល់កែសម្រួលដល់ប្រព័ន្ធតុលាការ ក្នុងនោះមានដូចជាការបង្កើតឲ្យមានរដ្ឋបាលតុលាការតាមសាលាជំនុំជម្រះគ្រប់ជាន់ថ្នាក់ជួយសម្រួលទៅលើការងាររបស់ចៅក្រម ព្រះរាជអាជ្ញា ការងាររដ្ឋាបាល ហិរញ្ញវត្ថុ និងផែនការនានា ។ កុំឲ្យចៅក្រម ព្រះរាជអាជ្ញារវល់គិតពីបញ្ហានេះដូចមុន គឺឲ្យពួកគេគិតតែពីការងារកាត់ក្ដីបានហើយ។ ហើយច្បាប់នេះមិនបានបង្កើតឡើងដើម្បីផ្ដល់អំណាចឲ្យក្រសួងយុត្តិធម៌ដូចការលើកឡើងរបស់សង្គមស៊ីវិលមួយចំនួនដែរ»។
បើតាមលោក ជិន ម៉ាលីន ច្បាប់ទាំង៣នេះរួមមាន៖ ច្បាប់ស្ដីពីការរៀបចំអង្គការតុលាការ ច្បាប់ស្តីពី លក្ខន្តិកចៅក្រម ព្រះរាជអាជ្ញា និងច្បាប់ស្តីពី ការរៀបចំនឹងការប្រព្រឹត្តិទៅនៃឧត្តមប្រឹក្សាអង្គចៅក្រម។ ចំពោះច្បាប់នេះក៏ត្រូវបានគណៈកម្មការទី៦នៃរដ្ឋសភា សាទរក្នុងការបង្កើតផងដែរ។ នេះជាការអះអាងរបស់លោក ជិន ម៉ាលីន។
ជាមួយគ្នានេះ សមាជិកនៃគណៈកម្មការទី៦ មកពីគណបក្សសង្គ្រោះជាតិ លោក អ៊ុំ សំអាន ក៏បានចោទសួរទៅ រដ្ឋមន្ត្រីក្រសួងយុត្តិធម៌ ពាក់ព័ន្ធនឹងការចាប់ខ្លួនសកម្មជនដីធ្លី និងសកម្មជនគណបក្សប្រឆាំងកន្លងមក ដោយតម្រូវឲ្យមានការចូលរួមដោះស្រាយពីក្រសួងយុត្តិធម៌។ តែបញ្ហានេះក្រសួងយុត្តិធម៌ បដិសេធថា ខ្លួនមិនមានសមត្ថកិច្ចលូកដៃចូលក្នុងប្រព័ន្ធតុលាការនោះទេ ព្រោះនេះឯករាជ្យភាពរបស់តុលាការ។ ហើយក្រសួងយុត្តិធម៌គ្រាន់តែអាចកសាង ច្បាប់បណ្ដុះបណ្ដាលធនធានមនុស្ស ផ្សព្វផ្សាយច្បាប់ និងតាមដានពិនិត្យមន្ត្រីអនុវត្តច្បាប់ និងតុលាការប៉ុណ្ណោះ។ នេះជាការបញ្ជាក់របស់លោក ជិន ម៉ាលីន អ្នកនាំពាក្យក្រសួងយុត្តិធម៌៕
© រក្សាសិទ្ធិដោយ thmeythmey.com