ជាតិ
សង្គមជាតិ
ទៅថ្ងៃអនាគតអ្នកម៉ាស្សានៅសៀមរាបនឹងទទួលបានអត្តសញ្ញាណពិតប្រាកដ អ្នកជំនាញកំពុងបង្ហាញពីរបៀបម៉ាស្សាដល់សិក្ខាកាម។
× សៀមរាប៖ កន្លងមក ពាក្យថាការងារ ម៉ាស្សា បានក្លាយជាពាក្យមិនល្អនៅក្នុងសង្គម។ ព្រោះថា មានមនុស្សមួយចំនួន បានយកមុខរបរនេះ ទៅលាយឡំនឹងមុខរបរផ្សេង ដែលធ្វើឲ្យប៉ះពាល់ ដល់អ្នកមានអាជីពចំពោះច្បាស់លាស់។ ដូច្នេះហើយ ដើម្បីស្ថារមុខមាត់ និងលើកស្ទួយ ឲ្យតម្លៃលើការងារម៉ាស្សាសុខភាព និងស្ប៉ាឡើងវិញ ក្រសួងទេសចរណ៍ តាមរយៈមន្ទីរទេសចរណ៍ខេត្តសៀមរាប បានប្រមូលអ្នកម៉ាស្សាក្នុងហាងធំៗក្នុងក្រុងសៀមរាប មកបណ្តុះបណ្តាលលើជំនាញនេះ ដើម្បីទទួលបានវិញ្ញាបនបត្រ និងការបញ្ជាក់ពីអត្ថសញ្ញាណត្រូវ។
សិក្ខាកាម ដែលជាអ្នកម៉ាស្សាសុខភាព និងស្ប៉ា នៅតាមហាងធំៗក្នុងក្រុងសៀមរាប ចំនួន១៩៨នាក់ បានទទួលការបណ្តុះបណ្តាល និងទទួលបានវិញ្ញាបនបត្របញ្ជាក់ពីការងាររបស់ពួកគេ។ ពួកគេទាំងនោះ ខ្លះមានជំនាញ និងខ្លះទៀត មិនទាន់មានជំនាញច្បាស់លាស់ តាមស្តង់ដា នៃវិជ្ជាជីវៈ។
ដោយសារជាខេត្តទេសចរណ៍ និងសម្បូរភ្ញៀវដែលមានតម្រូវការម៉ាស្សា ដើម្បីសុខភាព ក្រសួងទេសចរណ៍ បានចាប់ផ្តើមអនុវត្តន៍គម្រោងរបស់ខ្លួនដែលមានរយៈពេល១ឆ្នាំ ក្នុងនោះ អ្នកម៉ាស្សាប្រមាណ៨០០នាក់ ទូទៅក្រុងសៀមរាប នឹងទទួលបានបណ្តុះបណ្តាលលើជំនាញម៉ាស្សា និងស្ប៉ា។ គ្រូបង្គោល សុទ្ធសឹងជាអ្នកជំនាញ ខ្លះមកពីមន្ទីរពេទ្យកាល់ម៉ែត្រ និងខ្លះជាគ្រូបង្រៀនប្រចាំហាងម៉ាស្សាធំ។
កញ្ញា ម៉ា កក្កដា ជាអ្នកម៉ាស្សា និងបានចូលរួមក្នុងវគ្គបណ្តុះបណ្តាលខាងលើ បានសម្តែងការរីករាយចំពោះក្រសួងទេសចរណ៍ ដែលតែងគិតគូរ និងជាពិសេស បានកែលម្អ និងស្តារកិត្តិយសអ្នកម៉ាស្សាឡើងវិញ។ នាងបញ្ជាក់ថា កន្លងមក នារីម៉ាស្សា ធ្លាប់ទទួលរងនូវការវាយតម្លៃមិនល្អពីមជ្ឈដ្ឋានមួយចំនួន ថាជានារីមិនល្អ ឫរកស៊ីផ្លូវភេទជាដើម។
គួររម្លឹកថា វគ្គបណ្តុះបណ្តាលជំនាន់ទី១បានចាប់ផ្តើមនៅថ្ងៃទី៦ ហើយបានបញ្ចប់កាលពីថ្ងៃទី១៧ ខែកុម្ភៈ។ បើតាមមន្ត្រីនៃមន្ទីរទេសចរណ៍ខេត្តសៀមរាប គ្រូបង្គោលនឹងចុះទៅបង្រៀន ឫបណ្តុះបណ្តាលនៅតាមហាងម៉ាស្សាមួយចំនួន ដែលមានសមាជិកចាប់ពី៧០នាក់ឡើង ដើម្បីកុំឲ្យខាតពេលវេលា។ គម្រោងនេះ គ្រោងនឹងបណ្តុះបណ្តាលអ្នកម៉ាស្សាប្រមាណ៨០០នាក់ ក្នុងហាងម៉ាស្សាចំនួន៥០ហាង ដើម្បីពង្រឹងចំណេះ ជំនាញ ដើម្បីប្រើប្រាស់ទៅតាមស្តង់ដា៕
© រក្សាសិទ្ធិដោយ thmeythmey.com