ជាតិ
កម្ពុជាស្ថិតក្នុងចំណោមប្រទេសមានសេដ្ឋកិច្ចរីកចម្រើនឆាប់បំផុតលើលោក
×
ប្រធានធនាគារអភិវឌ្ឍន៍អាស៊ី (ADB) លោក TakehikoNakaoបានអះអាងថា កម្ពុជាគឺជាប្រទេសមួយក្នុងចំណោមប្រទេសនានាក្នុងពិភពលោក ដែលមាន សេដ្ឋកិច្ចរីកចម្រើនឆាប់រហ័សបំផុត។ ការអះអាងរបស់លោកប្រធាន ADB នេះ ធ្វើឡើងក្នុងសន្និសីទសារព័ត៌មាននៅស្នាក់ការធនាគារ ADB ប្រចាំកម្ពុជា ក្នុងពេលដែលរូបលោកបំពេញបេសកម្មនៅកម្ពុជារយៈពេល ២ ថ្ងៃ ចាប់ពីថ្ងៃទី ១០ ដល់ថ្ងៃទី ១១ ខែមីនា ឆ្នាំ ២០១៥ ។
«កម្ពុជាជាប្រទេសមួយក្នុងចំណោមប្រទេសនានាក្នុងលោកដែលមានសេដ្ឋកិច្ចរីកចម្រើនឆាប់រហ័សបំផុត» ។ នេះបើតាមសម្តីរបស់លោក TakehikoNakao ប្រធានធនាគារអភិវឌ្ឍន៍អាស៊ី (ADB) ក្នុងពេលលោកមកបំពេញទស្សនកិច្ចពីរថ្ងៃនៅកម្ពុជា ។ ក្នុងសន្និសីទកាសែតកាលពីថ្ងៃអង្គារម្សិលមិញ លោកប្រមុខ ADB រូបនេះ បន្តសរសើរកម្ពុជាយ៉ាងនេះថា៖ « ការកើនឡើងសេដ្ឋកិច្ចឆាប់រហ័សកម្ពុជា ដោយសារកំណើនដ៏រឹងមាំលើវិស័យឧស្សាហកម្ម សេវាកម្ម និង កសិកម្ម ។ ហើយវា បានធ្វើឲ្យប្រទេសកម្ពុជាខិតទៅជិតការផ្លាស់ប្តូរ ឋានៈពីប្រទេសដែលមានប្រាក់ចំណូលទាប ទៅជាប្រទេសដែលមានប្រាក់ចំណូលមធ្យម» ។ បើតាមលោក TakehikoNakaoកម្ពុជាបានកាត់បន្ថយភាពក្រីក្រពី ៥០ ភាគរយនៃប្រជាជនសរុបក្នុងឆ្នាំ ២០០៧ មកត្រឹមតែ ១៩% ក្នុងឆ្នាំ២០១២ ។
យ៉ាងណាក៏សោយ បន្ទាប់ពីសរសើរកំណើនសេដ្ឋកិច្ចរបស់កម្ពុជា លោកប្រធាន ADB ក៏មិនភ្លេចនិយាយពីបញ្ហាប្រឈមសេដ្ឋកិច្ចរបស់ប្រទេសមួយនេះខ្លះដែរ ។លោកថា សេដ្ឋកិច្ចរបស់កម្ពុជា នៅតែងាយរងគ្រោះដោយសារវិបត្តិផ្នែកតម្រូវការ និងការប្រែប្រួលតម្លៃខាងក្រៅ ដែលពឹងផ្អែកទៅលើវិស័យ មួយចំនួន ដូចជាវិស័យកាត់ដេរ ដែលមានចំនួន ៧១% នៃការនាំចេញក្នុងឆ្នាំ២០១៣ ។ លោក akehikoNakao បន្តថា បញ្ហាកង្វះថាមពលអគ្គិសនី ក៏បានបង្កផលបាកដល់អ្នកវិនិយោគផងដែរ។ បើតាមធនាគារអភិវឌ្ឍន៍អាស៊ី បច្ចុប្បន្នកម្ពុជា ជាប្រទេសដែលមានតម្លៃអគ្គិសនីខ្ពស់ជាងគេក្នុងតំបន់។
