ពីនេះ ពីនោះ
គួរឈប់ប្រើពាក្យ «ប្រតិបត្តិការនេះធ្វើឡើងក្រោមការចង្អុលបង្ហាញពី ១ ២ ៣ ៤ ៥ …»
×
នៅពេលមានយុទ្ធនាការ ឬប្រតិបត្តិការរបស់មន្ត្រីមានសមត្ថកិច្ច និងពិសេសកងកម្លាំងប្រដាប់អាវុធទៅលើសកម្មភាពល្មើសអ្វីមួយ មន្ត្រីមូលដ្ឋានឬមន្ត្រីដែលទទួលបន្ទុកដឹកនាំប្រតិបត្តិការនោះ តែងតែនិយាយប្រាប់អ្នកសារព័ត៌មាននេះថា «ក្រោមការចង្អុលបង្ហាញ និងបញ្ជាផ្ទាល់» ពីថ្នាក់លើរបស់ពួកគេ ទើបពួកគេអាចសម្រេចកិច្ចការនោះដោយជោគជ័យ។
ពាក្យថា «ក្រោមការចង្អុលបង្ហាញ» ឬ «ក្រោមការបញ្ជាផ្ទាល់»នេះ បើទោះជាគ្មាននរណាផ្តល់និយមន័យ ក៏ពលរដ្ឋទូទៅដឹងហើយថា ជាភាសាលើកគុណសម្បត្តិ រំលឹកគុណថ្នាក់លើ។ វាអាចជាការនិយាយល្អពីថ្នាក់លើរបស់ខ្លួន ដើម្បីឲ្យថ្នាក់កំពូលបានដឹងថា ក្រុមថ្នាក់ក្រោមបានធ្វើការ។
វាជាការប្រសើរហើយដែលមន្ត្រីគ្រប់គ្នាធ្វើការ។ ផ្ទុយទៅវិញ វាមិនមែនជារឿងចម្លែកទេ ដែលមនុស្សគ្រប់គ្នាខំសូកប៉ាន់ និងប្រឡងចូលដើម្បីធ្វើជាមន្ត្រីនោះ។ មន្ត្រីរាជការ គឺត្រូវធ្វើការបម្រើប្រទេសជាតិ បម្រើពលរដ្ឋទៅតាមតួនាទី ភារកិច្ច។ ពោលគឺមិនមែនរង់ចាំទាល់តែមានការ ចង្អុលបង្ហាញ និងបញ្ជានោះទេ។
មន្ត្រីមួយចំនួនកំពុងយល់ច្រឡំថា ពាក្យ«ចង្អុលបង្ហាញ»នេះ អាចធ្វើអោយសាធារណៈមតិ យល់ថា មេរបស់ពួកគេ ធ្វើការសកម្ម។ ហើយពួកគេទទួលបានជាថ្នូរមកវិញ ជាការស្រឡាញ់ពេញចិត្តពីមេ។ តាមពិត ពាក្យនេះ កំពុងតែត្រូវ គេសើចចំអកយ៉ាងខ្លាំងទៅវិញទេ។
ពេលខ្លះត្រឹមនគរបាលសង្កាត់ ឬឃុំដែលបំពេញការងារអ្វីមួយ ពួកគេត្រូវនិយាយលើកគុណសម្បត្តិ អធិការស្រុកខណ្ឌ អភិបាលស្រុកខណ្ឌ ស្នងការ អភិបាលខេត្ត រាជធានី រហូតដល់ក្រសួងមហាផ្ទៃ ហើយហួសដល់ប្រមុខរដ្ឋាភិបាលទៀតផង។ តើទាល់តែមានការណែនាំ ចង្អុល បង្ហាញ ទើបបម្រើប្រទេសជាតិ បម្រើប្រជាពលរដ្ឋបាន? បើដូច្នេះមែន តើមានន័យថាយ៉ាងដូចម្តេច? តើលោកធំៗ ត្រូវអង្គុយចង្អុលបង្ហាញរាប់ពាន់រឿងក្នុងមួយថ្ងៃៗ ឬយ៉ាងណា? ចុះតែអ្នកដែលត្រូវគេចង្អុលបង្ហាញនោះ មិនដឹងថាត្រូវធ្វើអ្វីទេ ឬយ៉ាងណា?
ដើមទងនៃការប្រើប្រាស់ពាក្យទាំងនេះ គឺវប្បធម៌នៃអែបអប ឡេមឡឺម លើកជើងមេកើយយកបុណ្យតែប៉ុណ្ណោះ។ ពាក្យទាំងនេះ គ្មានន័យនៅក្នុងសម័យកាលនេះទៀតឡើយ។ បើនិយាយមិនចំណេញ គួរកុំនិយាយ។
លោក ហ៊ុន សែន ក៏ធ្លាប់បង្ហាញពីអារម្មណ៍ធុញទ្រាន់ចំពោះមន្ត្រីថ្នាក់របស់លោកដែរ។ លោកតែងតែស្រែកតាមមីក្រូពីវេទិកានានាស្តីបន្ទោសមន្ត្រីថ្នាក់ក្រោមថា «ទាល់តែស្រែក បាននាំគ្នាធ្វើ» ឬថា « ... រឿងនេះ វាអាស្រ័យលើអស់លោក ធ្វើឬមិនធ្វើ តែប៉ុណ្ណោះ»។ ក្នុងន័យនេះ គេអាចយល់ន័យរបស់លោកនាយករដ្ឋមន្ត្រីដែលចង់និយាយថា មន្ត្រីក្រោមឱវាទ ត្រូវតែដឹងថា ខ្លួនត្រូវធ្វើការងារអ្វី។
មន្ត្រីជាន់ខ្ពស់មួយចំនួន ក៏មិនគួរស្រើបស្រាលនឹងពាក្យដែលមន្ត្រីថ្នាក់ក្រោមនិយាយលើកសរសើរគុណសម្បត្តិនោះទេ បើទោះជាខ្លួនពិតជាបានចង្អុលបង្ហាញ និងបញ្ជាផ្ទាល់មែននោះ។ ប្រសិនបើ ការងារជោគជ័យ ទទួលលទ្ធផលល្អ ពលរដ្ឋច្បាស់ជាមើលឃើញ និងដឹងយ៉ាងច្បាស់ថា អ្នកណាជាអ្នកធ្វើ។ ទុកឲ្យគេសរសើរ ប្រសើរជាង សរសើរខ្លួនឯង៕
© រក្សាសិទ្ធិដោយ thmeythmey.com