អន្តរជាតិ
នាយករដ្ឋសិង្ហបុរីត្រូវវះកាត់មហារីកក្រពេញប្រូស្តាត
× នៅថ្ងៃអាទិត្យនេះ គេទទួលដំណឹងថា នាយករដ្ឋមន្ត្រីសិង្ហបុរីលោក Lee Hsien Loong នឹងត្រូវវះកាត់ដើម្បីកម្ចាត់មហារីកក្រពេញប្រូស្តាតនៅថ្ងៃស្អែកនេះនៅមន្ទីរពេទ្យមួយរបស់សិង្ហបុរី។ គ្រូពេទ្យបានត្រួតពិនិត្យឃើញថាលោកនាយករដ្ឋមន្ត្រីខាងលើមានជំងឺមហារីកកាលពីខែមករា ហើយលោកទើបសម្រេចចិត្តទទួលការវះកាត់ក្រោយពិភាក្សាជាមួយគ្រូពេទ្យជំនាញហើយ។
ការិយាល័យរបស់នាយករដ្ឋមន្ត្រីសិង្ហបុរីបានប្រកាសនៅថ្ងៃអាទិត្យនេះថា នាយករដ្ឋមន្ត្រីសិង្ហបុរីលោក Lee Hsien Loong ត្រូវបានទទួលការត្រួតពិនិត្យនិងរកឃើញថាលោកមានជំងឺមហារីក្រពេញប្រូស្តាត។ លោកនឹងត្រូវទទួលការវះកាត់ដើម្បីកម្ចាត់មហារីកនេះនៅថ្ងៃចន្ទស្អែកនេះ។ តាមពិតទៅលោកត្រូវបានគ្រូពេទ្យជំនាញប្រាប់ថាលោកកើតជំងឺមហារីកក្រពេញប្រូស្តាតនេះតាំងពីខែមករាមកម្ល៉េះ ប៉ុន្តែលោកទើបតែសម្រេចចិត្តទទួលការវះកាត់ក្រោយពេលចំណាយពេលវេលាពិភាក្សាជាមួយវេជ្ជបណ្ឌិតជំនាញៗកន្លងមក។
បើតាមការអោយដឹងពីសំណាក់ការិយាល័យនាយករដ្ឋមន្ត្រី លោកនាយករដ្ឋមន្ត្រីនឹងជាសះស្បើយពេញលេញក្រោយទទួលការវះកាត់រួចរាល់ហើយនោះ។ លោក Lee នឹងត្រូវស្ថិតក្រោមការថែទាំងវេជ្ជសាស្ត្រក្រោយការវះកាត់ក្នុងរយៈពេល ១សប្តាហ៍ ហើយក្នុងរយៈពេលនោះលោក Teo Chee Hean ជាឧបនាយករដ្ឋមន្ត្រីនឹងឡើងកាន់តំណែងជានាយករដ្ឋមន្ត្រីស្តីទីជំនួសសិន៕
© រក្សាសិទ្ធិដោយ thmeythmey.com