សូមបញ្ជាក់ថា ក្នុងពេលបំពេញបេសកម្មការងារនៅកម្ពុជា ប្រធានធនាគារអភិវឌ្ឍន៍អាស៊ី (ADB) លោក TakehikoNakao បានជួបជាមួយ លោក ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និង លោក ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា ។ ជំនួបជាមួយមន្ត្រីជាន់ខ្ពស់រដ្ឋាភិបាលនោះ លោកប្រធាន ADB បានពិភាក្សាអំពីយុទ្ធសាស្ត្រអភិវឌ្ឍន៍របស់រដ្ឋាភិបាលកម្ពុជា និង វិធីសាស្ត្រដែល ADB អាចគាំទ្រដល់កិច្ចខិតខំរបស់រដ្ឋាភិបាលក្នុងការធ្វើពិពិធកម្មសេដ្ឋកិច្ច លើកកម្ពស់កំណើនសេដ្ឋកិច្ចសម្រាប់ទាំងអស់គ្នា និង បន្តកាត់បន្ថយភាពក្រីក្រ។
បើតាមរបាយការណ៍របស់ ADB ផលិតផលក្នុងស្រុកសរុបរបស់កម្ពុជា បានកើនឡើងជាមធ្យមចំនួន ៦,៥% ក្នុងមួយឆ្នាំ នៅចន្លោះឆ្នាំ ២០០៧ និង ២០១៥។ ADB បានព្យាករណ៍កំណើនចំនួន ៧,៣% ក្នុងឆ្នាំ២០១៥ ដែលការព្យាករណ៍នេះ មានមូលដ្ឋានគាំទ្រពីអតិផរណាដែលត្រូវបានគ្រប់គ្រងយ៉ាងល្អ អត្រាប្តូរប្រាក់ដែលមានស្ថេរភាព និង ការប្រកួត ប្រជែងប្រកបដោយនិរន្តរភាព។
គួររម្លឹកថា ធនាគារអភិវឌ្ឍន៍អាស៊ីបានចាប់ផ្តើមប្រតិបត្តិការរបស់ខ្លួនក្នុងប្រទេសកម្ពុជាឡើងវិញ ក្នុងឆ្នាំ១៩៩២ ក្រោយជម្លោះរយៈពេលពីរទស្សវត្សរ៍ និង គិតចាប់ពីពេលនោះមក ADB បានផ្តល់កម្ចីសម្បទាន ជំនួយឥត សំណង និងជំនួយបច្ចេកទេស ចំនួន ២,១១ ពាន់លានដុល្លារអាមេរិក ស្ថិតក្រោមយុទ្ធសាស្ត្រភាពជាដៃគូប្រចាំប្រទេស ដែលទើបត្រូវបានអនុម័តនាពេលថ្មីៗនេះ ។ ហើយADB នឹងគាំទ្រដល់ប្រទេសកម្ពុជា ជាមួយនឹងថវិកាជំនួយជាង ៨០០ លានដុល្លាសម្រាប់ចាប់ពីឆ្នាំ២០១៤ ដល់ឆ្នាំ ២០១៨ ដោយផ្តោតលើការបង្កើនប្រាក់ចំណូល និង ហេដ្ឋា- រចនាសម្ព័ន្ធជនបទ ការបង្កើនការតភ្ជាប់ទំនាក់ទំនងរវាងតំបន់ជនបទ និង តំបន់ទីក្រុង និង ការកែលម្អគុណភាព គ្រប់គ្រងវិស័យសាធារណៈ៕
© រក្សាសិទ្ធិដោយ thmeythmey.com